ອົດສະຕຣາລີ ພົບໄຂ້ຫວັດນົກ H5N1 ໃນແມວນ້ຳເທິງເກາະຫ່າງໄກ

17 Oct 2026

ຄລິກແຊຣ໌ 0 Facebook WhatsApp

ອົດສະຕຣາລີຢືນຢັນການພົບເຊື້ອໄຂ້ຫວັດນົກສາຍພັນຮຸນແຮງ H5N1 ເທິງເກາະແມັກຄວໍຣີ (Macquarie Island) ໃກ້ທະວີບແອນຕາກຕິກ ຫຼັງກວດພົບເຊື້ອໃນຕົວຢ່າງຈາກປະຊາກອນແມວນ້ຳຊ້າງ ແລະ ນົກນາງນວນບາງຊະນິດ ທີ່ກຳລັງຕົກຢູ່ໃນຄວາມສ່ຽງ ທ່າມກາງຄວາມກັງວົນວ່າ ສັດປ່າໃນພື້ນທີ່ອາດຈະໄດ້ຮັບຜົນກະທົບຢ່າງໜັກ.

ຕາມລາຍງານຂອງສື່ຕ່າງປະເທດຈາກນະຄອນຊິດນີ ເມື່ອວັນທີ 17 ຕຸລາ, ນາງ ເບັດ ຄຸກສັນ (Beth Cookson) ຫົວໜ້າເຈົ້າໜ້າທີ່ສັດຕະວະແພດຂອງອົດສະຕຣາລີ ກ່າວວ່າ ຜົນການກວດຢ່າງເປັນທາງການໄດ້ຢືນຢັນການພົບເຊື້ອໄວຣັສໄຂ້ຫວັດນົກຊະນິດທີ່ມີຄວາມຮ້າຍແຮງສູງ ໃນສັດທີ່ອາໄສຢູ່ເທິງເກາະແມັກຄວໍຣີ.

ປະເທດອົດສະຕຣາລີ ເຄີຍລາຍງານການພົບໄຂ້ຫວັດນົກ ເມື່ອເດືອນມິຖຸນາຜ່ານມາ ໂດຍເກາະແມັກຄວໍຣີຖືເປັນອີກຈຸດໜຶ່ງທີ່ຖືກຈັບຕາຢ່າງໃກ້ຊິດ. ກ່ອນໜ້ານີ້ ໃນທ້າຍປີ 2025 ຍັງມີການພົບເຊື້ອໄວຣັສດຽວກັນເທິງເກາະເຮີດ (Heard Island) ເຊິ່ງເປັນດິນແດນຂອງອົດສະຕຣາລີທີ່ຕັ້ງຢູ່ໃກ້ທະວີບແອນຕາກຕິກເຊັ່ນກັນ. ສື່ທ້ອງຖິ່ນລາຍງານວ່າ ການລະບາດໃນຄັ້ງນັ້ນອາດເຮັດໃຫ້ລູກແມວນ້ຳຕາຍຫຼາຍກວ່າ 13,000 ໂຕ.

ຂໍ້ມູນຈາກລັດຖະບານອົດສະຕຣາລີລະບຸວ່າ ແມວນ້ຳຊ້າງເປັນສັດທີ່ມີຄວາມສ່ຽງສູງຕໍ່ການຕິດເຊື້ອ ແລະໃນບາງກໍລະນີ ອັດຕາການຕາຍຂອງລູກແມວນ້ຳອາດສູງກວ່າ 90%.

ກ່ອນໜ້ານີ້ ເມື່ອເດືອນສິງຫາຜ່ານມາ ກະຊວງສິ່ງແວດລ້ອມຂອງອົດສະຕຣາລີ ໄດ້ປະກາດວ່າ ຈະຖອນເຈົ້າໜ້າທີ່ອອກຈາກສະຖານີວິໄຈເທິງເກາະແມັກຄວໍຣີ ເນື່ອງຈາກມີຄວາມກັງວົນຕໍ່ຄວາມສ່ຽງດ້ານສະພາບຈິດໃຈທີ່ຄະນະສຳຫຼວດອາດປະເຊີນ ຖ້າເກີດການລະບາດຂອງເຊື້ອ H5N1.

ຂະນະດຽວກັນ ຜູ້ຊ່ຽວຊານຄາດການວ່າ ໄວຣັສອາດສົ່ງຜົນໃຫ້ແມວນ້ຳຊ້າງລົ້ມຕາຍຈຳນວນຫຼາຍ ໃນໄລຍະລະດູປະສົມພັນທີ່ກຳລັງຈະມາເຖິງ.

ການພົບເຊື້ອ H5N1 ໃນສັດປ່າເທິງເກາະຫ່າງໄກແຫ່ງນີ້ ຈຶ່ງເປັນສະຖານະການທີ່ຕ້ອງຕິດຕາມຢ່າງໃກ້ຊິດ ໂດຍສະເພາະຜົນກະທົບທີ່ອາດເກີດຂຶ້ນຕໍ່ປະຊາກອນສັດປ່າໃນພື້ນທີ່ໃກ້ທະວີບແອນຕາກຕິກ.

ຕິດຕາມພວກເຮົາຜ່ານຊ່ອງທາງຕ່າງໆ

ຂ່າວທີ່ກ່ຽວຂ້ອງ