ພັກກາຍ ສະບາຍໃຈ ໃນວັນພັກຜ່ອນ ທີ່ໂຮງແຮມ ອິນທິຣາ ວັງວຽງ

ຖ້າເວົ້າເຖິງສະຖານທີ່ທ່ອງທ່ຽວຢ່າງເມືອງວັງວຽງ ອາດຈະບໍ່ມີໃຜທີ່ບໍ່ຮູ້ຈັກ ເນື່ອງຈາກເປັນເມືອງທ່ອງທ່ຽວທີ່ຢູ່ໃກ້ນະຄອນຫຼວງວຽງຈັນ ໃຊ້ເວລາໃນການເດີນທາງບໍ່ເທົ່າໃດຊົ່ວໂມງເທົ່ານັ້ນ ເມື່ອມາເຖິງວັງວຽງແລ້ວອີກສິ່ງທີ່ຂາດບໍ່ໄດ້ກໍ່ຄືທີ່ພັກ ແລະ ໃນປັດຈຸບັນການຫາທີ່ພັກກໍ່ມີຄວາມສະດວກສະບາຍມີໃຫ້ເລືອກແບບນັບບໍ່ຖ້ວນ ແຕ່ວ່າການທີ່ຈະເລືອກບ່ອນພັກທີ່ໃຫ້ຄວາມຮູ້ສຶກວ່ານີ້ຄືການມາພັກຜ່ອນໂດຍແທ້ຈິງ ມີທັງບັນຍາກາດທີ່ອ້ອມຮອບດ້ວຍພູເຂົາ, ສາຍນ້ຳ, ອາກາດສົດຮ່ວມກັບການອອກແບບຂອງໂຮງແຮມທີ່ໃຫ້ຄວາມຮູ້ສຶກແຕກຕ່າງຈາກບ່ອນອື່ນ ທັງໝົດນີ້ເຮົາຄວນຈະເລືອກພັກກາຍ ພັກໃຈ ທີ່ໂຮງແຮມໃດດີ?.
ຄຳຖາມນີ້ອາດຈະຢູ່ໃນໃຈຂອງໃຜຫຼາຍໆຄົນວ່າ ຖ້າເຮົາຕ້ອງການຫຼີກໜີຈາກຄວາມວຸ້ນວາຍຂອງເມືອງຫຼວງໃນໄລຍະເສົາ – ທິດ ເພື່ອໄປພັກຜ່ອນໃຫ້ຮ່າງກາຍ ແຕ່ເມື່ອໄປທີ່ວັງວຽງແລ້ວຍັງຕ້ອງພົບກັບ ຄວາມວຸ້ນວາຍພາຍໃນຕົວເມືອງອີກເຮົາຄວນຈະເຮັດແນວໃດ. ມື້ນີ້, ເຮົາຈະມາແນະນຳໃຫ້ຮູ້ຈັກກັບໂຮງແຮມອິນທິຣາ ວັງວຽງ ເປັນໂຮງແຮມທີ່ຫາກໍ່ໄດ້ຮັບການປັບປຸງໃໝ່ ແລະ ເປີດໃຊ້ບໍລິການໃນວັນທີ 1 ສິງຫາ 2017 ຜ່ານມານີ້, ຕັ້ງຢູ່ກັບແຄມນ້ຳຊອງ ມີບັນຍາກາດຂອງສາຍນ້ຳ, ພູເຂົາ ແລະ ອາກາດສົດ ທີ່ລໍຖ້າໃຫ້ຜູ້ໄປພັກຜ່ອນໄດ້ຄວາມຮູ້ສຶກຜ່ອນຄາຍໄປກັບມັນ ເຊິ່ງທັງໝົດທີ່ກ່າວມາຮັບຮອງວ່າສາມາດຕອບໂຈດສຳລັບທ່ານທີ່ຕ້ອງການໄປພັກຜ່ອນກັບຄວາມເປັນທຳມະຊາດໂດຍແທ້ຂອງວັງວຽງ ແລະ ໜີຄວາມວຸ້ນວາຍໄດ້ຢ່າງແນ່ນອນ.


