ກົມສົ່ງເສີມການຄ້າ ແລະ ຫັດຖະກໍາ, ກະຊວງອຸດສາຫະກຳ ແລະ ການຄ້າ(ອຄ) ແລະ ບໍລິສັດ ອີລີເກັ້ນ ອີເວັ້ນ ຈຳກັດຜູ້ດຽວ.ຈັດງານ ວຽງຈັນມໍເຕີ້ເຊວ ເອັກສໂປ 2024 ໃນວັນທີ 29 ພະຈິກ 2024 ທີ່ສູນການຄ້າລາວໄອເຕັກ ຫຼັງເກົ່າ ເຊີ່ງມິລົດ 18 ຍີ່ຫໍ່ຄ້າຍເຂົ້າຮ່ວມ
ຮ່ວມໃນພິທີເປີດໂດຍ ທ່ານ ປອ. ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ແລະ ຫັດຖະກຳ, ທ່ານ ແສງຈັນ ຫອມສີລາຮັກ ຮອງຫົວໜ້າຫ້ອງການກະຊວງໂຍທາທິການ ແລະ ຂົນສົ່ງ, ທ່ານ ນາງ ຄໍາພາ ຄໍາບຸນເຮືອງ ຜູ້ຈັດການທົ່ວໄປ ບໍລິສັດລາວເວີນມະຫາຊົນ
ທ່ານ ພານະລິນ ສຸວັນນະວົງ ຜູ້ອຳນວຍການ ບໍລິສັດ ອີລີເກັ້ນ ອີເວັ້ນ ຈຳກັດຜູ້ດຽວ ກ່າວວ່າ: ງານວຽງຈັນມໍເຕີ້ເຊວ ເອັກສໂປ 2024 ເຊິ່ງຈັດຂຶ້ນເປັນ ຄັ້ງທີ 2 ພາຍໃຕ້ແນວຄິດ ເທັກໂນໂລຊີ ນະວັດຕະກຳລົດ ກ້າວສູ່ອະນາຄົດ ໃນລະຫວ່າງວັນທີ 30 ພະຈິກ – 8 ທັນວາ 2024 ຈຸດປະສົງເພື່ອເປັນການສົ່ງເສີມການຂາຍ ບໍ່ວ່າຈະເປັນລົດທີ່ໃຊ້ພະລັງງານນໍ້າມັນ ແລະ ລົດທີ່ໃຊ້ພະລັງງານໄຟຟ້າ ເຊິ່ງກໍມີທັງ ຄຸນນະພາບ ມາດຕະຖານ ແລະ ລາຄາທີ່ແຕກຕ່າງກັນໄປ ຍ້ອນແນວນັ້ນຈຶ່ງກໍໃຫ້ເກີດ ມີຄວາມຄິດ ທີ່ຈະໃຫ້ຂໍ້ມູນຜູ້ຊົມໃຊ້ ສາມາດປຽບທຽບຂໍ້ມູນຕ່າງໆ ຂອງລົດແຕ່ລະລຸ້ນ, ແຕ່ລະຍີ້ຫໍ້ ໄດ້ຢ່າງທົ່ວເຖິງ ບັນດາຜູ້ຜະລິດ ແລະ ຕົວແທນຈຳໜ່າຍ ກໍບໍ່ສາມາດນໍາສະເໜີຜະລິດຕະພັນ, ສິນຄ້າ ແລະ ການບໍລິການ ເຮັດການຕະຫຼາດ, ການໂຄສະນາຂອງຕົນ ໄປສູ່ກຸ່ມລູກຄ້າເປົ້າໝາຍ ໄດ້ທົ່ວເຖິງເຊັ່ນດຽວກັນ.
ທັ້ງນີ້ ເພື່ອພັກດັນການແຂ່ງຂັນວົງການ ຍານພາຫະນະ ໃນບ້ານເຮົາໄດ້ມີການເຕີບໂຕຂຶ້ນຕື່ມ ແລະ ເຫັນໄດ້ເຖິງຄວາມສຳຄັນລະຫວ່າງຄວາມຕ້ອງການຂອງຜູ້ຊື້ ແລະ ການຕອບສະໜອງຂອງຜູ້ຂາຍ ທາງບໍລິສັດ ອີລີເກັ້ນ ອີເວັ້ນ ຈຳກັດຜູ້ດຽວ, ຈຶ່ງເຂົ້າມາມີສ່ວນຮ່ວມ ເພື່ອເປັນສື່ກາງ ໃຫ້ແກ່ຜູ້ປະກອບການທາງດ້ານທຸລະກິດລົດໄດ້ມີການໂຄສະນາໃຫ້ຄວາມຮູ້ກ່ຽວກັບນະວັດຕະກຳໃຫມ່ໆຂອງລົດໃຫ້ແກ່ກຸ່ມລູກຄ້າເປົ້າໝາຍ ເພື່ອເປັນຂໍ້ມູນໃນການຕັດສິນໃຈຊື້ລົດ.
