ອຸດົມໄຊ ສໍາເລັດການຝຶກອົບຮົມຍ້ອມສີທໍາມະຊາດ ແລະ ຕັດຫຍິບກະເປົາ – ເສື້ອລື້

23 Dec 2024

ຄລິກແຊຣ໌ 0 Facebook WhatsApp

ສະພາການຄ້າ ແລະ ອຸດສາຫະກໍາ ແຂວງອຸດົມໄຊ ແລະ ຫ້ອງການອຸດສາຫະກໍາ ແລະ ການຄ້າ ເມືອງແບງ ໄດ້ປິດຊຸດຝຶກອົບຮົມການຍ້ອມສີທໍາມະຊາດ ແລະ ຕັດຫຍິບກະເປົາ, ເສື້ອລື້ ໃຫ້ກຸ່ມຫັດຖະກໍາຜ້າຝ້າຍ ບ້ານຍໍ້ ແລະ ບ້ານນາງົວ ເມືອງແບງ ແຂວງ ອຸດົມໄຊ ເມື່ອວັນທີ 16 ທັນວາ 2024.

อาจเป็นรูปภาพของ 4 คน และ ข้อความ

ເຂົ້າຮ່ວມພິທີມີ ທ່ານ ນາງ ດາວວົງ ກອງມະນີ ຮອງປະທານສະພາການຄ້າ ແລະ ອຸດສາຫະກໍາ ແຂວງອຸດົມໄຊ, ທ່ານ ຄໍາແດງ ສີອໍາໄພ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງແບງ, ມີຄະນະປະຈໍາສະພາການຄ້າເມືອງ, ນາຍບ້ານ ແລະ ສໍາມະນາກອນຈາກກຸ່ມຫັດຖະກໍາຜ້າຝ້າຍເຂົ້າຮ່ວມ.

ໃນພິທີ ທ່ານ ໄລພອນ ແກ້ວມະນີວອນ ຜູ້ປະສານງານໂຄງການສົ່ງເສີມຄວາມສາມາດໃຫ້ຜູ້ປະກອບການ, ຊ່າງຫັດຖະກໍາ ແລະ ປະຊາຊົນຜະລິດຜ້າຝ້າຍຢູ່ແຂວງອຸດົມໄຊ ໄດ້ລາຍງານການຈັດຕັ້ງປະຕິບັດກິດຈະກຳໂຄງການຝຶກອົບຮົມການຍ້ອມສີທໍາມະຊາດ ແລະ ຕັດຫຍິບກະເປົາ, ເສື້ອລື້ ຕະຫຼອດໄລຍະການຝຶກອົບຮົມ 9 ວັນຜ່ານມາ.

อาจเป็นรูปภาพของ 4 คน

ການຝຶກອົບຮົມມີ 2 ກິດຈະກໍາຫຼັກ ຄື: ກິດຈະກໍາທີ່ໜຶ່ງ ໄດ້ຝຶກອົບຮົມວິທີຍ້ອມສີທໍາມະຊາດ ຈໍານວນ 6 ສີ ຄື: ສີແດງ, ສີບົວ, ສີເຫຼືອງ, ສີນິນ, ສີດໍາ ແລະ ສີນໍ້າຫ້ອມ ໃຫ້ກຸ່ມຫັດຖະກໍາຜ້າຝ້າຍ ບ້ານຍໍ້ ໂດຍນໍາໃຊ້ວັດຖຸດິບຈາກທຳມະຊາດເປັນສ່ວນປະສົມໃນການຍ້ອມສີທຳມະຊາດ ເປັນຕົ້ນແມ່ນໝາກກະເປົ້າ, ເປືອກຄາມເຄືອ, ໃບໝາກສີດາ, ໃບຫ້ອມ, ຂີ້ໝິ້ນ ແລະ ຫອມເລືອດ ( ຜັກບົວເລືອດ ) ມີຜູ້ເຂົ້າຮ່ວມຝຶກອົບຮົມທັງໝົດ 14 ຄົນ; ກິດຈະກໍາທີ່ສອງ ໄດ້ຝຶກອົບຮົມເຕັກນິກການອອກແບບ ແລະ ຕັດຫຍິບກະເປົາ – ເສື້ອລື້ແບບປະຍຸກ ໃຫ້ກຸ່ມຕັດຫຍິບ ບ້ານນາງົວ ໃນການແປຮູບຜ້າຝ້າຍມາເປັນເສື້ອລື້ ແລະ ແພເສດມາເປັນກະເປົາ ມີຜູ້ເຂົ້າຮ່ວມທັງໝົດ 11 ຄົນ.

ຈາກນັ້ນ, ກໍໄດ້ມອບໃບຢັ້ງຢືນຜ່ານຫຼັກສູດການຝຶກອົບຮົມຍ້ອມສີທໍາມະຊາດ ແລະ ຕັດຫຍິບກະເປົາ, ເສື້ອລື້ ໃຫ້ກຸ່ມຫັດຖະກໍາຜ້າຝ້າຍທັງ 2 ບ້ານ.

ຕິດຕາມພວກເຮົາຜ່ານຊ່ອງທາງຕ່າງໆ

ຂ່າວທີ່ກ່ຽວຂ້ອງ