ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ ແລະ ຄະນະຄົ້ນຄວ້າການສຶກສາອາຊີຕາເວັນອອກສຽງໃຕ້ ມະຫາວິທະຍາໄລ ເຊຍເໝິນ ( Xiamen ) ຈາກ ສປ ຈີນ ໄດ້ເປີດ ຫ້ອງການປະສານງານການຮ່ວມມື 2 ຝ່າຍຢ່າງເປັນທາງການ ໃນກອງປະຊຸມສໍາມະນາກ່ຽວກັບຄຸນນະພາບການເຊື່ອມຕໍ່ຂໍ້ລິເລິີ່ມໜຶ່ງແລວໜຶ່ງເສັ້ນທາງ ໃນຕອນເຊົ້າວັນທີ 29 ພະຈິກ 2024 ທີ່ຫ້ອງປະຊຸມໃຫຍ່ ມະຫາວິທະຍາໄລແຫ່ງຊາດ, ນະຄອນຫຼວງວຽງຈັນ ສປປ ລາວ.
ກອງປະຊຸມສຳມະນາສາກົນກ່ຽງກັບຄຸນນະພາບຂໍ້ລິເລີ່ມໜຶ່ງແລວໜຶ່ງເສັ້ນທາງ ເຂົ້າຮ່ວມກອງປະຊຸມຄັ້ງນີ້ ຝ່າຍລາວ ນຳໂດຍ ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມະຫາວິທະຍາໄລແຫ່ງຊາດ ແລະ ຝ່າຍຈີນ ນຳໂດຍ ສີດາລິນ ຮອງອະທິການບໍດີ ມະຫາວິທະຍາໄລເຊຍເໝິນ ສປ ຈີນ ຈຸດປະສົງຂອງກອງປະຊຸມຄັ້ງນີ້ ເເມ່ນມີຄວາມໝາຍຄວາມສຳຄັນ ຊຸກຍູ້ການຮ່ວມມືທາງວິຊາການ ແລະ ການຄົ້ນຄວ້າ ແລະ ເປັນການເຂົ້າຮ່ວມເປັນສັກຂີພິຍານພິທີລົງນາມໃນບົດບັນທຶກຄວາມເຂົ້າໃຈ ລະຫວ່າງ ໂຮງຮຽນການພົວພັນຕ່າງປະເທດ, ສະຖາບັນຄົ້ນຄວ້າອາຊີຕາເວັນອອກສ່ຽງໃຕ້, ມະຫາວິທະຍາໄລເຊຍເໝິນ ແລະ ຄະນະວິທະຍາສາດສັງຄົມ, ມະຫາວິທະຍາໄລແຫ່ງຊາດ. ເຊິ່ງເຊື່ອໝັ້ນວ່ານັກວິຊາການ ແລະ ຜູ້ບໍລິຫານຂອງສອງມະຫາວິທະຍາໄລຈະຊອກຫາກາລະໂອກາດຮ່ວມມືຢ່າງຈິງຈັງ ແລະ ຮັດແໜ້ນຄວາມເຂົ້າໃຈ ແລະ ການຮ່ວມມືກັນ ໂດຍຜ່ານການເຄື່ອນໄຫວທາງວິຊາການ ແລະ ການຄົ້ນຄວ້າທີ່ຫຼາກຫຼາຍ ເພື່ອຊຸກຍູ້ການຮ່ວມມືລະຫວ່າງລາວ-ຈີນ ແລະ ອາຊຽນ ໃຫ້ມີການເຊື່ອມຈອດ ແລະ ຂະຫຍາຍຕົວຢ່າງຮອບດ້ານເປັນຕົ້ນການຮ່ວມມືຄົ້ນຄ້ວາໃນຂົງເຂດທີ່ສອງຝ່າຍມີຄວາມສົນໃຈ, ລວມທັງສູນຄົ້ນຄວ້າຮ່ວມທີ່ມີທ່າແຮງ, ການແລກປ່ຽນຊັບພະຍາກອນການສຶກສາທີ່ມີທັງສອງຝ່າຍ, ການແລກປ່ຽນນັກສຶກສາໃນວິຊາການພັດທະນາແລະການບໍລິການວິຊາການ ການສະໜັບສະໜູນການສໍາມະນາການຮ່ວມມື, ການສໍາມະນາອອນໄລນ໌ຫຼືການບັນຍາຍ, ກອງປະຊຸມ, ແລະກອງປະຊຸມທາງວິຊາການອື່ນໆໃນເລື່ອງທີ່ມີຄວາມສົນໃຈຮ່ວມກັນ ລວມເຖິງສຳຫຼວດຄວາມເປັນໄປໄດ້ໃນການກະກຽມສະຖາບັນຄົ້ນຄ້ວາ, ສູນຄົ້ນຄວ້າອາຊີຕາເວັນອອກສ່ຽງໃຕ້ທີ່ສ້າງຕັ້ງຮ່ວມກັນ ແລະ ວຽກງານຮ່ວມມືອື່ນໆໂດຍການຕົກລົງເປັນລາຍລັກອັກສອນ, ສຳລັບນະໂຍບາຍຂໍ້ລິເລີ່ມໜຶ່ງແລວໜຶ່ງເສັ້ນທາງຂອງຈີນໄດ້ມີບົດບາດອັນສຳຄັນໃນການເຊື່ອມຕໍ່ພື້ນຖານໂຄງລ່າງ ແລະ ການພັດທະນາດ້ານສັງຄົມ, ການເມືອງ ແລະ ເສດຖະກິດຂອງສະພາບການໂລກ, ລວມທັງປະເທດອາຊີຕາເວັນອອກສ່ຽງໃຕ້. ລາວແມ່ນໜຶ່ງໃນບັນດາປະເທດທີ່ໄດ້ຮັບຄວາມໄດ້ປຽບຈາກນະໂຍບາຍຂໍ້ລິເລີ່ມໜຶ່ງແລວທາງໜຶ່ງເສັ້ນທາງ. ເປັນກາລະໂອກາດພັດທະນາເສດຖະກິດ-ສັງຄົມ, ໃນນັ້ນມີການພັດທະນາພະລັງງານຂຽວ ແລະ ສະອາດ, ໄດ້ເປີດກ້ວາງໃຫ້ບັນດານັກລົງທຶນທັງພາຍໃນ ແລະ ຕ່າງປະເທດ. ດ້ວຍເຫດນັ້ນ, ສິ່ງທ້າທາຍ ແລະ ກາລະໂອກາດຂອງຜົນກະທົບທາງດ້ານສັງຄົມ, ສິ່ງແວດລ້ອມ ແລະ ເສດຖະກິດ ໄດ້ຖືກປຶກສາຫາລືຢ່າງ ກ້ວາງຂວາງລະຫວ່າງບັນດານັກວິຊາການ ແລະ ຜູ້ຊ່ຽວຊານ ຈາກຫຼາຍພາກສ່ວນຈາກຫຼາຍປະເທດມາປຶກສາຫາລື ເພື່ອຊອກໃຫ້ເຫັນສາເຫດ ແລະ ສິ່ງທ້າທາຍ ເຊິ່ງຜູ້ເຂົ້າຮ່ວມຈະໄດ້ແລກປ່ຽນປະສົບການ, ສະເໜີບັນດາວິທີແກ້ໄຂຢ່າງມີຫົວຄິດປະດິດສ້າງ ເພື່ອສ້າງຄວາມເຂັ້ມແຂງ ແລະ ການຮ່ວມມືທາງດ້ານເສດຖະກິດ-ສັງຄົມ.
ໃນພິທີດັ່ງກ່າວຍັງມີການເປີດແຖບຜ້າສັນຍາລັກ “ ຫ້ອງການປະສານງານການຮ່ວມມື ລະຫວ່າງ ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ ແລະ ຄະນະຄົ້ນຄວ້າການສຶກສາອາຊີຕາເວັນອອກສຽງໃຕ້ ມະຫາວິທະຍາໄລ ເຊຍເໝິນ ( Xiamen ) ” ໂດຍທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມະຫາວິທະຍາໄລແຫ່ງຊາດ ແລະ ທ່ານ Dr. Shi Dalin ຮອງອະທິການບໍດີ ມະຫາວິທະຍາໄລ ເຊຍເໝິນ ( Xiamen ) ເຊິ່ງມີຄະນະນໍາ, ຄູ-ອາຈານ ແລະ ນ້ອງໆນັກຮຽນຈາກທັງ 2 ຝ່າຍ ຕະຫຼອດຮອດສື່ມວນຊົນທັງລາວ ແລະ ຈີນ ເຂົ້າຮ່ວມເປັນສັກຂີພິຍານ.