ນອກຈາກຄວາມພິເສດຂອງບັນຍາກາດແລ້ວທີ່ ໂຮງແຮມອິນທິຣາ ວັງວຽງ ແຫ່ງນີ້ ຍັງມີຄວາມພິເສດທາງດ້ານການອອກແບບທີ່ແຕກຕ່າງ ແລະ ບໍ່ມີໃຜຄືໃນເມືອງວັງວຽງແຫ່ງນີ້ ໂດຍຕົວອາຄານແມ່ນໄດ້ຮັບການອອກແບບໃຫ້ມີລັກສະນະເປັນລ໊ອກຄືກັບຮັງເຜິ້ງ ແຕ່ລະຫ້ອງຈະຮູ້ສຶກໄດ້ຮັບຄວາມເປັນສ່ວນຕົວຫຼາຍຂຶ້ນ, ພື້ນ ແລະ ຝາຂອງອາຄານຈະເປັນແບບປູນເປືອຍ ຫຼື ປູນດິບ ເຊິ່ງເປັນຄວາມຕັ້ງໃຈໃນການອອກແບບຂອງເຈົ້າຂອງທີ່ຕ້ອງການໃຫ້ຜູ້ເຂົ້າມາຮູ້ສຶກແປກໃໝ່ ແລະ ມີຄວາມເປັນທຳມະຊາດຫຼາຍຂຶ້ນ.
ຢູ່ຊັ້ນລຸ່ມສຸດຂອງໂຮງແຮມ ຈະເປັນສະລອຍນ້ຳທີ່ຢູ່ຕິດກັບນ້ຳຊອງ ເໝາະສຳລັບແຂກທີ່ມາເປັນຄອບຄົວແລ້ວຕ້ອງການສ້າງກິດຈະກຳ ເຊິ່ງການລອຍນ້ຳກໍ່ຖືເປັນທາງເລືອກທີ່ດີ ຫຼື ຈະເປັນການມາແບບຄູ່ຮັກ ຫຼື ກຸ່ມໝູ່ເພື່ອນກໍ່ສາມາດມາສັງສັນກັນບໍລິເວນນີ້ ແລະ ນັ່ງເບິ່ງຕາເວັນຕົກດິນໄປນຳກັນແຄມສະນ້ຳ ແລະ ນ້ຳຊອງ ກໍ່ເປັນ ຄວາມຮູ້ສຶກທີ່ພິເສດທີ່ສຸດເຊັ່ນກັນ ໂດຍໃນບໍລິເວນຊັ້ນລຸ່ມນີ້ຍັງເປັນຫ້ອງອາຫານຂອງໂຮງແຮມທີ່ມີທັງອາຫານລາວ, ອາຫານສາກົນ ໄວ້ຄອຍບໍລິການ ແລະ ຍັງມີເຄົ້າເຕີບາເຄື່ອງດື່ມ, ນ້ຳໝາກໄມ້ ໄປຈົນເຖິງວາຍລົດຊາດດີກຽມໄວ້ຮັບຕ້ອນສຳລັບແຂກທີ່ຕ້ອງການນັ່ງດື່ມໄປກັບບັນຍາກາດທີ່ສະຫງົບ ແລະ ສວຍງາມແບບນີ້ກໍ່ບໍ່ຄວນພາດເຊັ່ນກັນ.

