ທ່ານ ປອ. ອາຄົມເດດ ວົງໄຊ ຜູ້ອໍານວຍການໃຫຍ່ລັດວິສາຫະກິດໄຟຟ້າລາວ(ຟຟລ) ຄົນທີ 13 ໃຫ້ຄໍາໝັ້ນວ່າ ຈະນໍາພາໝູ່ຄະນະໃນລັດວິສາຫະກິດໄຟຟ້າລາວ ເພື່ອແກ້ໄຂສະພາບຄວາມຫຍຸ້ງຍາກຂອງ ລັດວິສາຫະກິດໄຟຟ້າລາວ
ທ່ານ ປອ ອາຄົມເດດ ວົງໄຊ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 29 ພະຈິກ 2024 ທີ່ລັດວິສາຫະກິດໄຟຟ້າລາວ ໃຫ້ຮູ້ວ່າ: ປັດຈຸບັນ ປະຊາຊົນໄດ້ໃຊ້ໄຟຟ້າ ຈຳນວນ 1.346.677 ຄອບຄົວ ເທົ່າກັບ 95,57% ໃນທົ່ວປະເທດໃນນັ້ນ:ເມືອງ ທີ່ຊົມໃຊ້ໄຟຟ້າ ຈຳນວນ 148 ເມືອງ ເທົ່າກັບ 100%.ບ້ານ ທີ່ຊົມໃຊ້ໄຟຟ້າ ຈຳນວນ 8.040 ບ້ານ ເທົ່າກັບ 94,51%.ຊື່ງທຽບໃສ່ ໃນປະເທດ ອາຊຽນອາຊີ ແລະ ໃນໂລກລາວເຮົາ ຖືວ່າຈັດໃນລະດັບສູງ ອັນນີ້ແມ່ນຢັ້ງຢືນວ່ານະໂຍບາຍ ພັກລັດ ແມ່ນແກ້ຄວາມທຸກຈົນ ໃຫ້ປະຊາຊົນຢ່າງແທ້ຈິງ. ຜ່ານການເຕີບໃຫຍ່ 49 ປີ ພາຍໃຕ້ການນຳພາຂອງການນຳແຕ່ລະສະໄໝ
ປັດຈຸບັນ ຟຟລ ມີ ພະນັກງານ ກຳມະກອນ ຈຳນວນ 5.619 ຄົນ, ຍິງ 1.125 ຄົນ; ມີ ສາຂາຈຳນວນ 19 ສາຂາແຂວງທົ່ວປະເທດ ເຮັດຫນ້າທີ່ ສະໜອງ ບໍລິການໄຟຟ້າ ໃນທົ່ວປະເທດ ແລະ ສົ່ງຂາຍອອກຕ່າງປະເທດ.
ແຕ່ມື້ສ້າງຕັ້ງຮອດປັດຈຸບັນ ມີ ຜອ ມາແລ້ວ 13 ທ່ານ,ເຮົາເອງເປັນຜູ້ທີ່ 13 ຫາກໍໄດ້ເລີ້ມເຮັດວງກໄດ້ບໍ່ຮອດເດືອນ ທ່ານ ປອ. ອາຄົມເດດ ວົງໄຊ ກ່າວ.
ທ່ານກ່າວວ່າ: ຕໍ່ກັບຫາງສຽງສັງຄົມ ແລະ ສະພາບຄວາມເປັນຈິງ ທີ່ວ່າ ຟຟລ ບໍ່ມີປະສິດທິຜົນ ທັ້ງທີ່ເປັນລັດວິສາຫະກິດຂະໜາດໃຫ່ຍ ແລະ ມີໜີ້ສິນຫຼວງຫຼາຍ. ສສຊ ຫຼາຍທ່ານ ມີຄຳເຫັນກ່ຽວກັບຄວາມບໍ່ໂປ່ງໃສຂອງ ຟຟລ ຄືດັ່ງ ໄດ້ເວົ້າມານັ້ນ ວ່າລັດໄດ້ລົງທຶນຫຼາຍທີ່ສຸດ ເພື່ອໃຫ້ປະຊາຊົນໄດ້ຊົມໃຊ້ໄຟຟ້າໄປທົ່ວປະເທດ, ສາຍສົ່ງ ໄກປານໃດ ກໍຕ້ອງລົງທຶນ ຈຶ່ງມີບາງກໍລະນີ ບໍ່ມີປະສິດທິຜົນເສດຖະກິດ ແຕ່ມີປະສິດທິຜົນທາງດ້ານ ສະຖຽນລະພາບ ດ້ານຄວາມສະຫງົບ ໃຫ້ປະຊາຊົນຫຼຸດພົ້ນຈາກຄວາມທຸກຍາກ. ສະນັ້ນ ຈຶ່ງເກີດມີໜີ້ສິນຫຼາຍເພາະໄດ້ລົງທຶນ ເພື່ອແກ້ໄຂໃຫ້ປະຊາຊົນ ຫ່າງໄກສອກຫຼີກ. ສະນັ້ນ, ຈຶ່ງກະທົບໃສ່ ກະແສລາຍຮັບ-ລາຍຈ່າຍ ຂອງບໍລິສັດ ແຕ່ໄລຍະກາງ- ໄລຍະຍາວກໍຈະສາມາດແກ້ໄຂໄດ້.
