ໃນວັນທີ 24 ກຸມພາຜ່ານມາ, ຢູ່ທີ່ຫ້ອງປະຊຸມຫ້ອງວ່າການເມືອງແກ່ນທ້າວ ແຂວງໄຊຍະບູລີ ໄດ້ມີພິທີເຊັນສັນຍາ ການລົງທຶນປູກພືດລະດູແລ້ງ (ໝາກຖົ່ວເຫຼືອງ) ເປັນສິນຄ້າ ສົກປີ 2024-2025 ລະຫວ່າງ ທ່ານ ໂອລາ ໄພວົງ ຫົວໜ້າຫ້ອງການແຜນການ ແລະ ການລົງທຶນ ເມືອງ ກັບ ທ່ານ ປະສິດ ຖະໜອມສຸກ ໃນນາມບໍລິສັດ ວຽງແກ້ວ ພັດທະນາ ແລະ ສົ່ງເສີມກະສິກໍາ ຂາອອກ-ຂາເຂົ້າ ຈໍາກັດ. ໂດຍຊ່ອງໜ້າທ່ານ ສີຄານ ແກ່ນມະນີ ຮອງເລຂາພັກເມືອງ, ມີຄະນະຮັບຜິດຊອບຄຸ້ມຄອງການປູກພືດເປັນສິນຄ້າ ແລະ ຕາງໜ້າບໍລິສັດ ເຂົ້າຮ່ວມ.
ສັນຍາ ການລົງທຶນປູກຖົ່ວເຫຼືອງ ເປັນສິນຄ້າ ສົກປີ 2024-2025 ມີຈຸດປະສົງ ຜັນຂະຫຍາຍແຜນພັດທະນາເສດຖະກິດ-ສັງຄົມຂອງເມືອງ ດ້ານກະສິກໍາ ໃນການຜະລິດເປັນສິນຄ້າເພື່ອສົ່ງອອກ, ເພື່ອເຮັດໃຫ້ປະຊາຊົນໄດ້ມີວຽກເຮັດງານທໍາ, ມີລາຍຮັບ, ມີຊີວິດການເປັນຢູ່ດີຂຶ້ນເທື່ອລະກ້າວ ແລະ ເຊົ່າດິນນາຂອງປະຊາຊົນ ຢູ່ຂອບເຂດບ້ານຈອມແກ້ວ ເນື້ອທີ່ທັງໝົດ 72.44 ເຮັກຕາ ປູກພືດລະດູແລ້ງ (ໝາກຖົ່ວເຫຼືອງ) ເພື່ອສົ່ງຜົນຜະລິດອອກໄປ ສປ ຈີນ.
ການມອບທຶນພັດທະນາ 1.500.000 ກີບ/ເຮັກຕາ/ປີ (1 ລະດູການ) ລວມເປັນເງິນທັງໝົດ 108.660.000 ກີບຕໍ່ປີ. ໃນນີ້, ບ້ວງແຂວງ 50%, ເມືອງ 24%, ບ້ານ 13% ແລະ ບ້ວງວິຊາການ 13%. ກໍານົດເວລາຂອງສັນຍາ 4 ເດືອນ ເລີ່ມແຕ່ເດືອນ ທັນວາ 2024 ຫາ ເດືອນ ເມສາ 2025.
(ຂ່າວ: ແກ່ນທ້າວ).