ໂອກາດດັ່ງກ່າວ ທ່ານ ຮສ. ປອ. ເດຊານຸລາດ ແສນດວງເດດ ໄດ້ກ່າວເປີດກອງປະຊຸມສໍາມະນາກ່ຽວກັບຄຸນນະພາບການເຊື່ອມຕໍ່ຂໍ້ລິເລິີ່ມໜຶ່ງແລວໜຶ່ງເສັ້ນທາງ ວ່າ: ຕາງໜ້າມະຫາວິທະຍາໄລແຫ່ງຊາດ, ຂ້າພະເຈົ້າຂໍຖືໂອກາດນີ້ສະແດງຄວາມຊົມເຊີຍຢ່າງອົບອຸ່ນ ແລະ ຂອບໃຈຢ່າງຈິງໃຈຕໍ່ຄວາມພະຍາຍາມ ແລະ ຄວາມມຸ່ງໝັ້ນໃນການຊຸກຍູ້ສາຍພົວພັນມິດຕະພາບ ແລະ ການຮ່ວມມືທາງວິຊາການ ລະຫວ່າງ ມະຫາວິທະຍາໄລ ແຫ່ງຊາດ ສປປ ລາວ ແລະ ມະຫາວິທະຍາໄລ ເຊຍເໝິນ ( Xiamen ) ສປ ຈີນ. ນອກນັ້ນ ຍັງໄດ້ມີການແລກປ່ຽນຄວາມຄິດເຫັນ ໃນກອງປະຊຸມສຳມະນາສາກົນກ່ຽວກັບການຮ່ວມມືດ້ານ ຄຸນນະພາບສູງຂອງຂໍ້ລິເລີ່ມໜຶ່ງແລວໜຶ່ງເສັ້ນທາງ ແລະ ການເຊື່ອມຕໍ່ພື້ນຖານໂຄງລ່າງ ເຊິ່ງເປັນເຈົ້າພາບຮ່ວມກັນ.
ນອກຈາກການຊຸກຍູ້ການຮ່ວມມືທາງວິຊາການ ແລະ ການຄົ້ນຄວ້າ, ທ່ານຍັງຈະໄດ້ເປັນສັກຂີພິຍານພິທີ ລົງນາມໃນບົດບັນທຶກຄວາມເຂົ້າໃຈ ລະຫວ່າງມະຫາວິທະຍາໄລ ການພົວພັນຕ່າງປະເທດ, ສະຖາບັນຄົ້ນຄວ້າອາຊີຕາເວັນອອກສຽງໃຕ້, ມະຫາວິທະຍາໄລ ເຊຍເໝິນ ( Xiamen ) ແລະ ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດລາວ. ດ້ວຍຄວາມຕັ້ງໃຈຂອງພວກເຮົາ, ພວກເຮົາ ເຊື່ອໝັ້ນວ່ານັກວິຊາການ ແລະ ຜູ້ບໍລິຫານຂອງທັງສອງ ມະຫາວິທະຍາໄລຂອງພວກເຮົາຈະຊອກຫາໂອກາດຮ່ວມກັນຢ່າງຈິງຈັງ ແລະ ສ້າງຄວາມເຂັ້ມແຂງເຊິ່ງກັນແລະກັນ.
