ໃນວັນທີ 8 ເມສາ 2025 — ພະນັກງານຈາກພະແນກອຸດສາຫະກຳ ແລະ ການຄ້າ, ຂະແໜງການຄ້າພາຍໃນ ສົມທົບ ກັບພະແນກສາທາລະນະສຸກ, ຂະແໜງອາຫານ ແລະ ຍາ ໄດ້ເຂົ້າລົງກວດກາຮ້ານຈຳໜ່າຍອາຫານແຊ່ແຂງ ທີ່ຕະຫຼາດວັງວິວ ແລະ ຕະຫຼາດສີດອນມີ ແລະ ຮ້ານຂາຍເຂດຕະຫຼາດ ຜົນການກວດກາຢືນຢັນວ່າ ມີການພົບ ສານຟໍມາລິນ (formalin) ໃນຜະລິດຕະພັນອາຫານແຊ່ແຂງຈຳນວນ 03 ລາຍການ.
ໃນນັ້ນ ມີປາມຶກກອບ ຈຳນວນ 12,7 ກິໂລກຼາມ ມູນຄ່າ 826,000 ກີບ, ຫຍໍຂາວ ຈຳນວນ 33 ກິໂລກຼາມ ມູນຄ່າ 3,630,000 ກີບ, ໄສ້ຕັນ 2 ກິໂລກຼາມ ມູນຄ່າ 200,000 ກີບ.
ສານພໍມາລິນ ແມ່ນສານເຄມີທີ່ໃຊ້ໃນການຖະນອມອາຫານ ແລະ ຮັກສາສະພາບສົດຂອງຊິ້ນສ່ວນສັດ ແຕ່ບໍ່ໄດ້ຮັບອະນຸຍາດໃຫ້ໃຊ້ໃນອາຫານ ເພາະສາມາດສົ່ງຜົນເສຍຕໍ່ສຸຂະພາບ ເຊັ່ນ ເຮັດໃຫ້ເກີດອາການປວດທ້ອງ ຫຼື ລະຄາຍເຄືອງພາຍໃນຮ່າງກາຍ. ການບໍລິໂພກອາຫານທີ່ມີສານດັ່ງກ່າວເປັນປະຈຳ ຍັງອາດເຮັດໃຫ້ເກີດພະຍາດຮ້າຍແຮງຈຳພວກມະເຮັງໄດ້.
ທາງພະນັກງານໄດ້ດຳເນີນການຢຶດອາຫານແຊ່ແຂງທີ່ພົບສານດັ່ງກ່າວທັງໝົດ ເພື່ອເອົາໄປທຳລາຍ ແລະ ເຮັດບົດບັນທຶກກັບທາງຮ້ານທີ່ນຳເອົາມາຂາຍເປັນການກ່າວເຕືອນ.
