ການສ້າງເສດຖະກິດຄອບຄົວໃຫ້ເຂັ້ມແຂງ ຖືເປັນປັດໄຈສຳຄັນໃນການພັດທະນາຊີວິດການເປັນຢູ່ໃຫ້ດີຂຶ້ນ ແລະ ພົ້ນທຸກ. ດັ່ງຄອບຄົວຂອງ ທ່ານ ຄຳພັດ ພອນປະເສີດ ຊາວກະສິກອນຜູ້ມີວິໄສທັດ ແລະ ຄວາມດຸໝັ່ນ, ອາໄສຢູ່ບ້ານດອນງີ້ວ ເມືອງງາ ແຂວງອຸດົມໄຊ ເປັນຜູ້ທີ່ໄດ້ຫັນປ່ຽນຈາກການເຮັດກະສິກຳແບບດັ້ງເດີມ ມາສູ່ການລ້ຽງປາແບບເປັນສິນຄ້າ ຈົນສາມາດສ້າງລາຍຮັບໃຫ້ຄອບຄົວໄດ້ຢ່າງມະຫາສານ.

ທ່ານ ຄຳພັດ ພອນປະເສີດ ໄດ້ເລີ່ມຕົ້ນອາຊີບການລ້ຽງປາດ້ວຍຄວາມຕັ້ງໃຈ ແລະ ມຸ່ງໝັ້ນ ໂດຍເຫັນວ່າສະພາບພື້ນທີ່ຂອງຕົນມີຄວາມເອື້ອອຳນວຍ ຈຶ່ງໄດ້ຕັດສິນໃຈຂຸດໜອງປາ ໃນເບື້ອງຕົ້ນ 1 ໜອງ. ຈາກນັ້ນ ຈຶ່ງໄດ້ຂະຫຍາຍອອກອີກ 3 ໜອງ ລວມເປັນ 4 ໜອງ.

ໄດ້ແບ່ງການລ້ຽງຢ່າງເປັນລະບົບ ຄື: 3 ໜອງ ແມ່ນໄດ້ປ່ອຍປານິນ ເຊິ່ງເປັນປາທີ່ຕະຫຼາດຕ້ອງການສູງ, ລ້ຽງງ່າຍ ແລະ ໃຫຍ່ໄວ. ສ່ວນອີກ 1 ໜອງ ແມ່ນໄດ້ລ້ຽງປາດຸກ ເຊິ່ງເປັນປາທີ່ທົນທານຕໍ່ສະພາບແວດລ້ອມ ແລະ ເປັນທີ່ນິຍົມບໍລິໂພກຂອງຄົນໃນທ້ອງຖິ່ນ. ດ້ວຍຄວາມເອົາໃຈໃສ່ໃນທຸກຂັ້ນຕອນ, ນັບຕັ້ງແຕ່ການກະກຽມໜອງ, ການຄັດເລືອກສາຍພັນປາ, ການໃຫ້ອາຫານທີ່ຖືກຕ້ອງຕາມຫຼັກການ ແລະ ການເບິ່ງແຍງຮັກສາຄຸນນະພາບນ້ຳຢ່າງສະໝ່ຳສະເໝີ, ເຮັດໃຫ້ປາ ມີການຈະເລີນເຕີບໂຕທີ່ດີ, ແຂງແຮງ ແລະ ມີຄຸນນະພາບ. ສິ່ງນີ້ສົ່ງຜົນໃຫ້ຜົນຜະລິດເປັນທີ່ຕ້ອງການຂອງຕະຫຼາດ ທັງໃນເມືອງງາ ແລະ ເຂດໃກ້ຄຽງ.

ຈາກຄວາມພາກພຽນພະຍາຍາມດັ່ງກ່າວ, ໃນແຕ່ລະປີ ຄອບຄົວຂອງ ທ່ານ ຄຳພັດ ພອນປະເສີດ ສາມາດສ້າງກຳໄລສຸດທິຈາກການຂາຍປາ ໄດ້ສູງເຖິງ 300 ລ້ານກວ່າກີບ, ລາຍຮັບຈຳນວນນີ້ ບໍ່ພຽງແຕ່ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນ ສາມາດສົ່ງເສີມການສຶກສາຂອງລູກຫຼານໄດ້ຢ່າງເຕັມທີ່ ແຕ່ຍັງເປັນການສ້າງແຫຼ່ງອາຫານ ( ໂປຣຕິນ ) ທີ່ສົດໃໝ່ ແລະ ມີຄຸນນະພາບໃຫ້ແກ່ຊຸມຊົນອີກດ້ວຍ.

ສະນັ້ນ, ເລື່ອງລາວຄວາມສໍາເລັດຂອງ ທ່ານ ຄໍາພັດ ພອນປະເສີດ ຈຶ່ງເປັນຕົວຢ່າງ ແລະ ແຮງບັນດານໃຈອັນດີງາມໃຫ້ແກ່ຄອບຄົວອື່ນໆ ທີ່ກຳລັງຊອກຫາຊ່ອງທາງໃນການສ້າງອາຊີບ ແລະ ພັດທະນາເສດຖະກິດຄອບຄົວຂອງຕົນເອງໃຫ້ມີຄວາມຍືນຍົງ, ນີ້ຄືຜົນຂອງຄວາມດຸໝັ່ນ, ການຮູ້ຈັກນຳໃຊ້ທ່າແຮງຂອງຕົນເອງ ແລະ ການສຶກສາຫາ ຄວາມຮູ້ໃໝ່ໆ ສາມາດນຳພາໄປສູ່ຄວາມສຳເລັດ ແລະ ຄວາມຢູ່ດີກິນດີໄດ້ຢ່າງແທ້ຈິງ.
