ກອງປະຊຸມ ໃຫຍ່ສະມາຊີກພັກ ຄະນະພັກຮາກຖານ ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ຄັ້ງທີ IV ໄດ້ຈັດຂຶ້ນໃນວັນທີ 4 ກຸມພາ 2025 ທີ່ຫໍປະຊຸມແຫ່ງຊາດເປັນປະທານຂອງສະຫາຍ ອານຸພາບ ຕຸນາລົມ ຄະນະເລຂາທິການສູນກາງພັກ,ເລຂາຄະນະບໍລິຫານງານພັກ ນະຄອນຫຼວງວຽງຈັນ, ທ່ານ ນາງ ວັນມະນີ ພິມມະສານ ກໍາມະການພັກ ນະຄອນຫຼວງວຽງຈັນ ເລຂາຄະນະພັກ ຮາກຖານ ພະແນກ ອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ມີບັນດາສະຫາຍ ສະມາຊິກພັກສົມບູນ, ສໍາຮອງ ແລະ ແຂກຖືກເຊີນເຂົ້າຮ່ວມ. ທີ່ປະຊຸມສະມາຊິກພັກ ໄດ້ເຫັນດີເປັນເອກະພາບລົງຄະແນນສຽງ ຮັບຮອງ ສະຫາຍ ນາງ ວັນມະນີ ພີມມະສານ ເປັນ ເລຂາຄະນະພັກຮາກຖານພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນອີກສະໄໝ.
ກອງປະຊຸມ ໄດ້ດໍາເນີນປ່ອນບັດ ເລືອກຕັ້ງເອົາຄະນະພັກຮາກຖານ ຊຸດໃໝ່ 7 ສະຫາຍໄດ້ແກ່ ສະຫາຍ ນາງ ວັນມະນີ ພີມມະສານ, ສະຫາຍ ນາງ ທັດດາວອນ ສີກະເສີມຄ່ຽມ, ສະຫາຍ ນາງ ໄຊນາລອນ ຈຸນດາຣາ, ສະຫາຍ ຄໍາພຸດ ສີມມາລາວົງ ສະຫາຍ ດ່າຍ ສີຫາລາດ, ສະຫາຍ ເວດມາລາ ບົວລະພັນ ແລະ ສະຫາຍ ມະໂມສັກ ໄຊສີລິກຸນ
ກອງປະຊຸມຄັ້ງປະຖົມມະລືກຂອງຄະນະພັກຮາກຖານຊຸດໃໝ່ ໄດ້ພ້ອມກັນຄົ້ນຄວ້າຕົກລົງເປັນເອກະພາບ ເລືອກເອົາເລຂາ, ຮອງເລຂາ ແລະ ກໍາມະການພັກດັງນີ້
ສະຫາຍ ນາງ ວັນມະນີ ພີມມະສານ ເປັນເລຂາຄະນະພັກ, ສະຫາຍ ນາງ ທັດດາວອນ ສີກະເສີມຄ່ຽມ ເປັນຮອງເລຂາ.
ກອງປະຊຸມຄັ້ງປະຖົມມະລືກ ໄດ້ປ່ອນບັດເລືອກຕັ້ງເອົາປະທານ, ຮອງປະທານກວດກາ ພັກດັງນີ້ ສະຫາຍ ນາງ ທັດດາວອນ ສີກະເສີມຄ່ຽມ ເປັນປະທານກວດກາພັກ, ສະຫາຍນາງ ຄໍາສະຫວັດ ສີສຸລາດ, ສະຫາຍ ດ່າຍ ສີຫາລາດ ເປັນຮອງປະທານກວດກາພັກ.
