ໃນຕອນເຊົ້າວັນທີ 30 ພະຈິກນີ້, ບໍລິສັດ ທາງລົດໄຟລາວ-ຈີນໄດ້ຈັດງານແຂ່ງຂັນແລ່ນມິນິມາລາທອນເປັນຄັ້ງທີ 2 ຂື້ນທີ່ບຶງທາດຫຼວງ ນະຄອນຫຼວງວຽງຈັນ. ໂດຍການໄດ້ຮັບການໃຫ້ກຽດເຂົ້າຮ່ວມຈາກພັກລັດຫຼາຍກວ່າ 30 ພາກສ່ວນ ບັນດາກະຊວງ ແລະ ອົງການຕ່າງໆທີ່ກ່ຽວຂ້ອງ ລວມໄປເຖິງບັນດານັກກິລາ ແລະ ປະຊາຊົນໃນນະຄອນຫຼວງວຽງຈັນຈຳນວນກວ່າ 2,000 ຄົນເຂົ້າຮ່ວມການການແຂ່ງຂັນ ທັງນີ້ກໍເພື່ອເປັນການສ້າງຂະບວນການເພື່ອສະເຫຼີມສະຫຼອງວັນຊາດລາວ ທີ 2 ທັນວາ ຄົບຮອບ 49 ປີ ແລະ ກໍເພື່ອເປັນການສະເຫຼີມສະຫຼອງໝາກຜົນສຳເລັດຂອງການເປີດດຳເນີນງານທາງລົດໄຟລາວ-ຈີນ ຄົບຮອບ 3 ປີ.
ພິທີດັ່ງກ່າວໃຫ້ກຽດເຂົ້າຮ່ວມ ແລະ ມອບລາງວັນໂດຍ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ນາງ ເຂັມມະນີ ພົນເສນາ ຫົວຫນ້າຫ້ອງວ່າການສໍານັກງານປະທານປະເທດ, ທ່ານ ງາມປະສົງ ເມືອງມະນີ ລັດຖະມົນຕີກະຊວງໂຍທາທີການ ແລະ ຂົນສົ່ງ, ທ່ານ ສົມມາດ ພົນເສນາ ຮອງປະທານສະພາແຫ່ງຊາດ, ທ່ານ ສິນລາວົງ ຄຸດໄພທູນ ປະທານສູນກາງແນວລາວສ້າງຊາດ ແລະ ທ່ານ ຫຼິວຫົງ ຜູ້ອໍານວຍການໃຫ່ຍ ບໍລິສັດ ທາງລົດໄຟລາວ-ຈີນ ຈໍາກັດ.
ໂອກາດດັ່ງກ່າວ ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ກ່າວວ່າ: ມື້ນີ້ພວກເຮົາໄດ້ມາເຕົ້າໂຮມກັນຢູ່ທີ່ນີ້ເພື່ອສະເຫຼີມສະຫຼອງໝາກຜົນສໍາເລັດຂອງການເປີດບໍລິການທາງລົດໄຟ ລາວ-ຈີນ ຄົບຮອບ 3 ປີ ເຊິ່ງໃນເດືອນ ທັນວາ ປີ 2021, ທາງລົດໄຟ ລາວ-ຈີນ ໄດ້ເປີດນຳໃຊ້ຢ່າງເປັນທາງການ. ເຊິ່ງໃນໄລຍະເວລາ 3 ປີ ທີ່ຜ່ານມາ, ທາງລົດໄຟສາຍນີ້ມີຄວາມປອດໄພ ມີຄຸນນະພາບ ແລະ ໄດ້ຮັບໝາກຜົນຢ່າງຕັ້ງ ໜ້າ. ມາຮອດປັດຈຸບັນ, ປະລິມານຜູ້ໂດຍສານສະສົມໄດ້ບັນລຸ 7.3 ລ້ານ ເທື່ອຄົນ ແລະ ປະລິມານຂົນສົ່ງສິນຄ້າໄດ້ບັນລຸ 10.65 ລ້ານໂຕນ, ໄດ້ກາຍເປັນເສັ້ນທາງຄົມມະນາຄົມທາງບົກ ແລະ ເຊື່ອມຫາທະເລລະຫວ່າງອາຊີຕາເວັນອອກສຽງໃຕ້ ແລະ ເອີລົບ ອັນເປັນມິດຕະພາບທີ່ມີຜົນປະໂຫຍດຕໍ່ປະຊາຊົນສອງຊາດ ລາວ ແລະ ຈີນ
