ອຸປະກອນທີ່ຕ້ອງນຳໃຊ້ປະກອບມີ: ຜ້າຢາງໃສຄຸມໜານ, ຜ້າກັນແສງ ແລະ ໄມ້ໄຜ່ ຫຼື ໄມ້ທົ່ວໄປ.
ວິທີທີ່ 1: ອຸປະກອນ ຍາວ 75 ຊັງຕີແມັດ, ເລິກ 20 ຊັງຕີແມັດ, ດິນຕ້ອງເປັນດິນຊາຍ 50% ແລະ ດິນດຳ 50%, ນໍາຜ້າຢາງມາປົກຄຸມຊັ້ນທຳອິດແລ້ວ ນຳຜ້າກັນແສງປົກດ້ານເທິງ.
– ໃຊ້ໄມ້ແປ້ນ ຫຼື ໄມ້ທົ່ວໄປສຳລັບເຮັດຂອບໜານກ້າ
– ດິນປະສົມຕ້ອງເປັນດິນຜຸຜຸ່ຍ ( ບໍ່ປົນດິນດາກ )
– ລະດັບຂອງດິນແມ່ນໃຫ້ເຖິງຂອບເທິງຂອງໜານກ້າ
– ເອົາຜ້າຢາງໃສປົກໃສ່ໂຄງໄມ້ທີ່ກຽມໄວ້
– ໃຊ້ຜ້າກັນແສງປົກເທິງແພຢາງໃສ
– ປິດຜ້າປົກໃຫ້ແຈບເພື່ອເຮັດໃຫ້ອາກາດຂ້າງໃນອຸ່ນຂຶ້ນ
ວິທີທີ່2: ເຮັດໜານກ້າ ໂດຍໜາມກ້າມີລວງສູງ 10 ຊັງຕີແມັດ, ບໍ່ໄດ້ນຳໃຊ້ໄມ້ໄຜ່ມາມຸງເຮັດໂຄງດ້ານເທິງ ແລະ ນຳຜ້າຢາງມາຄຸມໂດຍກົງ ເຮັດໜານຄືກັບວິທີທີ່ໜຶ່ງເລິກ 10 ຊັງຕີແມັດ.
■ ວິທີເອົາແກ່ນລົງໜານກ້າ: ໃຊ້ໄມ້ປາຍແຫຼມເຮັດເປັນຮ່ອງແຖວຍາວ ເລິກປະມານ 1 – 2 ຊັງຕີແມັດ ແລະ ຫ່າງກັນປະມານ 5 ຊັງຕີແມັດ, ເອົາແກ່ນ ຂວ້າມໜ້າລົງ ໂດຍຈົ່ງໄລຍະຫ່າງໄວ້ປະມານ 5 ຊັງຕີ ໃນແຖວດຽວກັນ; ເອົາດິນທີ່ປະສົມໄວ້ປົກໜ້າໜານກ້າແກ່ນກາເຟຄວນຈະລົງເລິກປະມານ 1 – 2 ຊັງຕີແມັດ ຫຼັງຈາກເອົາດິນປົກ, ຈາກນັ້ນເອົາເຟືອງປົກໜານໃຫ້ດີ ເພື່ອໃຫ້ຮັກສາອຸນຫະພູມ ແລະ ຄວາມຊຸ່ມໄດ້ດີ, ນໍາຜ້າຢາງ ແລະ ຜ້າກັນແສງມາປົກໜານກ້າໃຫ້ຮຽບຮ້າຍດີ.
■ ການບົວລະບັດຮັກສາໜານກ້າ ແລະ ການເບິ່ງແຍງຮັກສາເບ້ຍກາເຟ: ແກ່ນກາເຟຕ້ອງການອຸນຫະພູມທີ່ອົບອຸ່ນ ແລະ ຄວາມຊຸ່ມເພື່ອເຮັດໃຫ້ໄວຕໍ່ການແຕກໜໍ່ປົກຄຸມໜານດ້ວຍຜ້າຢາງ, ເອົາຜ້າທີ່ປົກໜານອອກ ເພື່ອອະນາໄມ ແລະ ຫົດນໍ້າ, ຫົດນໍ້າໃຫ້ໜານມີ ຄວາມຊຸ່ມຢູ່ຕະຫຼອດ, ອະນາໄມ ແລະ ຫຼົກຫຍ້າເປັນປະຈຳ, ຄ່ອຍໆນຳເອົາເຟືອງອອກທັນທີ ທີ່ສັງເກດເຫັນວ່າແກ່ນເລີ່ມແຕກໜໍ່.
ຂໍ້ມູນ:ກົມສົ່ງເສີມເຕັກນິກ ແລະ ປຸງແຕ່ງກະສິກຳ
