ກອງປະຊຸມໃຫຍ່ ຜູ້ແທນອົງຄະນະພັກເມືອງຈອມເພັດ ແຂວງຫຼວງພະບາງ ຄັ້ງທີ VIII ໄດ້ສຳເລັດໃນຕອນເຊົ້າຂອງວັນທີ 7 ມີນາ 2025 ນີ້ ພາຍຫຼັງດໍາເນີນເປັນເວລາໜຶ່ງວັນເຄີ່ງ, ຢູ່ສະໂມສອນໃຫຍ່ຂອງເມືອງ; ກອງປະຊຸມໃຫຍ່ ໄດ້ພ້ອມກັນຄົ້ນຄວ້າຢ່າງເລິກເຊິ່ງ ແລະໄດ້ຮັບຮອງເອົາຢ່າງເປັນເອກະພາບ ຕໍ່ເນື້ອໃນລາຍງານການເມືອງ ຂອງຄະນະບໍລິຫານງານພັກເມືອງ ຄັ້ງທີ VII ເຊີ່ງໄດ້ສະຫຼຸບຕີລາຄາໝາກຜົນ ແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງ ກໍຄືມະຕິ VIII ຂອງອົງຄະນະພັກແຂວງ ແລະມະຕິ XI ຂອງພັກ ເປັນຕົ້ນ ບັນດາຜົນສໍາເລັດ ຂອງທຸກຂົງເຂດວຽກງານ ໃນ 5 ປີຜ່ານມາ ອັນໄດ້ສ້າງພື້ນຖານ ແລະທ່ວງທ່າອັນໃໝ່ ໃຫ້ເມືອງຈອມເພັດ ສືບຕໍ່ພັດທະນາຖືກຕ້ອງຕາມທິດທາງ ແລະຈຸດໝາຍທີ່ວາງໄວ້.
ພ້ອມກັນນັ້ນ ໄດ້ມີການປະກອບຄໍາເຫັນ ກ່ຽວກັບຂໍ້ຄົງຄ້າງ ໃນການນໍາພາ-ຊີ້ນໍາ ຂອງຄະນະບໍລິຫານງານພັກເມືອງ ກໍຄືຄະນະພັກແຕ່ລະຂັ້ນ, ຊຶ່ງເປັນສາເຫດ ເຮັດໃຫ້ການຈັດຕັ້ງປະຕິບັດໜ້າທີ່ວຽກງານບາງດ້ານ ບໍ່ບັນລຸຕາມລະດັບຄາດໝາຍ ທີ່ມະຕິກອງປະຊຸມໃຫຍ່ ຄັ້ງທີ VII ອົງຄະນະພັກເມືອງວາງອອກ, ເຊິ່ງໄດ້ສະແດງອອກ ໃນດ້ານອ່ອນ-ຂໍ້ຄົງຄ້າງ; ທີ່ໄດ້ເລັ່ງທວງໃຫ້ມີມາດຕະການທີ່ເໝາະສົມ ເພື່ອດໍາເນີນການແກ້ໄຂ ຂໍ້ຄົງຄ້າງຜ່ານມາຢ່າງຈິງຈັງ ແນໃສ່ສ້າງການຫັນປ່ຽນ ຢ່າງແຂງແຮງ ແລະເລິກເຊິ່ງ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ມີຜົນສໍາເລັດ.