ກິດຈະກຳດ້ານໃນພາຍໃນງານ.
ພາຍໃນງານກໍຈະການວາງສະແດງ ແລະ ຈຳໜ່າຍສິນຄ້າຫຼາກຫຼາຍຄ້າຍລົດ, ສິນຄ້າໂອດອບ ແລະ ສິນຄ້າທ່າແຮງຂອງລາວ. ນອກນັ້ນມີກິດຈະກຳການຫຼາກຫຼາຍເຊັ່ນວ່າ ສຳລັບລູກຄ້າທີ່ຈອງລົດພາຍໃນງານ ຈະມີສິດລົງທະບຽບເພື່ອຮັບຄູ່ປອງລຸ້ນໂຊກ ແຈກຂອງລາງ ວັນ ຈາກມາສຄອດ ປະຈຳງານ, ບໍ່ວ່າຈະເປັນ ເຄືອບແກ້ວບໍ່ເສຍຄ່າ 30 ຄັນ, ແຈກລົດໄຟຟ້າ 3 ຄັນ, ແຈກ Smart TV 5 ໜ່ວຍ, ແຈກຕູ້ເຢັນ 9 ໜ່ວຍ, ແຈກ ປຸມເປົ້າ 5.000 ໜ່ວຍ, ພວງກະແຈ 500 ອັນ ພ້ອມຂອງລາງວັນອື່ນໆ ອີກຢ່າງຫຼວງຫຼາຍ.
ມີງານປະກວດ Cosplay, ແຂ່ງຂັນເຕັ້ນ Concept ລົດຍົນ, ມີການເເຂ່ງເຕັ້ນໂຄເວີ້ ຈາກບັນດາກຸ່ມນ້ອງໆນັກຮຽນທີ່ມີຄວາມສາມາດ. ຈັດປະກວດເດີນແບບ ຂອງນ້ອງນ້ອຍ ຕີມຮັກໂລກ ໂດຍນຳໃຊ້ລົດໄຟຟ້າ ຍັງມີຢັງມີໂປຣໂມຊັ້ນຈາກບັນດາຄ້າຍລົດພາຍໃນງານຢ່າງຫຼາກຫຼາຍໄວ້ຄອຍບໍລິການດຶງດູດເເຂກທີ່ເຂົ້າມາຮ່ວມພາຍໃນງານຂອງພວກເຮົາ. ນອກນັ້ນ ທາງບໍລິສັດ ພວກເຮົາຍັງລະດົມທຶນຊ່ວຍເຫຼືອ ຕ້ານໄພໜາວຢູ່ຊົນນະບົດ, ພ້ອມດ້ວຍ ສິລະປິນ ທັງພາຍໃນ ແລະ ເພື່ອບ້ານ ທີ່ຈະມາມອບສຽງເພັງມ່ວນໆ ເພື່ອສ້າງສີສັນພາຍໃນງານ.
ທ່ານ ຈັນສະໝອນ ສີສະອາດ ກ່າວວ່າ: ງານວາງສະແດງ ວຽງຈັນ ມໍເຕີ້ເຊວ ເອັກສໂປ 2024 “(Vientiane Motor sale EXPO 2024) ເປັນການຊຸກຍູ້ສ້າງໂອກາດໃຫ້ກັບຄ້າຍລົດຕ່າງໆ ໄດ້ກໍານົດເງື່ອນໄຂທີ່ແຕກຕ່າງກັນ ເພື່ອເຮັດກິດຈະກໍາໃນການສົ່ງເສີມການຂາຍຢູ່ຕະຫຼາດພາຍໃນໃຫ້ດີຂື້ນຕາມລໍາດັບ, ດັ່ງທີ່ທຸກທ່ານໄດ້ຮູ້ກັນແລ້ວວ່າ ໃນປະຈຸບັນ ອຸດສາຫະກຳລົດທຸກປະເພດ ບໍ່ວ່າຈະເປັນລົດທີ່ໃຊ້ນໍ້າມັນ ຫລື ໃຊ້ໄຟຟ້າ ກໍລ້ວນແຕ່ເຕີບໃຫຍ່ ຕາມສະພາບການຂະຫຍາຍຕົວຂອງປະຊາກອນພາຍໃນປະເທດ ຢ່າງຕໍ່ເນື່ອງ. ພ້ອມນັ້ນ ຍັງມີແນວໂນ້ມທີ່ຈະເພີ່ມຂື້ນຢ່າງກ້າວກະໂດດ, ພ້ອມດຽວກັນນີ້ ການຈັດງານດັ່ງກ່າວກໍ່ຍັງເປັນການກະຕຸ້ນເສດຖະກິດ ການແຂ່ງຂັນທາງດ້ານການຄ້າ, ເສດຖະກິດຂອງຊາດໃຫ້ຄຶກຄື້ນ, ເວົ້າສະເພາະແມ່ນເຮັດໃຫ້ເສດຖະກິດມີການຫມູນວຽນ ເຮັດໃຫ້ການຄ້າ ແລະ ການລົງທຶນ ມີການຂະຫຍາຍຕົວ.