ທີ່ປະຊຸມຍັງໄດ້ ເລືອກເອົາ ຜູ້ແທນສົມບູນ ແລະ ສໍາຮອງ ເຂົ້າຮ່ວມກອງປະຊຸມໃຫຍ່ ອົງຄະນະພັກ ນະຄອນຫຼວງວຽງຈັນ ດັ່ງນີ້: ສະຫາຍ ນາງ ທັດດາວອນ ສີກະເສີມຄ່ຽມ, ສະຫາຍ ນາງ ໄຊນາລອນ ຈຸນດາຣາ, ສະຫາຍ ຄໍາພຸດ ສີມມາລາວົງ, ສະຫາຍ ດ່າຍ ສີຫາລາດ, ສະຫາຍ ເວດມາລາ ບົວລະພັນ, ສະຫາຍ ສຸລິຍາ ອຸດົມນະຄອນສີ, ສະຫາຍ ນາງ ຄໍາສະຫວັດ ສີສຸລາດ, ຜູ້ແທນສໍາຮອງ 1ສະຫາຍຄື ສະຫາຍ ມະໂນສັກ ໄຊສິລິກຸນ.
ໃນທີ່ປະຊຸມ ສະຫາຍ ອານຸພາບ ຕຸນາລົມ ຄະນະເລຂາທິການສູນກາງພັກ,ເລຂາຄະນະບໍລິຫານງານພັກ ນະຄອນຫຼວງວຽງຈັນ ໄດ້ກ່າວມີຄໍາເຫຫັນວ່າ: ຄະນະພັກຮາກຖານຊຸດເກົ່າ ໄດ້ຕີລາຄາຄືນຜົນງານການເຄື່ອນໄຫວການຊີ້ນຳໆພາຂອງຕົນຄົບຮອບໄລຍະ 5 ປີຜ່ານມາ ແລະ ໄດ້ເລືອກເອົາຄະນະພັກຮາກຖານຊຸດໃໝ່ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງຄະນະພັກຮາກຖານອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໃຫ້ປະກົດຜົນເປັນຈິງ, ຂ້າພະເຈົ້າ ຂໍເນັ້ນໜັກບາງທິດຊີ້ນຳເພື່ອໃຫ້ຄະນະພັກຮາກຖານຕ້ອງເອົາໃຈໃສ່ ດັ່ງນີ້ :
- ໃຫ້ສືບຕໍ່ເອົາໃຈໃສ່ສຶກສາອົບຮົມການເມືອງ – ແນວຄິດ ແລະ ຖືເປັນກົກ, ໃຫ້ເປັນວຽກຕ້ອງເຮັດກ່ອນໝູ່ ແລະເປັນຄວາມຮັບຜິດຊອບໂດຍກົງຂອງຄະນະພັກທຸກຂັ້ນ, ແນໃສ່ໃຫ້ສະມາຊິກພັກ, ພະນັກງານຮັບຮູ້, ເຊື່ອມຊືມ, ເຂົ້າໃຈຖືກຕ້ອງມີຄວາມເຊື່ອໝັ້ນ ແລະ ຕື່ນຕົວກຽມພ້ອມຫັນທິດລົງຮາກຖານປະຕິບັດວຽກງານ 3 ສ້າງ ເພື່ອພັດທະນານະຄອນຫຼວງວຽງຈັນໃຫ້ເປັນນະຄອນຫຼວງທີ່ມີຄວາມສີວິໄລກ້າວໜ້າ.
- ໃຫ້ເອົາໃຈໃສ່ຮັກສາສະຖຽນລະພາບທາງດ້ານເສດຖະກິດໃຫ້ໝັ້ນຄົງ, ບໍ່ໃຫ້ມີຜົນກະທົບໄປສູ່ບັນຫາອື່ນທີ່ຈະກາຍເປັນການຫຍໍ້ທໍ້ໃນສັງຄົມ, ຮັບປະກັນໃຫ້ສັງຄົມມີຄວາມສະຫງົບດ້ວຍການໃຫ້ຜູ້ບໍລິໂພກໄດ້ຮັບຄວາມເປັນທຳທາງດ້ານລາຄາ, ປະລິມານ, ຄຸນນະພາບ ແລະ ທັງເປັນການປະຕິບັດພາລະບົດບາດຂອງຂະແໜງການໃນວຽກງານຄຸ້ມຄອງລາຄາສິນຄ້າ ໂດຍສະເພາະແມ່ນສິນຄ້າທີ່ກະທົບໄວຕໍ່ຊີວິດການເປັນຢູ່ຂອງປະຊາຊົນ ເປັນຕົ້ນແມ່ນ : ສິນຄ້າປະເພດສະບຽງອາຫານ ຫຼີກລ້ຽງການສວຍໂອກາດຂຶ້ນລາຄາ, ຮັບປະກັນການຕອບສະໜອງໃຫ້ພຽງພໍກັບຄວາມຕ້ອງການ. ເອົາໃຈໃສ່ຄຸ້ມຄອງຫົວໜ່ວຍທຸລະກິດໂຮງງານອຸດສາຫະກຳປຸງແຕ່ງ, ການນຳເຂົ້າ – ສົ່ງອອກສິນຄ້າ, ການສົ່ງເສີມສິນຄ້າໜຶ່ງເມືອງໜຶ່ງຜະລິດຕະພັນ, ມີຈຸດສຸມເຮັດໃຫ້ມີການປ່ຽນແປງໃນທິດທີ່ຕັ້ງໜ້າຢ່າງແທ້ຈິງ.
- ຄະນະພັກຕ້ອງໄດ້ເປັນແບບຢ່າງນຳໜ້າຫັນທິດລົງຮາກຖານປະຕິບັດວຽກງານ 3 ສ້າງ ໃຫ້ແຂງແຮງກ້າຄິດກ້າເຮັດກ້າຮັບຜິດຊອບ ແລະ ມອບໝາຍໃຫ້ເມືອງ ແລະ ບ້ານ ນຳພາຈັດຕັ້ງປະຕິບັດ ເພື່ອເຮັດໃຫ້ຂະບວນການຜະລິດຕະພັນ ໜຶ່ງເມືອງ ໜຶ່ງຜະລິດຕະພັນ ຕິດພັນກັບການຊຸກຍູ້ສົ່ງເສີມ 1 ບ້ານ 1 ຜະລິດຕະພັນ ແລະ 1 ເມືອງບໍ່ໃຫ້ຫຼຸດ 5 ຜະລິດຕະພັນ ຕາມທີ່ຄະນະພັກນະຄອນຫຼວງວາງໄວ້.
- ສຳລັບການກໍ່ສ້າງ, ປັບປຸງພັກຕ້ອງຖືເອົາຄຸນນະພາບເປັນກົກ. ສະນັ້ນ, ຕ້ອງເອົາໃຈໃສ່ກໍ່ສ້າງພັກທາງດ້ານການເມືອງ – ແນວຄິດ ແລະ ການຈັດຕັ້ງໃຫ້ໜັກແໜ້ນ ເຂັ້ມແຂງ ຕ້ອງເຂັ້ມງວດປະຕິບັດຫຼັກການລວມສູນປະຊາທິປະໄຕ ເອົາໃຈໃສ່ກວດກາຕຳນິຕົນເອງ ແລະ ຕິຊົມກັນດ້ວຍຄວາມຈິງໃຈ ເພື່ອພ້ອມກັນກ້າວໜ້າໃນຕໍ່ໜ້ານີ້ ຕ້ອງຊຸກຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ ໃຫ້ເປັນຂະບວນຟົດຟື້ນກວ່າເກົ່າ ແລະ ເດັດດ່ຽວຕ້ານປະກົດການຫຍໍ້ທໍ້ຕ່າງໆໃນຖັນແຖວສະມາຊິກ – ພະນັກງານ ໃຫ້ໝົດໄປເປັນຕົ້ນແມ່ນພະຍາດອາດຍາສິດຂີ່ຄ້ານມັກງ່າຍ, ເຫີນຫ່າງຈາກມະຫາຊົນ ທີ່ສວຍໂອກາດສໍ້ລາດບັງຫຼວງກຸ່ມກ້ອນ ຄົນເຈົ້າຄົນຂ້ອຍ ເອົາໃຈໃສ່ວຽກງານກວດກາພັກກວດກາລັດ ແລະຖືເປັນຫຼັກການນຳຂອງພັກ. ໃນຕໍ່ໜ້າຕ້ອງສຸມໃສ່ກວດກາການປະຕິບັດມະຕິຄຳສັ່ງຂອງພັກ, ກວດກາໜ່ວຍພັກ, ຍູ້ແຮງວຽກງານການກໍ່ສ້າງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ.
- ສະເໜີປັບປຸງແບບແຜນການນຳພາ ແລະ ວິທີການເຮັດວຽກຂອງຄະນະພັກ ໂດຍສະເພາະແມ່ນຄະນະພັກຮາກຖານຂອງພະແນກອຸດສາຫະກຳ ແລະ ການຄ້າ ຄັ້ງທີ IV ທີ່ຫາກໍໄດ້ຮັບການເລືອກຕັ້ງໃນກອງປະຊຸມໃຫຍ່ໃນຄັ້ງນີ້ ເຊິ່ງເປັນຕົວແທນໃຫ້ແກ່ສະມາຊິກພັກທີ່ມີຄວາມສາມາດ ແລະ ເງື່ອນໄຂຄົບຖ້ວນແມ່ນຜູ້ໄດ້ຮັບໄວ້ວາງໃຈຈາກສະມາຊິກພັກ, ເພີ່ມທະວີຄວາມເປັນປຶກແຜ່ນເປັນແບບຢ່າງນຳໜ້າຍົກສູງຄວາມຮັບຜິດຊອບທາງດ້ານການເມືອງຂອງຕົນ ໃຫ້ສົມກັບຄວາມເຊື່ອໝັ້ນ ແລະ ຄວາມໄວ້ວາງໃຈຂອງສະມາຊິກພັກທັງໝົດທີ່ເຂົ້າຮ່ວມກອງປະຊຸມຄັ້ງນີ້.
- ສະເໜີໃຫ້ລົງເລິກກວດກາຕິດຕາມການເຄື່ອນໄຫວຢ່າງໃກ້ຊິດຕິດແທດ ໃນບັນດາໜ່ວຍພັກລັດວິສາຫະກິດ ແລະ ບໍລິສັດພາຍໃນນະຄອນຫຼວງວຽງຈັນ ທີ່ຂຶ້ນກັບຮາກຖານພັກພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ເພື່ອລີກລ້ຽງປະກົດການຫຍໍ້ທໍ້ທີ່ຈະເກີດຂຶ້ນໃນອານາຄົດ, ຊອກໃຫ້ເຫັນຈຸດອ່ອນຂໍ້ຄົງຄ້າງ ເພື່ອພ້ອມກັນຊອກຫາທາງອອກ ແລະ ວິທີແກ້ໄຂໃຫ້ທັນກັບສະພາບ ແລະ ທັນເວລາ, ສ່ວນຜົນງານທີ່ຍາດມາໄດ້ຂອງບັນດາໜ່ວຍພັກດັ່ງກ່າວ ກໍ່ໃຫ້ມີການຍ້ອງຍໍສັນສະເສີນ ເພື່ອເປັນການສ້າງຂວັນ ແລະ ກຳລັງໃຈໃຫ້ບັນດາພະນັກງານ ແລະ ກຳມະກອນ ມີຄວາມກະຕືລືລົ້ນ ເພື່ອເສີມສ້າງຫົວຄິດປະດິດສ້າງອັນໃໝ່ໆເຂົ້າໃນການຜະລິດສິນຄ້າທີ່ມີຄຸນນະພາບ ອັນເປັນທີ່ຍອມຮັບຂອງຜູ້ຊົມໃຊ້ທັງພາຍໃນ ແລະ ຕ່າງປະເທດ.