ສະພາແຫ່ງຊາດ ຫວຽດນາມ ໄດ້ຜ່ານການຮັບຮອງແຜນການລົງທຶນເສັ້ນທາງລົດໄຟຄວາມໄວສູງ ເໜືອ – ໃຕ້ ເມື່ອທ້າຍເດືອນຜ່ານມາ ດ້ວຍແຜນການລົງທຶນ 67 ຕື້ໂດລາສະຫະລັດ ຄວາມຍາວ 1.541 ກິໂລແມັດ.
ສອງສົ້ນຂອງເສັ້ນທາງລົດໄຟ ແມ່ນຢູ່ນະຄອນຫຼວງຮ່າໂນ້ຍ ແລະ ນະຄອນໂຮ່ຈິມິນ, ຕະຫຼອດເສັ້ນທາງລົດໄຟຈະເຊື່ອມຕໍ່ 20 ແຂວງ ແລະ ກຳແພງນະຄອນ. ສະພາແຫ່ງຊາດຫວຽດນາມ ຮຽກຮ້ອງໃຫ້ເລີ່ມການຄົ້ນຄວ້າຄວາມເປັນໄປໄດ້ ແຕ່ປີ 2025 ເປັນຕົ້ນໄປ ແລະ ພະຍາຍາມໃຫ້ສຳເລັດການກໍ່ສ້າງໂດຍພື້ນຖານກ່ອນປີ 2035.
ກະຊວງຄົມມະນາຄົມ ຄາດວ່າ: ລົດໄຟຄວາມໄວສູງອາດເດີນທາງຈາກໂຮ່ຈິມິນ ເຖິງ ຮ່າໂນ້ຍ ພາຍໃນເວລາ 5,5 ຊົ່ວໂມງ ຂະນະທີ່ການເດີນທາງປັດຈຸບັນໃຊ້ເວລາກວ່າ 1 ວັນ ດ້ວຍລົດໄຟທຳມະດາ.
ປັດຈຸບັນຄົນເລືອກໃຊ້້ເຄື່ອງບິນໃນການເດີນທາງ ລະຫວ່າງ ສອງເມືອງໃຫຍ່ຂອງປະເທດ ໂດຍໃຊ້ເວລາປະມານ 2 ຊົ່ວໂມງ ແຕ່ການເດີນທາງອາກາດມີຄ່າໃຊ້ຈ່າຍ 100 – 360ໂດລາ ຂະນະທີ່ລົດໄຟທຳມະດາມີຄ່າໃຊ້ຈ່າຍຢູ່ທີ່ 64 – 92 ໂດລາ.
ທ່ານ ຫງວຽນ ວານຖັງ ລັດຖະມົນຕີກະຊວງຄົມມະນາຄົມ ກ່າວວ່າ: ຜູ້ຄົນຫວັງວ່າໂຄງການນີ້ຈະໄດ້ຮັບການດຳເນີນການໂດຍໄວ ແຕ່ ຫວຽດນາມ ຕ້ອງກຽມພ້ອມຢ່າງລະມັດລະວັງ ເພາະອາດເກີດຄວາມສ່ຽງເຊັ່ນດຽວກັບເສັ້ນທາງລົດໄຟອື່ນໆ ຫາກດຳເນີນການລ້າຊ້າ.