ການຈັດງານວາງສະແດງລົດຄັ້ງນີ້ ໄດ້ມີການວາງສະແດງກ່ຽວກັບລົດຫຼາຍປະເພດ, ທີ່ຕິດພັນກັບລົດລວມທັງເຕັກໂນໂລຊີໃໝ່ໆ ທີ່ເປັນມິດຕໍ່ສິ່ງແວດລ້ອມ ແລະ ສິນຄ້າປະເພດລົດຍີ່ຫໍ້ຕ່າງໆທີ່ມາຈາກຫລາກຫລາຍຄ້າຍລົດ ມີທັງໝົດ 55 ຫ້ອງ, 18 ຢີ່ຫໍ້ ເຊັ່ນ: ລົດໄຟຟ້າ, ລົດປະຢັດນ້ຳມັນ ໃນຍຸກປະຈຸບັນ ທີ່ເສດຖະກິດກຳລັງ ຢູ່ໃນພາວະວິກິດ ເພື່ອມາແກ້ໄຂ ແລະ ຊ່ວຍຜູ້ຂັບຂີ່, ຜູ້ຊົມໃຊ້ພາຍໃນ ກໍຄືປະຊາຊົນລາວ ໃຫ້ໄດ້ໃຊ້ລົດທີ່ ເໝາະສົມກັບ ຄຸນນະພາບ ແລະ ລາຄາ, ພ້ອມດຽວກັນນີ້ ການຈັດງານດັ່ງກ່າວກໍເປັນກົນໄກໜຶ່ງທີ່ທາງພາກລັດໃຫ້ຄວາມສຳຄັນໃນການສົ່ງເສີມການຄ້າເພື່ອກະຕຸ້ນເສດຖະກິດ, ດຶງດູດການຄ້າ ແລະ ການລົງທຶນຂອງນັກທຸລະກິດຂອງລາວ ແລະ ສາກົນໃຫ້ນັບມື້ເຂັ້ມແຂງຕາມຍຸກເຊື່ອມໂຍງກັບສາກົນ.
ພິເສດໃນງານນີ້ ທາງດ້ານນອກ ໄດ້ມີຫ້ອງວາງສະແດງສຳລັບສິນຄ້າທ່າແຮງ ແລະ ສິນຄ້າໂອດອບ ຂອງລາວ ມາຮ່ວມວາງສະແດງ ຈຳນວນ 21 ຫ້ອງ ແລະ ຫ້ອງວາງສະແດງຂອງກົມສົ່ງເສີມການຄ້າ ແລະ ຫັດຖະກຳ ຈຳນວນ 01 ຫ້ອງ, ປະເພດສິນຄ້າທ່າແຮງຂອງລາວ ທີ່ນຳມາວາງສະແດງ ປະເພດສິນຄ້າ ຫັດຖະກຳ, ເຄື່ອງນຸ່ງ, ເຄື່ອງດື່ມ, ອາຫານ ແລະ ຢາພື້ນເມືອງ, ເພື່ອເປັນການໂຄສະນາສິນຄ້າລາວ ແລະ ຊຸກຍູ້ສົ່ງເສີມຜະລິດຕະພັນພາຍໃນ ໂຄສະນາໃຫ້ຄົນລາວ ຫັນມາຊົມໃຊ້ຜະລິດຕະພັນພາຍໃນ ໃຫ້ນັບມື້ນັບຂື້ນຫຼາຍຂຶ້ນ.