ທ່ານ ອິນທີ ເດືອນສະຫວັນ ຜູ້ບໍລິຫານ ອິນທິຣາ ກຣຸບ ເຊິ່ງມີຮ້ານຊັ້ນນຳທີ່ຫຼາຍໆທ່ານອາດຈະຮູ້ຈັກ ເຊັ່ນ: ຮ້ານອາຫານຂອບໃຈເດີ, ຮ້ານອາຫານຊັນທາຣາ, ຮ້ານອາຫານໄຊໂຍ ລວມທັງໂຮງແຮມອິນທິຣາ ວັງວຽງ ກ່າວວ່າ: ໂຮງແຮມອິນທິຣາ ວັງວຽງ ແຫ່ງນີ້ ບໍ່ພຽງແຕ່ຕ້ອງການເປັນບ່ອນໃຫ້ນັກທ່ອງທ່ຽວໄດ້ຫຼັບນອນເທົ່ານັ້ນ ແຕ່ ຄວາມຕ້ອງການແມ່ນຢາກໃຫ້ເປັນສະຖານທີ່ພັກຜ່ອນທີ່ຕອບໂຈດໃຫ້ແກ່ລູກຄ້າ ໂດຍແຂກທີ່ບໍ່ຕ້ອງການອອກໄປພົບກັບ ຄວາມວຸ້ນວາຍຢູ່ພາຍນອກກໍ່ສາມາດໃຊ້ເວລາຢູ່ໃນໂຮງແຮມໄດ້ເຊັ່ນກັນ.
ທຸກຄວາມຕ້ອງການຂອງນັກທ່ອງທ່ຽວ ເຊັ່ນ: ວິວທຳມະຊາດ, ສາຍນ້ຳ, ພູເຂົາ, ເມກໝອກ ແລະ ພາບການດຳລົງຊີວິດຕາມວິຖີຊາວເມືອງວັງວຽງ, ຕາມແຄມນ້ຳຊອງທີ່ໂຮງແຮມຂອງພວກເຮົາກໍ່ມີໃຫ້ລູກຄ້າໄດ້ສຳຜັດ ພ້ອມມີອາຫານແຊບ, ຫ້ອງພັກທີ່ມີຄວາມເປັນສ່ວນຕົວ, ສະອາດ ມີພື້ນທີ່ໃຊ້ສອຍທີ່ກວ້າງຂວາງ ໂດຍສະເພາະແມ່ນລະບຽງຂະໜາດໃຫຍ່ທີ່ຢູ່ຝາກນ້ຳຊອງຂອງແຕ່ລະຫ້ອງກໍ່ເປັນອີກມູມໜຶ່ງທີ່ໜ້າສົນໃຈໃນການໃຊ້ເວລານັ່ງພັກຜ່ອນ, ອ່ານໜັງສື ຫຼື ຈະນັ່ງຟັງເພງເບົາໆກໍ່ໄດ້.

ແນ່ນອນວ່າໃນປັດຈຸບັນ ການແຂ່ງຂັນທາງດ້ານທຸລະກິດໂຮງແຮມໃນເມືອງວັງວຽງແມ່ນມີທ່າແຮງຫຼາຍຂຶ້ນ ທັງການເຕີບໂຕຂອງເຮືອນພັກ, ໂຮງແຮມກໍ່ມີເປັນຈຳນວນຫຼາຍ ແຕ່ເຖິງແນວໃດກໍ່ຕາມ ກໍ່ຍັງບໍ່ພຽງພໍຕໍ່ກັບນັກທ່ອງທ່ຽວທີ່ເຂົ້າມາ ແລະ ໂຮງແຮມອິນທິຣາ ວັງວຽງ ກໍ່ແມ່ນຕ້ອງການຍົກລະດັບການບໍລິການມາໃຫ້ເປັນອີກໜຶ່ງທາງເລືອກແກ່ນັກທ່ອງທ່ຽວເຊັ່ນກັນ.
ສຳລັບທ່ານໃດທີ່ກຳລັງຊອກຫາທີ່ພັກ ທີ່ໃຫ້ບັນຍາກາດຜ່ອນຄາຍ ມີຄວາມສວຍງາມຂອງໂຮງແຮມທີ່ປະສົມປະສານກັບ ຄວາມສວຍງາມຂອງທຳມະຊາດໄດ້ຢ່າງລົງໂຕ ພ້ອມທັງສາມາດຫຼີກໜີຈາກຄວາມວຸ້ນວາຍຂອງສັງຄົມພາຍນອກເຂົ້າສູ່ການພັກຜ່ອນທີ່ແທ້ຈິງ, ໂຮງແຮມອິນທິຣາ ວັງວຽງ ກໍ່ເປັນອີກສະຖານທີ່ໜຶ່ງທີ່ທ່ານບໍ່ຄວນພາດທີ່ຈະໄປພັກເມື່ອໄປທ່ຽວເມືອງວັງວຽງ.
▶ ໂຮງແຮມອິນທິຣາ ວັງວຽງ ສະຖານທີ່ຕິດກັບແຄມນ້ຳຊອງ, ບ້ານສະຫວ່າງ ຕໍ່ໜ້າໂຮງໝໍເມືອງວັງວຽງ ແຂວງວຽງຈັນ ຫຼື ສາມາດໂທສອບຖາມກ່ອນໄດ້ທີ່ 023 511 088.

%d bloggers like this: