ກົມມາດຕະຖານ ແລະ ວັດແທກກະຊວງ ອຸດສາຫະກໍາ ແລະ ການຄ້າ(ອຄ) ຮ່ວມ ກັບ ສະຖາບັນພະລັງງານນິວເຄຍ ກະຊວງວິທະຍາສາດ ສສ ຫວຽດນາມ ໄດ້ຈັດກອງປະຊຸມ ເຜີຍແຜ່ວຽກງານການກວດສອບຄຸນນະພາບແບບບໍ່ທຳລາຍ ແລະ ເຕັກໂນໂລຊີດ້ານລັງສີ ເຂົ້າໃນຂົງເຂດອຸດສາຫະກຳ, ເຂື່ອນໄຟຟ້າ, ໂຮງໄຟຟ້າຄວາມຮ້ອນ, ວິສະວະກຳກໍ່ສ້າງ ແລະ ອື່ນໆ ຂຶ້ນໃນວັນທີ 7 ມັງກອນ 2025 ທີ່ກະຊວງ ອຄ ເປັນປະທານຂອງທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງ ອຄ ເຂົ້າຮ່ວມມີ ທ່ານ ສຸກອາລົມ ໂສສຸພັນ ຮອງຫົວໜ້າກົມມາດຕະຖານ ແລະ ວັດແທກ, ມີຄະນະກົມ,ບັນດາທ່ານ ຊ່ຽວຊານຈາກ ກະຊວງວິທະຍາສາດ ສສ ຫວຽດນາມ ແລະ ຜູ່ຕ່າງໜ້າຈາກພາກລັດ – ທຸລະກິດ ເຂົ້າຮ່ວມ.
ທ່ານ ນາງ ຈັນສຸກ ແສງພະຈັນ ໄດ້ກ່າວວ່າ: ຈຸດປະສົງຂອງກອງປະຊຸມເພື່ອ ນໍາສະເໜີວິທິການກວດສອບ ແລະ ບໍາລຸງຮັກສາ ໂດຍໃຊ້ຫຼັກການກວດສອບແບບບໍ່ທຳລາຍ ແລະ ເຕັກໂນໂລຊີລັງສີ ເຂົ້າໃນການກວດສອບບັນດາຖັງຄວາມດັນ, ທໍ່ສົ່ງຄວາມດັນ, ຖັງຕົ້ມ ແລະ ໂຄງສ້າງເຫຼັກຂະໜາດໃຫຍ່. ນອກຈາກນັ້ນ, ຍັງກວດສອບຄຸນນະພາບ, ກວດສອບຫາເຫຼັກເສີມໃນເບຕົ່ງຂອງ ຂົວ-ທາງ ແລະ ເຂື່ອນໄຟຟ້າ ເພື່ອຮັບປະກັນຖືກຕ້ອງຕາມແບບ, ປອດໄພ ແລະ ສອດຄ່ອງກັບມາດຕະຖານ ແຫ່ງຊາດ, ພາກພື້ນ ແລະ ສາກົນ.
ນັບແຕ່ເລີ່ມສ້າງຕັ້ງສູນກວດສອບຄຸນນະພາບແບບບໍ່ທຳລາຍມາຕັ້ງແຕ່ ປີ 2020 ທີ່ເຄື່ອນໄຫວຕາມພາລະບົດບາດ ໂດຍສະເພາະແມ່ນການກວດສອບແບບບໍ່ທຳລາຍ ແລະ ເຕັກໂນໂລຊີດ້ານລັງສີ ເຂົ້າໃນການກວດສອບເພື່ອຢັ້ງຢືນ, ກວດກາ, ບູລະນະ ແລະ ສ້ອມບໍາລຸງ ບັນດາພາກສ່ວນທີ່ເປັນໂລຫະເປັນ ຕົ້ນແມ່ນ: ທໍ່ສົ່ງຄວາມດັນ, ຖັງຄວາມດັນ, ລະບົບຜະລິດຄວາມຮ້ອນ, ເຢັນ ຂອງໂຮງງານອຸດສາຫະກໍາ ເພື່ອຮັບປະກັນເຖິງຄຸນນະພາບ, ຄວາມປອດໄພ ແລະ ປະສິດທິພາບຂອງການຜະລິດ. ນອກຈາກນັ້ນ, ການກວດສອບແບບບໍ່ທຳລາຍແມ່ນຍັງສາມາດນໍາໃຊ້ເຂົ້າໃນການກວດສອບຫາຄຸນນະ ພາບຂອງໂຄງສ້າງຄອນກຼີດ ໂດຍສະເພາະຂົວ-ທາງ, ທາງລົດໄຟ ແລະ ຕຶກອາຄານຕ່າງໆ, ກວດສອບຫາຈໍານວນເຫຼັກເສັ້ນຢູ່ໃນໂຄງສ້າງ, ກວດສອບຫາຄວາມແຂງຂອງຄອນກຼີດ ໂດຍບໍ່ຈຳເປັນຕ້ອງທຳລາຍຕົວ ຢ່າງ, ບໍ່ຈຳເປັນຕ້ອງເອົາເຂົ້າຫ້ອງທົດລອງ, ທັງປະຢັດເວລາ ແລະ ຕົ້ນທຶນນໍາອີກ. ແຕ່ເນື່ອງຈາກວຽກງານດັ່ງກ່າວເປັນວຽກງານທີ່ໃໝ່ສຳລັບ ສປປ ລາວພວກເຮົາ ແລະ ຫຼາຍຄົນຍັງບໍ່ທັນຮັບຮູ້ ແລະ ເຂົ້າໃຈຕໍ່ວຽກງານດັ່ງກ່າວ. ສະນັ້ນ, ນີ້ຈຶ່ງຖືເປັນໂອກາດດີ ທີ່ທາງຜູ້ຊ່ຽວຊານກໍຄືໂຄງການພະລັງງານປະລໍາມະນູສາກົນ ເພິ່ນໄດ້ມາເຜີຍແຜ່ກ່ຽວກັບຄວາມໝາຍຄວາມສຳຄັນຂອງວຽກງານ ເພື່ອພວກເຮົາສາມາດຮັບຮູ້ ແລະ ເຂົ້າໃຈກ່ຽວກັບວຽກງານດັ່ງກ່າວ ເພື່ອມາພັດທະນາໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງບ້ານເຮົາ.
