ຄາດໝາຍ ເສດຖະກິດ ປີ 2026 ແມ່ນສູ້ຊົນໃຫ້ GDP ຂະຫຍາຍຕົວ 5.5% ຂຶ້ນໄປ, ເກັບລາຍຮັບງົບປະມານປະມານໃຫ້ໄດ້ 20.02% ຂອງ GDP, ອັດຕາເງິນເຟີ້ ໃຫ້ຢູ່ໃນລະດັບສະເລ່ຍ 5%.
ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ໄດ້ລາຍງານຜົນຂອງກອງປະຊຸມສະຫຼຸບວຽກການເງິນ ປະຈໍາປີ 2025 ແລະ ທິດທາງປະຈຳປີ 2026 ທີ່ຈັດຂຶ້ນໃນວັນທີ 29 ມັງກອນ 2026 ແລະ ໄດ້ສໍາເລັດໃນວັນທີ 30 ມັງກອນ 2026 ທີ່ນະຄອນຫຼວງວຽງຈັນວ່າ: ການປະຕິບັດແຜນງົບປະມານແຫ່ງລັດ ປະຈຳປີ 2025 ລາຍຮັບປະຕິບັດໄດ້ປະມານ 79,307 ຕື້ກີບເທົ່າກັບ 114% ເກີນແຜນປະມານ 9,507 ຕື້ກີບ (ມະຕິສະພາດັດແກ້ 69,800 ຕື້ກີບ, ເທົ່າກັບ 18.61% ຂອງ GDP); ໃນນີ້, ນະຄອນຫຼວງວຽງຈັນ ແລະ ທຸກແຂວງສາມາດເກັບລາຍຮັບໄດ້ເກີນແຜນເປັນປີທີ 3.
ສຳລັບແຜນການປີ 2026 ແມ່ນສຸມໃສ່ການຊຸກຍູ້ລວມຍອດຜະລິດຕະພັນພາຍໃນ (GDP) ໃຫ້ຂະຫຍາຍຕົວ 5.5%ຂຶ້ນໄປ. ໃນນີ້, ຂະແໜງກະສິກໍາຂະຫຍາຍຕົວ 4.6%, ຂະແໜງອຸດສາຫະກຳຂະຫຍາຍຕົວ 5.1%, ຂະແໜງບໍລິການຂະຫຍາຍຕົວ 6.6% ແລະ ພາສີ-ອາກອນຜະລິດຕະພັນຂະຫຍາຍຕົວ 4%.
ປັດໄຈຕົ້ນຕໍທີ່ຊຸກຍູ້ການຂະຫຍາຍຕົວ GDP ມາຈາກຂະແໜງບໍລິການ ທ່ອງທ່ ຽວ, ຂະແໜງພະລັງງານ, ຂະແໜງບໍລິການໂລຈິສຕິກ, ຂະແໜງກະສິກໍາ ແລະ ອຸດສະຫະກຳປຸງແຕ່ງກະສິກຳ.
GDP ສະເລ່ຍຕໍ່ຫົວຄົນ 2,238 ໂດລາສະຫະລັດ ແລະ ລວມຍອດລາຍໄດ້ແຫ່ງຊາດຕໍ່ຫົວຄົນ 2,101 ສະຫະລັດ.
ສູ້ຊົນເກັບລາຍຮັບງົບປະມານປະມານໃຫ້ໄດ້ 83,600 ຕື້ກີບເທົ່າກັບ 20.02% ຂອງ GDP ແລະ ລາຍຈ່າຍ ງົບປະມານທັງໝົດ 81,400 ຕື້ກີບ ເທົ່າກັບ 19.50% ຂອງ GDP, ງົບປະມານເກີນດຸນ 0.53% ຂອງ GDP, ອັດຕາເງິນເຟີ້ ໃຫ້ຢູ່ໃນລະດັບສະເລ່ຍ 5% (ເໜັງຕີງ 2%).