ສະພາແຫ່ງຊາດ ໄດ້ຮັບຄຳສະເໜີ, ຄຳຮ້ອງຂໍຄວາມເປັນທໍາ ໃນປີ 2024 ຈໍານວນ 301 ເລື່ອງ, ຄ້າງມາແຕ່ປີ2023 ຈຳນວນ 560 ເລື່ອງ (ລວມທັງໝົດ 861 ເລື່ອງ). ປີ 2024 ສາມາດພິຈາລະນາແກ້ໄຂໄດ້ 301 ເລື່ອງ ເທົ່າກັບ100% ຂອງຈຳນວນຄຳຮ້ອງເຂົ້າມາໃນປີ ຊຶ່ງກວມເອົາ 34,95% ຂອງຈຳນວນຄຳຮ້ອງຂໍຄວາມເປັນທຳທັງໝົດ.
ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງຊາດ ໄດ້ລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນ ການ ປະຈຳປີ 2025 ຂອງສະພາແຫ່ງຊາດ ຕໍ່ກອງປະຊຸມສະໄໝສາມັນ ເທື່ຶອທີ 8 ຂອງສະພາແຫ່ງຊາດຊຸດທີ IX ໃນວັນທີ 29 ພະຈິກ 2024 ພາຍໃຕ້ການເປັນປະທານຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ.
ທ່ານນາງ ສູນທອນ ໄຊຍະຈັກ ກ່າວວ່າ: ດ້ານການຕິດຕາມກວດກາ:
1) ສະພາແຫ່ງຊາດ ໄດ້ເອົາໃຈໃສ່ປະຕິບັດພາລະບົດບາດຕິດຕາມກວດກາຂອງຕົນ ຕາມກົດໝາຍກຳນົດ ຊຶ່ງໃນ1 ປີຜ່ານມາ ໄດ້ລົງເຄື່ອນໄຫວຕິດຕາມກວດກາ, ຊຸກຍູ້ ແລະ ເກັບກຳຂໍ້ມູນວຽກງານຕ່າງໆຢູ່ສູນກາງ ແລະ ທ້ອງຖິ່ນ ໄດ້ທັງໝົດ 60 ຄັ້ງ ໂດຍຫົວຂໍ້ຕິດຕາມກວດກາ ແມ່ນພົວພັນກັບບັນຫາເຄັ່ງຮ້ອນ ແລະ ສົ່ງຜົນກະທົບຕໍ່ສັງຄົມ ເປັນຕົ້ນການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ, ການຈັດຕັ້ງປະຕິບັດມະຕິກົມການເມືອງສູນກາງພັກ ເລກທີ 112/ກມສພ, ລົງວັນທີ 2 ມິຖຸນາ 2020 ວ່າດ້ວຍການຍົກສູງຄຸນນະພາບການດຳເນີນຄະດີຕາມຂະບວນຍຸຕິທຳ, ການຈັດຕັ້ງປະຕິບັດຄໍາຕັດສິນຂອງສານ ແລະ ດໍາລັດ 280/ລບ ວ່າດ້ວຍຊັບສິນທີ່ຖືກຍຶດ, ອາຍັດ ແລະ ຮິບເປັນຂອງລັດ; ການຜັນຂະຫຍາຍເນື້ອໃນກົດໝາຍ ທີ່ເປັນນິຕິກຳໃຕ້ກົດໝາຍ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ຕິດພັນກັບການປະຕິບັດສອງວາລະແຫ່ງຊາດ, ການຈັດຕັ້ງປະຕິບັດໂຄງການທົດລອງຂຸດຄົ້ນແຮ່ທາດ ແລະ ການຊຸກຍູ້ສົ່ງເສີມການຜະລິດຊົມໃຊ້ພາຍໃນ ເພື່ອຫຼຸດຜ່ອນການນໍາເຂົ້າ, ບັນດາໂຄງການຈຸດສຸມຂອງວຽກງານພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານອື່ນ
2) ວຽກງານສາຍດ່ວນ, ສະພາແຫ່ງຊາດ ໄດ້ຮັບຄຳສະເໜີຜ່ານໂທລະສັບສາຍດ່ວນ ກອງປະຊຸມສະໄໝສາມັນ ເທື່ອທີ 6 ແລະ ເທື່ອທີ 7 ຂອງສະພາແຫ່ງຊາດ ລວມມີທັງໝົດ 1.603 ສາຍ ແລະ ສາມາດສັງລວມເນື້ອໃນໄດ້ 990 ເລື່ອງ. ໃນນີ້, ສະເພາະສາຍດ່ວນກອງປະຊຸມສະໄໝສາມັນເທື່ອທີ 7 ຜ່ານມາ ມີຈຳນວນ 1.008 ສາຍ,ສັງລວມໄດ້ 528 ເລື່ອງ ໄດ້ສົ່ງໃຫ້ອົງການ ແລະ ພາກສ່ວນກ່ຽວຂ້ອງແລ້ວ ຈໍານວນ 30 ພາກສ່ວນ ຊຶ່ງມາຮອປັດຈຸບັນໄດ້ຮັບແຈ້ງຕອບຈາກພາກສ່ວນກ່ຽວຂ້ອງ 7 ພາກສ່ວນ ມີຈຳນວນ 53 ເລື່ອງ. ນອກຈາກນັ້ນ, ຍັງໄດ້ຮັບຟັງການຊີ້ແຈງຈາກພາກສ່ວນຕ່າງໆຂອງລັດຖະບານ, ອົງການກວດສອບແຫ່ງລັດ, ອົງການກວດກາແຫ່ງລັດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ ແລະ ພາກສ່ວນກ່ຽວຂ້ອງ ຢູ່ໃນກອງປະຊຸມສະໄໝສາມັນທີ່ອທີ 7 ມີຈຳນວນ 12 ພາກສ່ວນ ກວມເອົາ 45 ຄຳຊັກຖາມ ແລະ ກອງປະຊຸມສະໄໝສາມັນເທື່ອທີ 8 ມີການຊີ້ແຈງຈາກພາກສ່ວນກ່ຽວຂ້ອງຕ່າງໆ ຈຳນວນ 18 ພາກສ່ວນ
3) ສະພາແຫ່ງຊາດ ໄດ້ຮັບຄຳສະເໜີ, ຄຳຮ້ອງຂໍຄວາມເປັນທໍາ ໃນປີ 2024 ຈໍານວນ 301 ເລື່ອງ, ຄ້າງມາແຕ່ປີ2023 ຈຳນວນ 560 ເລື່ອງ (ລວມທັງໝົດ 861 ເລື່ອງ). ປີ 2024 ສາມາດພິຈາລະນາແກ້ໄຂໄດ້ 301 ເລື່ອງ ເທົ່າກັບ100% ຂອງຈຳນວນຄຳຮ້ອງເຂົ້າມາໃນປີ ຊຶ່ງກວມເອົາ 34,95% ຂອງຈຳນວນຄຳຮ້ອງຂໍຄວາມເປັນທຳທັງໝົດ. ນອກ
ນັ້ນ, ຍັງໄດ້ຈັດກອງປະຊຸມ ຮ່ວມກັບພາກສ່ວນທີ່ກ່ຽວຂ້ອງ ເພື່ອປຶກສາຫາລືຄຳຮ້ອງຂໍຄວາມເປັນທໍາ ທີ່ມີຄວາມຫຍຸ້ງຍາກ ໄດ້ 5 ຄັ້ງ ຈຳນວນ 19 ເລື່ອງ, ຕ້ອນຮັບ ແລະ ໃຫ້ຄຳປຶກສາແກ່ປະຊາຊົນ ຈຳນວນ 350 ເທື່ອຄັ້ງ
