ບູນເດສລີກາ ປິດສາກແລ້ວ ບາເຢິນສະຫຼອງແຊັມ! ໂວຟບວກ ສຸດຮຶດແຕ່ກໍ່ໄຮ້ຜົນ

ບານເຕະລີກ ບູນເດສລີກາ ຂອງເຢຍລະມັນ ລະດູການ 2017-2018 ກໍ່ໄດ້ປິດສາກລົງ ຢ່າງເປັນທາງການແລ້ວ ຫຼັງຕໍ່ສູ້ຍາດຊີງແຊັມລີກກັນຍາວເກືອບ 10 ເດືອນ ປະກົດວ່າ ແຊັມຍັງຄົງເປັນເຈົ້າເກົາ ບາເຢິນ ມິວນິກ ທີ່ຜູກມັດແຊັມລີກ ເປັນປີທີ່ 6 ຕິດຕໍ່ກັນແບບຄະແນນຂາດລອຍບໍ່ມີໃຜຕໍ່ກອນໄດ້.

ບັນຍາກາດການສະຫຼອງແຊັມລີກຂອງ ບາເຢິນ ມິວນິກ ສະໄໝທີ 28 ແລະ ເປັນແຊັມ 6 ປີຕິດຕໍ່ກັນ

ທີມແຊັມ ບາເຢິນ ມິວນິກ ພາຍໃຕ້ການຄຸມທີມຂອງ ຄາຣ໌ໂລ ອັນເຊລັອດຕິ (Carlo Ancelotti) ໄລຍະເລິ່ມຕົ້ນລະດູການມີຜົນງານບໍ່ດີຕາມຄວາມຄາດຫວັງຂອງຫຼາຍຝ່າຍຈຶ່ງເກີດການປ່ຽນແປງຫົວເຮືອໃຫຍ່ ແລະ ກໍ່ໄດ້ ຈູບ ໄຮເກສ ( Jupp Heynckes) ຕຳນານຜູ້ທີ່ເຄີຍພາ ບາເຢິນ ປະສົບຜົນສຳເລັດຢ່າງຍິ່ງໃຫຍ່ກັບມາກອບກູ້ວິກິດອີກຄັ້ງຫຼັງຈາກຕັດສິນໃຈກະສຽນໄປໃນປີ 2013 ແລະ ກໍ່ບໍ່ເຮັດໃຫ້ແຟນບານຜິດຫວັງ ດ້ວຍການພາ ບາເຢິນ ມິວນິກ ຄວ້າແຊັມລີກ ສະໄໝທີ 28 ໄປແບບງ່າຍດາຍໂດຍ ມີຄະແນນຫ່າງ ອັນດັບ 2 ຊາເກ 04 ເຖິງ 21 ຄະແນນ.

ຈູບ ໄຮເກສ ( Jupp Heynckes) ຜູ້ກອບກູ້ ບາເຢິນ ມິວນິກ ກັບມາປ້ອງກັນແຊັມສະໄໝທີ 6 ຕິດຕໍ່ກັນໄດ້ສຳເລັດ

ສຳຫຼັບທີມທີ່ໄດ້ໄປແຂ່ງຂັນ ຢູຟາ ແຊັມປ້ຽນ ລີກ ໃນລະດູການໜ້າແບບອັດຕະໂນມັດ 4 ທີມໄດ້ແກ່: ບາເຢິນ ມິວນິກ, ຊາເກ 04, ຮອຟເຟັນໄຮມ໌ ແລະ ໂບຣຸສເຊຍ ດັອດມູນ. ສ່ວນທີມທີ່ໄດ້ໄປ ແຂ່ງຂັນລາຍການ ຢູໂຣປາ ລີກ 2 ທີມ: ໄບເອີ ເລເວີຄູເຊນ ອັນດັບ 5 (ໄດ້ສິດແບບອັດຕະໂນມັດ) ແລະ ອາເບ ໄລຊິກ  ອັນດັບ 6 (ລົງແຂ່ງຮອບຄັດເລືອກ).

ສ່ວນທີມທີ່ຕ້ອງຕໍ່ສູ້ເພື່ອໜີຕົກຊັ້ນ ໂວຟສ໌ບວກ ທີມອັນດັບ 16 ກ່ອນລົງແຂ່ງມີຄະແນນຕາມຫຼັງ ໄຟຣບວກ ທີມອັນດັບ 15 ທີ່ຢູ່ພຶ້ນທີ່ປອດໄພ 2 ຄະແນນ ແມ່ນຕ້ອງການໄຊຊະນະເທົ່ານັ້ນເພື່ອລຸ້ນແຊງ ໄຟຣບວກ, ແຕ່ເງື່ອນໄຂຕ້ອງໃຫ້ ໄຟຣບວກ ແພ້ ຫຼື ສະເໝີ ເທົ່ານັ້ນຈຶ່ງມີສິດຢູ່ລອດ ແລະ ພວກເຂົາກໍ່ສາມາດເອົາຊະນະ ເອັຟຊີ ໂຄໂລນ ໄປແບບຂາດລອຍ 4-1 ແຕ່ກໍ່ບໍ່ເປັນຜົນເມື່ອ ໄຟຣບວກ ສາມາດເອົາຊະນະ ເອົາສ໌ບວກ ໃນບ້ານຕົນເອງ 2-0.

ໂວຟສ໌ບວກ ສາມາດເອົາຊະນະ ເອັຟຊີ ໂຄໂລນ 4-1 ແຕ່ກໍ່ບໍ່ສາມາດພາທີມພົ້ນ,ໂຊນຕົກຊັ້ນໄດ້ ແຕ່ກໍ່ຍັງໄດ້ສິດແກ້ຕົວກັບ ໂຮລສ໌ຕິນ ເຄລ

ເຖິງວ່າ ໂວຟສ໌ບວກ ຈະເຮັດບໍ່ສຳເລັດແຕ່ພວກເຂົາກໍ່ຍັງມີໂອກາດແກ້ຕົວ ເມື່ອຢູ່ອັນດັບທີ 16 ເຖິງເປັນພຶ້ນທີ່ຕົກຊັ້ນ ແຕ່ກໍ່ຍັງໄດ້ສິດໄປເພລອັອຟ ກັບທີມ ອັນດັບ 3 ຂອງລີກຮອງ ບູນເດສລີກາ 2 ກັບ ໂຮລສ໌ຕິນ ເຄລ ໃນວັນທີ 18 ແລະ 22 ພຶດສະພາ 2018.

ນັກເຕະຂອງ ເອັຟຊີ ໂຄໂລນ ຜິດຫວັງຫຼັງຈາກທີມຕົກຊັ້ນ

ສ່ວນອີກ 2 ທີມທີ່ຕົກຊັ້ນແນ່ນອນແລ້ວແມ່ນ ຮຳບູກ ອັນດັບທີ 17 ແລະ ເອັຟຊີ ໂຄໂລນ ອັນດັບ 18, ສັບລັບທີມທີ່ເລືອນຂຶ້ນຊັ້ນມາແທນໄດ້ແກ່ ເນີນແບກ ອັນດັບ 1 ແລະ ຟໍຕູນາ ເດສເຊດອຟ.

ຮູບ:AP

%d bloggers like this: