ກອງທຶນການເງິນສາກົນ ຫຼື ໄອເອັມເອັຟ ( IMF ) ໄດ້ປັບຫຼຸດການຄາດຄະເນການເຕີບໂຕເສດຖະກິດໂລກ ປີ 2025 ເຫຼືອ 2,8% ຈາກເດີມ 3,3% ທ່າມກາງຄວາມບໍ່ແນ່ນອນທາງການຄ້າໂລກທີ່ເພີ່ມຂຶ້ນ.
ໄອເອັມເອັຟ ໄດ້ເຜີຍແຜ່ລາຍງານທ່າອ່ຽງເສດຖະກິດໂລກ ( WEO ) ສະບັບຫຼ້າສຸດ ໃນວັນທີ 22 ເມສາ ໂດຍນໍາສະເໜີການຄາດຄະເນເສດຖະກິດໂລກ ໃນ 3 ຄວາມເປັນໄປໄດ້ທີ່ແຕກຕ່າງກັນ ເພື່ອສະທ້ອນຄວາມບໍ່ແນ່ນອນຂອງນະໂຍບາຍການຄ້າໂລກທີ່ເພີ່ມຂຶ້ນຢ່າງໄວວາ ໂດຍເປັນຄັ້ງທຳອິດໃນຮອບຫຼາຍປີ ທີ່ ໄອເອັມເອັຟ ອອກຄາດຄະເນເສດຖະກິດໂລກມາເປັນຫຼາຍຄວາມເປັນໄປໄດ້ ເຊິ່ງປະກອບດ້ວຍ:
ຄາດຄະເນອ້າງອີງປະເມີນວ່າ ເສດຖະກິດໂລກຈະເຕີບໂຕທີ່ 2,8% ໃນປີ 2025 ແລະ 3,0% ໃນປີໜ້າ.
ຄາດຄະເນກ່ອນ 2 ເມສາ 2025 ( ວັນທີ ອາເມຣິກາ ປະກາດຂຶ້ນພາສີ ) ຄາດວ່າເສດຖະກິດໂລກຈະເຕີບໂຕ 3,2% ທັງໃນປີນີ້ ແລະ ປີໜ້າ.
ຄາດຄະເນ ຫຼັງ 9 ເມສາ ( ວັນທີ ອາເມຣິກາ ຊະລໍການບັງຄັບໃຊ້ພາສີອອກໄປ 90 ວັນ ) ຄາດວ່າເສດຖະກິດໂລກ ຈະຂະຫຍາຍຕົວ 2,8% ໃນປີນີ້ ແລະ 2,9% ໃນປີໜ້າ.
ການປະເມີນເສດຖະກິດໂລກຂອງ ໄອເອັມເອັຟ ເມື່ອເດືອນມັງກອນຜ່ານມາ ປະເມີນວ່າເສດຖະກິດໂລກ ຂະຫຍາຍຕົວ 3,3% ໃນປີນີ້ ແລະ 3,2% ໃນປີໜ້າ.