ກອງປະຊຸມໃຫຍ່ ໄດ້ຮັບຮອງເອົາ ຂໍ້ສະຫຼຸບ 4 ປະການ ເຊິ່ງເປັນບົດຮຽນທີ່ຖອດຖອນໄດ້ ຈາກພຶດຕິກໍາ ແຫ່ງການນໍາພາຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງ VII ຂອງອົງຄະນະພັກເມືອງ ແລະຜົນງານ 37 ປີ ແຫ່ງການປ່ຽນແປງໃໝ່ ຢູ່ເມືອງຈອມເພັດ. ພ້ອມກັນນັ້ນ ກໍໄດ້ກໍານົດເອົາ ທິດທາງລວມ ແລະ 8 ຄາດໝາຍສູ້ຊົນຕົ້ນຕໍ ແຕ່ປີ 2025-2029. ພ້ອມດຽວກັນນັ້ນ ຜູ້ແທນກອງປະຊຸມໃຫຍ່ ໄດ້ພ້ອມກັນໃຊ້ສິດ ປະຊາທິປະໄຕ ຂອງຕົນປ່ອນບັດເລືອກຕັ້ງເອົາຄະນະບໍລິຫານງານພັກເມືອງ ຊຸດທີ VIII ຈຳນວນ 27 ສະຫາຍ, ຍິງ 05 ສະຫາຍ, ທັງປ່ອນບັດຄັດເລືອກເອົາຜູ້ແທນສົມບູນ ແລະສຳຮອງ ຕາງໜ້າອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ແທນ ອົງຄະນະພັກແຂວງ ຄັ້ງທີ IX, ຜ່ານການປ່ອນບັດ ແລະດໍາເນີນກອງປະຊຸມຄັ້ງປະຖົມມະລຶກ ໄດ້ເປັນເອກະສັນກັນຢ່າງສົມບູນ ເລືອກເອົາຄະນະປະຈຳພັກເມືອງ 9 ສະຫາຍ, ຍິງ 2 ສະຫາຍ.
ໃນນັ້ນ ໄດ້ເລືອກເອົາ , ສະຫາຍ ນາງ ສົມສະໜອນ ຄຳສຸກສະຫວັດ ແລະສະຫາຍ ສອນເພັດ ພົງສຸທິ ເປັນຮອງເລຂາຄະນະບໍລິຫານງານພັກເມືອງ, ທັງເລືອກເອົາ ສະຫາຍ ສົມເພັດ ສຸຂະເສີມ ເປັນປະທານກວດກາພັກເມືອງ, ສະຫາຍ ບຸນເລີດ ບົວລະພັນ ແລະສະຫາຍ ຈັນດີ ບຸນຍະສອນ ເປັນຮອງປະທານກວດກາພັກເມືອງ.
ຕອນທ້າຍສະຫາຍ ຄຳຂັນ ຈັນທະວີສຸກ ກຳມະການສູນກາງພັກ, ເລຂາຄະນະບໍລິຫານງານພັກແຂວງ ໄດ້ຕີລາຄາສູງ ຕໍ່ໝາກຜົນແຫ່ງການຈັດຕັ້ງປະຕິບັດ ມະຕິກອງປະຊຸມໃຫຍ່ຂອງພັກແຕ່ລະຂັ້ນ, ພ້ອມທັງໃຫ້ທິດຊີ້ນໍາ ເພື່ອສືບຕໍ່ເສີມຂະຫຍາຍດ້ານດີທີ່ຕັ້ງໜ້າ ແລະປັບປຸງແກ້ໄຂຂໍ້ຄົງຄ້າງແຕ່ລະດ້ານໃຫ້ໝົດໄປ; ໂດຍຮຽກຮ້ອງໃຫ້ຄະນະບໍລິຫານງານພັກເມືອງຊຸດໃໝ່ ສືບຕໍ່ນໍາພາ-ຊີ້ນໍາ ໃນການຈັດຕັ້ງຜັນຂະຫຍາຍ ແລະປະຕິບັດມະຕິກອງປະຊຸມໃຫຍ່ອົງຄະນະພັກເມືອງຊຸດນີ້ ໃຫ້ເຂົ້າສູ່ຊີວິດຕົວຈິງ ແລະມີຜົນສໍາເລັດ ຕາມລະດັບຄາດໝາຍ ທີ່ວາງໄວ້.
ຂ່າວ: ຫຼວງພະບາງ