ທ່ານກ່າວຕື່ມວ່າ: ຕໍ່ກັບປະເດັນ ທີ່ວ່າ ຟຟລ ບໍ່ມີຄວາມໂປ່ງໃສ ຕາມຄຳເຫັນ ຂອງ ສສຊ ໃນກອງປະຊຸມ ສະພາແຫ່ງຊາດ, ເຮົາເອງ ກໍບໍ່ຮູ້ວ່າເພິ່ນ ເອົາຂໍ້ມູນມາແຕ່ໃສ, ເຮົາເອງຫາກໍຖືກແຕ່ງຕັ້ງມາໃໝ່ ແລະ ຍັງເຊື່ອໝັ້ນ ວ່າການນຳ ຟຟລ ແຕ່ລະຊຸດ ເພີ່ນກໍມີ ການຈັດຕັ້ງຄົບຖ້ວນເຊັ່ນ: ອົງການພັກ ອົງການມະຫາຊົນ ແລະ ການຊີ້ນຳຂອງຂັ້ນເທີງ ມີສະພາບໍລິຫານ, ປະຕິບັດຕາມລະບຽບ ຂອງບໍລິສັດ ແລະ ກົດໝາຍວ່າດ້ວຍລັດວິສາຫະກິດ ແລະ ກົດໝາຍ ອື່ນໆ.ນອກຈາກນັ້ນ ຄະນະກວດສອບແຫ່ງລັດ ແລະ ກວດກາພັກລັດ ເພີ່ນກໍເຮັດພາລະບົດບາດເພີ່ນຢູ່ ເຮົາເອງ ຫາກໍຖືກແຕ່ງຕັ້ງມາໃໝ່ ກໍຈະເຮັດໜ້າທີ່ໃຫ້ດີທີ່ສຸດໃຫ້ ຟຟລ ເຕີບໃຫ່ຍ .
ສໍາລັບ ມີນະໂຍບາຍແນວໃດ ທີ່ຈະຟື້ນຟູ ຟຟລ ແລະ ເຮັດໃຫ້ ຟຟລ ເປັນລັດວິສາຫະກິດນຳທາງຕາມນະໂຍບາຍຂອງພັກລັດ ?
ເຮົາເອງກໍຮງນຈົບວິສະວະກອນໄຟຟ້າ ຈາກມະຫາວິທະຍາໄລທີ່ມີຊື່ສຽງ ຂອງປະເທດ Australia (Swinbume University ຮຽນຈົບປະລິນຍາໂທ ດ້ານບໍລິຫານທຸລະກິດ ຈາກມະທະວິທະຍາໄລ ບາລາລັດ(University of Barllarat ຈົບ ປອ ໄຟຟ້າ ມະຫາວິທະຍາໄລ Kunming University ຮ່ວມກັບ ມະຫາວິທະຍາໄລແຫ່ງຊາດ, ເຮັດວຽກຢູ່ ກະຊວງພະລັງງານ ແລະ ບໍ່ແຮ່ ໄດ້ເຮັດວຽກຢູ່ຫຼາຍກົມ, ເປັນເຈົ້າໜ້າທີ່ອາວຸໂສອາຊຽນ ເປັນ ຄະນະພັກກະຊວງພະລັງງານ ແລະ ບໍ່ແຮ່ ກ່ອນຈະມາເປັນຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ.
ສະພາບປັດຈຸບັນ ຟຟລ ມີຄວາມຫຍຸ້ງຍາກ ຫຼາຍໂດຍສະເພາະ ທາງດ້ານດຳເນີນທຸລະກິດ, ໜີ້ສິນສູງ ແລະຄວາມເຊື່ອໝັ້ນຕໍ່ສັງຄົມ ແລະ ຄວາມເຊື່ອຖື ຕໍ່ສະຖາບັນການເງິນບໍ່ສູງ. ແຕ່ເບິ່ງພາບລວມຖານະຫນີ້ສິນຕໍ່ຊັບສິນຍັງບໍ່ເຖິງຊັ້ນວ່າແກ້ບໍ່ໄດ້. ທັງຫມົດນີ້ ແມ່ນຫນ້າທີ່ຂອງເຮົາທີ່ຂັ້ນເທິງໄດ້ ມອບໝາຍໃຫ້ຕ້ອງພ້ອມກັບຫມູ່ຄະນະ ພະນັກງານໃນທຸກຂັ້ນ ອົງການພັກ ອົງການມະຫາຊົນຈະພ້ອມກັນແກ້ໄຂ.