ໃນ 3 ປີທີ່ຜ່ານມາ, ທາງລົດໄຟລາວຈີນ ໄດ້ຊຸກຍູ້ການຝຶກອົບຮົມໃຫ້ພະນັກງານລາວ ແລະ ໄດ້ຈັດເຂົ້າໃນວຽກງານການລົດໄຟລາວ. ປັດຈຸບັນ, ພະນັກງານລາວຈໍານວນໜຶ່ງໄດ້ເລື່ອນຕໍາແໜ່ງຢ່າງເປັນທາງການ, ໃນນັ້ນມີພະນັກງານຈໍານວນ 14 ຄົນ ໄດ້ຮັບໃບຢັ້ງຢືນຂັບລົດໄຟ, ກາຍເປັນໂຊເຟີ້ ຫຼື ຜູ້ຂັບລົດໄຟຊຸດທຳອິດຂອງ ສປປ ລາວ. ອີກອັນໜຶ່ງກໍຄື ໃນໄລຍະເວລາທີ່ປະເທດລາວເຮົາໄດ້ເກີດມີໄພນ້ຳຖ້ວມຢູ່ພາກເໜືອນັ້ນ, ທາງລົດໄຟ ລາວ-ຈີນ ກໍໄດ້ປະກອບສ່ວນໃນການອໍານວຍຄວາມສະດວກ ຂົນສົ່ງເຄື່ອງຊ່ວຍເຫຼືອໄປໃຫ້ພໍ່ແມ່ພີ່ນ້ອງປະຊາຊົນໂດຍບໍ່ເສຍຄ່າຂົນສົ່ງ, ຊຶ່ງເປັນອັນສະແດງໃຫ້ເຫັນເຖິງຄວາມຮັບຜິດຊອບຕໍ່ສັງຄົມຢ່າງເຕັມທີ່ ແລະ ໄດ້ຮັບການຍ້ອງຍໍຢ່າງກວ້າງຂວາງ.
ງານມາລາທອນໃນຄັ້ງນີ້ ບໍ່ພຽງແຕ່ເປັນງານກິລາສະເຫຼີມສະຫຼອງໝາກຜົນຂອງບໍລິສັດເທົ່ານັ້ນ ຍັງເປັນການຈັດເພື່ອສະເຫຼີມສະຫຼອງວັນຊາດ ທີ 02 ທັນວາ ຄົບຮອບ 49 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ແລະ ທັງຕ້ອນຮັບປີໃໝ່ ປີ 2025 ທີ່ຈະມາເຖິງນີ້.
ຂະນະທີ່ ທ່ານ ຫຼິວຫົງ ຜູ້ອໍານວຍການໃຫ່ຍ ບໍລິສັດ ທາງລົດໄຟລາວ-ຈີນ ຈໍາກັດ ກ່າວວ່າ: ປີນີ້ເປັນປີທີ່ ສປປ ລາວຈະສ່ອງແສງໃນເວທີສາກົນ ແລະ ອາຊຽນ. ໃນໄລຍະປີນີ້, ພວກເຮົາໄດ້ສຸມໃສ່ຮັບໃຊ້ການເປັນປະທານໝູນວຽນອາຊຽນ ແລະ ປີທ່ອງທ່ຽວລາວ, ສືບຕໍ່ເພີ່ມທະວີຄວາມສາມາດດ້ານຄົມມະນາຄົມ, ຮັບປະກັນບັນດາການເຄື່ອນໄຫວສຳຄັນຂອງອາຊຽນ, ຊຸກຍູ້ການພັດທະນາທາງລົດໄຟ ແລະ ການທ່ອງທ່ຽວແບບເຊື່ອມໂຍງ ຜູ້ໂດຍສານຫຼາຍກວ່າ 3,35 ລ້ານຄົນ ເດີນທາງດ້ວຍລົດໄຟ ເຮົາເອົງແມ່ນໄດ້ມີການເສີມສ້າງສິ່ງອໍານວຍຄວາມສະດວກ, ອຸປະກອນ ແລະ ປັບປຸງຄວາມສາມາດໃນການຂົນສົ່ງ, ໃຫ້ບູລິມະສິດສິນຄ້າກະສິກໍາ ເພື່ອໃຫ້ ສປປລາວ ໄດ້ສົ່ງສິນຄ້າອອກຫຼາຍຂຶ້ນເລື້ອຍໆ, ປັດຈຸບັນກໍສົ່ງອອກໄດ້ຫຼາຍກວ່າ 4,36ລ້ານໂຕ້ນແລ້ວ. ໃນປີນີ້, ພວກເຮົາໄດ້ປະຕິບັດແນວຄວາມຄິດການປຶກສາຫາລື, ຮ່ວມມື ແລະ ແບ່ງປັນ, ບໍລິຈາກປັດໄຈ ແລະ ວັດຖຸອຸປະກອນ, ກໍ່ສ້າງເສັ້ນທາງ ແລະ ຊ່ວຍເຫຼືອນັກຮຽນ ແລະ ໄດ້ປະຕິບັດໜ້າທີ່ຮັບຜິດຊອບຕໍ່ສັງຄົມຢ່າງຕັ້ງໜ້າ. ໃນຍາມທີ່ພາຍຸເຂົ້າ ອັນເປັນເຫດໃຫ້ ສປປ ລາວ ໄດ້ພົບກັບຄວາມເສຍຫາຍຢ່າງໃຫຍ່ຫຼວງຈາກໄພທາງທໍາມະຊາດນັ້ນ ພວກເຮົາໄດ້ປົກປ້ອງຊ່ອງທາງທີ່ຈະໄປຮອດເຂດປະສົບໄພເພື່ອບໍ່ໃຫ້ມີບັນຫາ ຢ່າງສຸດກໍາລັງ ໄດ້ຂົນສົ່ງພະນັກງານບັນເທົາທຸກ 1,136 ຄົນ ແລະ ອຸປະກອນບັນເທົາທຸກ 447,1 ໂຕ້ນ ໂດຍບໍ່ເສຍຄ່າ, ເປັນອັນສະແດງໃຫ້ເຫັນເຖິງໜ້າທີ່ ແລະ ຄວາມຮັບຜິດຊອບຂອງອົງກອນເຮົາ
ການແຂ່ງຂັນແລ່ນມິນິມາລາທອນໃນຄັ້ງນີ້ມີຄວາມຍາວທັ້ງຫມົດ 10 ກິໂລແມັດ,ເປັນການແລ່ນອອກກໍາລັງກາຍອ້ອມບຶງທາດຫຼວງ.ໃນການແຂ່ງຂັນປະກອບມີ 10 ກວ່າລາງວັນ,ໄດ້ແກ່ອັນດັບທີ 1 (8,880,000ກີບ), ອັນດັບທີ 2 (6,880,000 ກີບ), ອັນດັບທີ 3 (3,880,000 ກີບ), ອັນດັບທີ 4-10 (2,880,000 ກີບ) ແລະ ລາງວັນຂວັນໃຈທາງລົດໄຟລາວ-ຈີນອີກ 3 ລາງວັນ ລວມມູນຄ່າລາງວັນທັງໝົດຫຼາຍກວ່າ 60,000,000ກີບ, ສຳລັບນັກກິລາທີ່ແລ່ນຄົບຕາມໄລຍະທາງຈະໄດ້ຮັບລາງວັນຊົມເຊີຍເປັນຫຼຽນທີ່ລະນຶກ ຜ່ານການແຂ່ງຂັນປະກົດວ່າ:
-ອັນດັບ 1 ບຸນຈັນ ເຂົ້າເສັ້ນໄຊ 34 ນາທີ, 9 ວິນາທີ ແລະ 35 ລິບດາ
-ອັນດັບ 2 ທີລະຢຸດ ກິ່ງຄໍາ
-ອັນດັບ 3 ໄມແກ້ວ ສິງຫາລາດ
-ອັນດັບ 4 ສຸລິກອນ ຄໍາມີ
-ອັນດັບ 5 ສຸກສາຄອນ ແກ້ວຈັນດີຖໍ້າລາ
-ອັນດັບ 7 ວົນກົງ ສີສະຫວັດ
-ອັນດັບ 8 ສາຍສະໝອນ ລິດສະຫວ່າງ
-ອັນດັບ 9 ປະສິດ
-ອັນດັບ 10 ຂັນໄຊ ອຸນຄໍາໄຊຍະພອນ
ຂ່າວ-ຮູບ: Larh Creators