ທ ່ານກ່າວວ່າ: ວຽກງານການກວດສອບຄຸນນະພາບແບບບໍ່ທຳລາຍ ແລະ ເຕັກໂນໂລຊີດ້ານລັງສີ ແມ່ນເປັນທີ່ນິຍົມ ແລະ ມີຄວາມສຳຄັນຫຼາຍໂດຍສະເພາະແມ່ນວຽກງານການກວດສອບ ໃນສະພາບທີ່ການພັດ ທະນາຂອງເຕັກໂນໂນໂລຊີມີການພັດທະນາຂຶ້ນເລື້ອຍໆ ໃນການກວດສອບຄຸນນະພາບແບບບໍ່ທຳລາຍແມ່ນ 1. ເພື່ອໃຫ້ມີຄວາມປອດໄພ, 2. ເພື່ອຄວບຄຸມຄຸນນະພາບ, 3. ເພື່ອຫຼຸດຜ່ອນຄ່າໃຊ້ຈ່າຍ, 4. ປະຢັດເວລາໃນການກວດສອບ, 5. ເພື່ອເພີ່ມອາຍຸການໃຊ້ງານ ແລະ 6. ເພື່ອປະຕິບັດຕາມມາດຕະ ຖານ ແລະ ລະບຽບການທີ່ກຳນົດ ເພື່ອໃຫ້ບັນດາໂຮງຈັກໂຮງງານມີການກວດສອບ, ສ້ອມແປງ ແລະ ບໍຳລຸງຮັກສາ ເພື່ອຮັບປະກັນເຖິງຄຸນນະພາບ, ຄວາມປອດໄພ, ລວມທັງປະສິດທິພາບຂອງການຜະລິດ.
ຂໍຮຽກຮ້ອງໃຫ້ກົມມາດຕະຖານ ແລະ ວັດແທກ ໃນນາມຜູ້ປະຕິບັດຕົວຈິງຂອງວຽກງານການກວດສອບຄຸນນະພາບແບບບໍ່ທຳລາຍ ຈົ່ງເອົາໃຈໃສ່ໃນການ ຄົ້ນຄ້ວາ, ພັດທະນາວຽກງານດັ່ງກ່າວເພື່ອໃຫ້ສາມາດຈັດຕັ້ງປະຕິບັດ, ບໍລິການ ກວດສອບໃຫ້ໄດ້ມາດ ຕະຖານ, ໂດຍປະສານສົມທົບກັບບັນດາໂຮງງານອຸດສາຫະກຳ, ເຂື່ອນໄຟຟ້າ ແລະ ພາກສ່ວນທີ່ກ່ຽວຂ້ອງ ເພື່ອໃຫ້ວຽກງານການກວດສອບແບບບໍ່ທຳລາຍໄດ້ຈັດຕັ້ງປະຕິບັດໃນການກວດສອບ, ມີການພັດທະນາ ແລະ ນັບມື້ນັບເຕີບໃຫຍ່ ສາມາດຕອບສະໜອງຄວາມຮຽກຮ້ອງຕ້ອງການຂອງບັນດາໂຮງງານອຸດສາຫະກຳ, ໂຄງການກໍ່ສ້າງເຄຫາສະຖານຕ່າງໆ ໃຫ້ສອດຄ່ອງກັບມາດຕະຖານ ແຫ່ງຊາດ, ພາກພື້ນ ແລະ ສາກົນ ໃນ ສປປ ລາວ ຫຼາຍທີ່ສຸດ.
ໃນພາກບ່າຍ ຜູ້ເຂົ້າຮ່ວມທັງໝົດໄດ້ລົງຕິດຕາມພາກປະຕິບັດໂຕຈິງ ໂດຍໄດ້ລົງກວດສອບຄຸນນະພາບຂອງບໍລິສັດເບຍລາວ.