ກ່ອນອື່ນຫມົດຈະໄດ້ເຮັດ 3 ວຽກໄປພ້ອມໆກັນຄື:
1. ຟື້ນຟູ ເສີມຂະຫຍາຍມູນເຊື້ອ ຂອງ ຟຟລ ມູນເຊື້ອການຕໍ່ສູ້ ຂອງພະນັກງານກຳມະກອນ ມາຮ່ວມກັນຟື້ນຟູ ຟຟລ.
2. ຮັກສາສະຖຽນ ລະພາບຄວາມສະຫງົບພາຍໃນ ໃນທຸກຂະແໜ່ງການ ທົ່ວສູນກາງ ແລະ ທ້ອງຖິ່ນ, ພັກເປັນແກນນຳ ສະມາຊີກພັກ ເປັນຕົວແບບ ແລະ ນຳພາໃນທຸກຂະບວນການ. ຄວບຄຸມ ທຸກການໃຊ້ຈ່າຍ ຕາມນະໂຍບາຍປະຢັດ ປະສິດທິຜົນ, ຄວບຄຸມການຈັດຊື້ຈັດຈ້າງ ໂປ່ງໃສ ກວດສອບໄດ້ ແລະ ເຄັ່ງຄັດຕາມລະບຽບຂອງລັດ ທຸກປະການ, ຄວບຄຸມໃຫ້ຜ່ອນ %ຕົກເຮ່ຍ ກະແສໄຟຟ້າຫຼຸດຜອ່ນ ການນຳເຂົ້າກະແສໄຟໄຟ ດ້ວຍການຂະຫຍາຍກຳລັງການຜະລິດ ສະຫລຸບແລ້ວຈະຕ້ອງຄວມຄຸມລາຍຈ່າຍ ແລະ ຊອກວິທີເພີ້ມລາຍຮັບ.
3. ໄດ້ມີມາດຕະການສະເໜີ ໃຫ້ລັດຖະບານ ແກ້ໄຂໃຫ້ບາງນະໂຍບາຍ ທີ່ບໍ່ຢູ່ໃນສິດອຳນາດຂອງ ຟຟລ, ຖ້າພວກເຮົາແກ້ໄດ້ໃນ ຂໍ້ 2 ແລະ ລັດຖະບານ ແກ້ໄຂໃຫ້ ໃນຂໍ້ 3 ພວກເຮົາຈະຄອ່ຍແກ້ໄຂໄດ້ຂໍ້ຄົງຄ້າງທີ່ຜ່ານມາ.ເຮົາເອງ ເຊື່ອໝັ້ນວ່າ ພວກເຮົາມີມູນເຊື້ອທີ່ເຂັ້ມແຂງພວກເຮົາມີ ຄວາມເອກະພາບໃນທຸກຂັ້ນເຊັ່ນ ຄະນະຊີ້ນຳແກ້ໄຂຊ່ວຍລັດວິສາຫະກິດສູນກາງ ມີການນໍາກະຊວງ ມີສະພາບໍລິຫານ ມີຄະນະພັກ ມີອົງການມະຫາຊົນ ພວກເຮົາຈະຜ່ານຜ່າໄດ້ ໃຫ້ ຟຟລ ເຕີບໃຫ່ຍ ແລະ ເປັນເຈົ້າພາທາງຂອງລັດວິສາຫະກິດ.
ອີກບໍ່ເທົ່າໃດມື້ ວັນຊາດ 2 ທັນວາ ສປປ ລາວ ຄົບຮອບ 49 ປີ ໃນຖານະ ພະນັກງານກຳມະກອນ ຟຟລ ມີມູນເຊື້ອ ໃນການຕໍ່ສູ້ ມາຍາວນານ ຂໍຕາງໜ້າໃຫ້ ທຸກອົງການຈັດຕັ້ງ ເຊັ່ນ: ສະພາບໍລິຫານ, ຄະນະພັກຮາກຖານພັກ, ຄະນະຫນ່ວຍພັກ ອົງການມະຫາຊົນ ກຳມະບານ ຊາວໜຸ່ມ ແມ່ຍິງ ແລະພະນັກງານກຳມະກອນ 6.000 ກວ່າຕົນ ຂໍຊົມເຊີຍ ຢ່າງສຸດຊຶ້ງ ຕໍ່ທຸກໄຊຊະນະ ທຸກຜົນສຳເລັດ ໃນໄລຍະ 49 ປີ, ຂໍອວຍພອນໃຫ້ ການນຳພັກລັດ ທຸກທ່ານ ຈົ່ງມີສຸຂະພາບແຂງແຮງ ຊີ້ນຳ ນຳພາປະເທດຊາດ ສູ່ຄວາມຈະເລີນ ສີສິໄລ ປະຊາຊົນ ມີຊີວິດທີ່ດີ ໃນທຸກທຸກດ້ານ.
