ກຸ່ມບໍລິສັດ DSK ຈໍາກັດ ໄດ້ເປີດນໍາໃຊ້ອາຄານ ຊະນະແກ້ວ (Sanakeo ) ແລະ ໂຮງງານຜະລິດນໍ້າດື່ມແຮ່ທາດ ມິນີໂຣ (Mineral) ເພື່ອບໍລິການຕໍ່ສັງຄົມທັງພາຍໃນ ແລະ ຕ່າງປະເທດ ດ້ວຍມາດຕະຖານທີ່ດີທີ່ສຸດ ແລະ ເປັນປະໂຫຍດທີ່ສຸດ.
ພິທີເປີດຢ່າງເປັນທາງການໄດ້ຈັດຂຶ້ນໃນວັນທີ 28 ທັນວາ 2024 ທີ່ນະຄອນຫຼວງພະບາງ ໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ຄໍາຂັນ ຈັນທະວີສຸກ ເຈົ້າແຂວງ ແຂວງຫຼວງພະບາງ; ມີບັນດາທ່ານ ລັດທະມົນຕີ, ການນໍາພັກ-ລັດຂັ້ນສູງ, ອະດີດການນໍາພັກ-ລັດ, ບັນດາທ່ານ ການທູດ ຜູ້ສົງກຽດ ແຂກຮັບເຊີນຈາກຫຼາຍພາກສ່ວນເຂົ້າຮ່ວມ.
ໃນວາລະອັນມີຄວາມໝາຍຄວາມສໍາຄັນ ແລະ ເປັນມຸງຄຸນດັ່ງກ່າວ, ທ່ານ ໄຊຍະສິດ ຊະນະເເກ້ວ ຜູ້ອໍານວຍການ ກຸ່ມບໍລິສັດ DSK ຈໍາກັດ ໄດ້ກ່າວໃຫ້ຮູ້ວ່າ: ພາຍໃນກຸ່ມບໍລິສັດ DSK ເເມ່ນມີຫລາຍ ໜ່ວຍງານປະກອບມີ: 1/ ຕະຫລາດໂພສີ ເເຂວງຫຼວງພະບາງ, 2/ ໂຮງເເຮມ ຊະນະເເກ້ວ Flora/, 3/ ໂຮງເເຮມຊະນະເເກ້ວ ບູຕິກ, 4/ ເຂື່ອນໄຟ້າ ນໍ້າຜາໃຫຍ່ ເເຂວງໄຊສົມບູນ, 5/ ໂຮງ ງານເບຕົ່ງ ຫຼັກ 21, 6/ ໂຮງງານນໍ້າດື່ມ ມິນີໂຣ ເເລະ ນໍ້າໝາກໄມ້, 7/ ໂຄງການປູກຕົ້ນໄມ້ ເພື່ອຮັກສາເເຫຼ່ງນໍ້າ, 8/ ອາຄານ Sanakeo.
ໂດຍເປົ້າໝາຍຂອງກຸ່ມບໍລິສັດ ເເມ່ນລົງທຶນໃສ່ການຜະລິດ ເເລະ ການບໍລິການ ໃຫ້ມີຄຸນນະພາບ ມາດຕະຖານສາກົນ ເເລະ ໄດ້ສ້າງວຽກເຮັດງານທໍາ ອາຊີບທີ່ໝັ້ນຄົງຍາວນານ ໃຫ້ຄົນພາຍໃນປະເທດ ຕິດພັນກັບການປົກປັກຮັກສາສະພາບເເວດລ້ອມ ໃຫ້ຍືນຍົງຍາວນານ.
ທ່ານ ຍັງໃຫ້ຮູ້ກ່ຽວກັບກິດຈະການທີ່ເປີດພາຍໃນມື້ດັ່ງກ່າວອີກວ່າ: ອາຄານ Sanakeo ຈຸດປະ ສົງເພື່ອອໍານວຍຄວາມສະດວກໃຫ້ແກ່ການຊົມໃຊ້ສາທາລະນະປະໂຫຍດຕໍ່ສັງຄົມ ເຊິ່ງປະກອບມີ ຫ້ອງ ສໍາມະນາ ສໍາລັບໃຫ້ຂໍ້ມູນຄວາມຮູ້ກ່ຽວກັບນໍ້າແຮ່ທາດ ແລະ ເເຂກຄົນ ພາຍນອກເຂົ້າມາທັດສະນະ ສຶກສາໂຮງງານນໍ້່າແຮ່ທາດ; ມີຫ້ອງປະຊຸມ 6 ຫ້ອງ ເພື່ອຈັດກອງປະຊຸມສໍາຄັນສໍາລັບວິສາຫະກິດ ແລະ ອົງການຈັດຕັ້ງທົ່ວໄປ ສາມາດຮອງຮັບໄດ້ 800 ຄົນ.
ພ້ອມດຽວກັນນັ້ນ, ອາຄານ Sanakeo ຍັງປະກອບດ້ວຍຫ້ອງຈັດງານລ້ຽງ 1 ທີ່ສາມາດ ຮອງ ຮັບໄດ້ເຖິງ 400 ຄົນ, ພື້ນທີ່ເຮັດວຽກຮ່ວມກັນເຊັ່ນ: ຮ້ານອາຫານ ແລະ ຮ້ານກາເຟ ເປັນຕົ້ນ.
ສ່ວນໂຮງງານຜະລິດນ້ຳແຮ່ທາດ Mineral ເປັນຜະລິດຕະພັນທີ່ຜ່ານຂະບວນການຜະລິດ ດ້ວຍ ເຕັກໂນໂລຊີຂັ້ນສູງນັບຈາກແຫຼ່ງນ້ຳຈົນເຖິງຂວດນ້ຳດື່ມ; ກຳລັງການຜະລິດ 12,000 ຕຸກຕໍ່ຊົ່ວໂມງ ເຮັດ ໃຫ້ໂຮງງານສາມາດຈໍາໜ່າຍ ຢູ່ຕະຫຼາດພາຍໃນ ແລະ ສົ່ງອອກໄປຕ່າງປະເທດ, ດ້ວຍເເຫຼ່ງນໍ້າ ແລະ ລົດ ຊາດຂອງແຮ່ທາດທີ່ເປັນເອກະລັກ ຊ່ວຍໃຫ້ຜະລິດຕະພັນ Mineral Premium ໄດ້ຮັບການຢັ້ງຢືນ ຈາກມາດຕະຖານສາກົນເຊັ່ນ GHP, HACCP, ISO22000 ແລະ ສະຖາບັນລົດຊາດສາກົນຈາກ ປະເທດ Belgium.
ນ້ຳແຮ່ທາດ Mineral ເປັນນໍ້າເເຮ່ທາດ Made In Lao ຫຼື ຜະລິດຕະພັນຂອງຄົນລາວເຮົາ 100%, ທ່ານ ໄຊຍະສິດ ຊະນະເເກ້ວ ກ່າວ.
ພາຍໃນງານນອກຈາກງານລ້ຽງສະຫຼອງສັງສັນ ກໍຍັງມີການເຊັນສັນຍາຮ່ວມມືືທາງທຸລະກິດ ແລະ ກິດຈະກໍາມ່ວນຊື່ນ ຕະຫຼອດຮອດການຈັບສະຫຼາກມອບຂອງລາງວັນໃຫ້ຜູ້ໂຊກດີ ຢ່າງຄຶກຄື້ນ.
