ເປີດງານວາງສະແດງສິນຄ້າທ໊ອບໄທແບຣນ ວັນທີ 7-11 ມີນາ 2018

ງານວາງສະແດງສິນຄ້າທັອບໄທແບຣນ 2018 (Top Thai Brand 2018) ຈັດຂຶ້ນໃນລະຫວ່າງວັນທີ 7-11 ມີນາ 2018 ທີ່ສູນການຄ້າລາວ-ໄອເຕັກ ໂດຍການເຂົ້າຮ່ວມຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ນາງ ຢານີ ສີມີໄຊ ອັກຄະຣາຊະທູດທີ່ປຶກສາ (ຝ່າຍການຄ້າ) ສໍານັກງານສົ່ງເສີມການຄ້າໃນຕ່າງປະເທດ ສະຖານທູດໄທ ປະຈໍາລາວ ມີບັນດາຜູ້ປະກອບການ ແລະ ພາກສ່ວນກ່ຽວລວມທັງບໍລິສັດຫ້າງຮ້ານຕ່າງໆເຂົ້າຮ່ວມ.

ຈຸດປະສົງກໍ່ເພື່ອສົ່ງເສີມການຄ້າລະຫວ່າງປະເທດໃຫ້ມີການຂະຫຍາຍຕົວນັບມື້ເພີ່ມຂຶ້ນ ກໍຄືໃນນາມສະມາຊິກເອອີຊີດ້ວຍກັນ ເຊິ່ງປີນີ້ມີຮ້ານຄ້າເຂົ້າຮ່ວມວາງສະແດງສິນຄ້າທັງໝົດ 176 ຮ້ານຄ້າ, ມີ 143 ບໍລິສັດ, ສ່ວນໃຫຍ່ຈະເປັນສິນຄ້າເສີມຄວາມງາມ, ຮັກສາສຸຂະພາບ ແລະ ເຄື່ອງໃຊ້ຄົວເຮືອນທົ່ວໄປ. ຂະນະທີ່ສິນຄ້າໃນລາວກໍ່່ຈະມີສິນຄ້າໂອດ໊ອບ ແລະ ເຄື່ອງຈັກສານ, ເຄື່ອງທີ່ລະນຶກອື່ນໆ.

ທ່ານ ຊັດສະວັນ ສາຄອນສິນ ຮັກສາການອຸປະທູດ ຈາກປະເທດໄທ ກ່າວເຖິງການຈັດງານໃນຄັ້ງນີ້ວ່າ: ການຈັດງານທັອບໄທແບຣນ 2018 ໃນຄັ້ງນີ້ ຈະເປັນການສົ່ງເສີມຄວາມສຳພັນທາງດ້ານເສດຖະກິດ, ການຄ້າ, ການລົງທຶນລະຫວ່າງໄທ ກັບ ສປປ ລາວ ບົນພື້ນຖານຄວາມເທົ່າທຽມກັນ, ຄວາມຈິງໃຈທີ່ນຳໄປສູ່ຄວາມເຊື່ອໝັ້ນ ແລະ ການຮ່ວມມືໃນການເຊື່ອມໂຍງທາງດ້ານເສດຖະກິດຕາມນະໂຍບາຍ 3 ປີດຂອງທ່ານນາຍົກລັດຖະມົນຕີ ແຫ່ງ ສປປ ລາວ ກໍານົດຄື:

ເປີດປະຕູ, ເປີດອຸປະສັກ ແລະ ເປີດໃຈ ເຊິ່ງຈະເປັນການຊ່ວຍສົ່ງເສີມໃຫ້ມູນຄ່າການຄ້າລະຫວ່າງ ລາວ-ໄທ ຂະຫຍາຍຕົວເພີ່ມຂຶ້ນຕໍ່ເນື່ອງ, ອີກທັງຍັງເປັນການສ້າງໂອກາດໃຫ້ຜູ້ປະກອບການທັງສອງຝ່າຍໄດ້ໃຊ້ເວທີເພື່ອປະຊາສຳພັນສິນຄ້າຂອງທັງສອງປະເທດໃຫ້ເປັນທີ່ຮູ້ຈັກແຜ່ຫຼາຍ.

ສຳລັບໃນປີ 2017 ມູນຄ່າການຄ້າລະຫວ່າງ ລາວ-ໄທ ມີປະມານ 6,170 ລ້ານໂດລາສະຫາລັດຂະຫຍາຍຕົວເພີ່ມຂຶ້ນ 5%. ສຳລັບ 1 ເດືອນທຳອິດປີ 2018 ມູນຄ່າການຄ້າລວມຢູ່ທີ່ 580 ລ້ານກວ່າໂດລາສະຫາລັດ ຂະຫຍາຍຕົວຢູ່ໃນລະຫວ່າງ 44%.

ພາຍໃນງານຈະໄດ້ພົບກັບສິນຄ້າຫຼາກຫຼາຍແລ້ວ ຍັງໄດ້ແລກປ່ຽນບົດຮຽນເຊິ່ງກັນ ແລະ ກັນ ເພື່ອຫາທາງເຮັດທຸລະກິດຮ່ວມກັນໃນອະນາຄົດ ຕື່ມອີກ.

%d bloggers like this: