ເປີດຕະຫຼາດນັດວາງສະແດງ ຂາຍສິນຄ້າ ຫັດຖະກຳ ແລະ ອຸດສາຫະກຳ ເມືອງນາຊາຍທອງ

ໃນວັນທີ 13 ກຸມພາ 2025 ໄດ້ມີພິທີເປີດງານ ຕະຫຼາດນັດວາງສະແດງ ຂາຍສິນຄ້າ ຫັດຖະກຳ ແລະ ອຸດສາຫະກຳ ຄັ້ງທີ 28 ປະຈໍາປີ 2025 ຂອງເມືອງນາຊາຍທອງ ນະຄອນຫຼວງວຽງຈັນ ເຂົ້າຮ່ວມຂອງທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ, ມີທ່ານເຈົ້າເມືອງ, ພະແນກການອ້ອມຂ້າງ ຊາວຄ້າຂາຍ ແລະ ພາກທຸລະກິດເຂົ້າຮ່ວມ.

ທ່ານ ສຸລິວັນ ພົມມະຫາໄຊ ເຈົ້າເມືອງນາຊາຍທອງໄດ້ກ່າວວ່າ: ການຈັດງານຕະຫຼາດນັດໃນຄັ້ງນີ້ ແມ່ນຂະບວນການສຳຄັນໜຶ່ງໃນການຊຸກຍູ້ປະຕິບັດແຜນພັດທະນາເສດຖະກິດ-ສັງຄົມ ຂອງເມືອງນາຊາຍທອງ ແຕ່ປີ 2025-2029 ຍົກສູງຄວາມສາມາດນໍາພາ ຂອງອົງຄະນະພັກເມືອງ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານພັດທະນາຕາມທິດຜັນຂະຫຍາຍເສດຖະກິດ ເອກະລາດ ເປັນເຈົ້າຕົນເອງ, ສົ່ງເສີມການຜະລິດກະສິກໍາສະອາດ, ຫັດຖະກຳ, ອຸດສະຫະກໍາປຸງແຕ່ງ ຕິດພັນກັບການທ່ອງທ່ຽວສີຂຽວ ແລະ ຍືນຍົງ ແນໃສ່ກະຕຸກຊຸກຍູ້ການຂຸດຄົ້ນ ແລະ ນຳໃຊ້ທ່າແຮງບົ່ມຊ້ອນດ້ານຕ່າງໆເຂົ້າໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກ ເມືອງນາຊາຍທອງ ດ້ວຍການຫັນເອົານະໂຍບາຍ 3 ສ້າງເຂົ້າສູ່ລວງເລິກ, ທັງເປັນການເປີດໂອກາດໃຫ້ບັນດາຄອບຄົວຕົວແບບ, ຜະລິດສິນຄ້າກະສິກຳ, ຫັດຖະກຳ, ອຸດສາຫະກຳ, ຕາມທິດ 1 ບ້ານ​ 1 ຜະລິດຕະພັນ 1 ເມືອງ ບໍ່ໃຫ້ຫຼຸດ 5 ຜະລິດຕະພັນ, ໄດ້ແລກປ່ຽນບົດຮຽນ ແລກປ່ຽນປະສົບການ, ເຕັກນິກ, ວິທະຍາສາດ ແລະ ເຕັກໂນໂລຢີນໍຳກັນເພື່ອພ້ອມກັນຍົກລະດັບສະມັດຕະພາບການຜະລິດສິນຄ້າໃຫ້ນັບມື້ນັບສູງຂຶ້ນທັງດ້ານປະລິມານ ແລະ ຄຸນນະພາບ

ທ່ານ ພູວອນ ພົງລາດແກ້ວ ຮອງເຈົ້າເມືອງນາຊາຍທອງ  ກ່າວວ່າ: ເມືອງນາຊາຍທອງມີ 6 ກຸ່ມ 54 ບ້ານ ມີປະຊາກອນທັງໝົດ 92.910 ຄົນ, ຍິງ 46.045 ຄົນ ງານຕະຫຼາດນັດຄັ້ງທີ 28 ມີຫ້າງຮ້ານເຂົ້າຮ່ວມ 345 ຮ້ານ ໃນນັ້ນປະກອບມີ ກົມກອງລວມໝູ່ ແລະ ຫ້ອງການອ້ອມຂ້າງ ເມືອງມີ 10 ຮ້ານ, ຜະລິດຕະພັນໂອດ໊ອບພາຍໃນເມືອງ 5 ຮ້ານ, ຄອບຄົວຕົວແບບເປັນສິນຄ້າ 50 ຮ້ານ, ຜົນຜະລິດຂອງປະຊາຊົນພາຍໃນ 54ບ້ານມີ 40 ຮ້ານ, ໂຮງຈັກ-ໂຮງງານ, ໂຮງຊ່າງຫັດຖະກໍາ 12 ຮ້ານ, ໂຮງງານເຟີນິເຈີ້ 1 ຮ້ານ, ບໍລິສັດຕົວແທນຈໍາໜ່າຍສິນຄ້າຜະລິດຕະພັນມີ 13 ຮ້ານ, ຜະລິດຕະພັນໂອດ໊ອບຕ່າງເມືອງມີ 1 ຮ້ານ,

ຜະລິດຕະພັນໂອດ໊ອບຕ່າງແຂວງມີ 3 ຮ້ານ, ຜະລິດຕະພັນສິນຄ້າຕ່າງເມືອງມີ 20 ຮ້ານ, ຕ່າງແຂວງມີ 15 ຮ້ານ, ບັນດາຮ້ານບໍລິການ ແລະ ຂາຍສິນຄ້າທົ່ວໄປມີ 105 ຮ້ານ, ຮ້ານກີນດື່ມຮ້ານອາຫານມີ 40 ຮ້ານ ແລະ ຮ້ານເຂົ້າຫຼາມ, ປີ້ງໄກ່ 30 ຮ້ານ. ເຊີ່ງມູນຄ່າສິນຄ້າລວມພາຍໃນງານມີທັງໝົດ 8,5 ຕື້ກວ່າກີບ ເມື່ອທຽບໃສ່ປີ2024 ເຫັນວ່າມີມູນຄ່າເພີ່ມຂຶ້ນ 5% ນອກຈາກການວາງສະແດງ ແລະ ຂາຍສິນຄ້າແລ້ວ ພາຍໃນງານຍັງມີກິດຈະກໍາຕ່າງໆ ເປັນຕົ້ນແມ່ນ ການເສບງັນມ່ວນຊື່ນ, ລໍາວົງສາມັກຄີ, ການແຂ່ງຂັນກີລາເປຕັງ, ສິນລະປະວັນນະຄະດີ, ມີຊີງຊ້າມ້າໝູນ  ແລະ ການລະຫຼິ້ນອື່ນໆຕະຫຼອດງານ.

ງານຕະຫຼາດນັດວາງສະແດງ ຂາຍສິນຄ້າ ຫັດຖະກຳ ແລະ ອຸດສາຫະກຳ ເມືອງນາຊາຍທອງ ແມ່ນໄດ້ດໍາເນີນ ໃນລະຫວ່າງ ວັນທີ 13-17 ກຸມພາ 2025 ທີ່ເດີນຂ້າງສະຖານີໄຟຟ້າ ບ້ານແຈ້ງສະຫວ່າງ ເມືອງນາຊາຍທອງ ນະຄອນຫຼວງວຽງຈັນ.