ຂະນະດຽວກັນ ທ່ານ Dr. Shi Dalin ຮອງອະທິການບໍດີ ມະຫາວິທະຍາໄລ ເຊຍເໝິນ ( Xiamen ) ກ່າວໃນພິທີວ່າ: ໃນນາມຂອງມະຫາວິທະຍາໄລ Xiamen, ຂ້າພະເຈົ້າຂໍສະແດງ ຄວາມຍິນດີຢ່າງອົບອຸ່ນ ແລະ ຂອບໃຈຢ່າງສຸດຊຶ້ງ ມາຍັງບັນດາແຂກຜູ້ມີກຽດທີ່ໄດ້ເຂົ້າຮ່ວມງານໃຫຍ່ຄັ້ງນີ້. ໃນຫຼາຍປີມານີ້, ຈີນແລະ ລາວບໍ່ພຽງແຕ່ໄດ້ ເຊື່ອມຕໍ່ກັນດ້ວຍພູຜາແມ່ນ້ຳຂອງຮ່ວມກັນເທົ່ານັ້ນ, ຫາກຍັງແມ່ນສາຍພົວພັນມິດຕະພາບທີ່ເລິກເຊິ່ງ ແລະ ຍືນຍົງ. ທາງລົດໄຟຈີນ-ລາວທີ່ເປັນໂຄງການທີ່ສຳຄັນ ຂອງການຮ່ວມມືສອງຝ່າຍພາຍໃຕ້ຂໍ້ລິເລີ່ມໜຶ່ງແລວໜຶ່ງເສັ້ນທາງ ໄດ້ກາຍເປັນແລວທາງຄົມມະນາຄົມສາກົນທີ່ສຳຄັນ, ເຊື່ອມຕໍ່ຄຸນໝິງ ຫາ ວຽງຈັນ ແລະ ຂົວທາງລະຫວ່າງຈີນກັບອາຊຽນ.
ມະຫາວິທະຍາໄລ Xiamen ໄດ້ສະແຫວງຫາພາລະກິດເປັນໃຈກາງກ່ຽວກັບ ການຮ່ວມມືອາຊີຕາເວັນອອກສ່ຽງໃຕ້, ແລະ ການເຊື່ອມຕໍ່ກັບຈີນ ຢູ່ຕ່າງປະເທດ ໂດຍມີເປົ້າໝາຍການຮ່ວມມືໜຶ່ງແລວໜຶ່ງເສັ້ນທາງທີ່ມີຄຸນນະພາບສູງ, ການປະກອບສ່ວນອັນໂດດເດັ່ນຂອງ ຈີນ ແລະ ການພັດທະນາເສດຖະກິດ-ສັງຄົມ.
ນອກນັ້ນ, ໃນພິທີຍັງມີການເຊັນສັນຍາ MOA ໃຫ້ກຽດລົງນາມໂດຍ ທ່ານ ຮສ ປອ ນາງ ສົມຄິດ ບູລິດຳ ຮັກສາການຄະນະບໍດີ ຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ ແລະ ທ່ານ Dr. Yanjie Gao ຄະນະບໍດີ ຄະນະຄົ້ນຄວ້າການສຶກສາອາຊີຕາເວັນອອກສ່ຽງໃຕ້ ມະຫາວິທະຍາໄລ ເຊຍເໝິນ ( Xiamen )
ສັນຍາ MOA ມີເນື້ອໃນສໍາຄັນດັ່ງນີ້:
1) ການຮ່ວມມືຄົ້ນຄວ້າໃນຂົງເຂດທີ່ສອງຝ່າຍມີຄວາມສົນໃຈ ຮ່ວມກັນ, ລວມທັງສູນຄົ້ນຄວ້າຮ່ວມກັນທີ່ມີ ທ່າແຮງ;
2) ການແລກປ່ຽນຊັບພະຍາກອນການສຶກສາທີ່ມີທັງສອງຝ່າຍ;
3) ການແລກປ່ຽນນັກສຶກສາໃນວິຊາການພັດທະນາແລະການບໍລິການວິຊາການ;
4) ການສະໜັບສະໜູນການສໍາມະນາການຮ່ວມມື, ການສໍາມະນາອອນໄລນ໌ ຫຼື ການບັນຍາຍ, ກອງປະຊຸມ, ແລະກອງປະຊຸມວິຊາການອື່ນໆກ່ຽວກັບ ບັນຫາທີ່ມີຄວາມສົນໃຈຮ່ວມກັນ;
5) ສຳຫຼວດຄວາມເປັນໄປໄດ້ໃນການກະກຽມ ສະຖາບັນຄົ້ນຄວ້າ/ສູນກາງຮ່ວມກັນສຳລັບພາກຕາເວັນອອກສຽງໃຕ້ການສຶກສາອາຊີ;
6) ວຽກງານຮ່ວມມືອື່ນໆໂດຍການຕົກລົງເປັນລາຍລັກອັກສອນ.
ສໍາລັບ ກອງປະຊຸມສໍາມະນາກ່ຽວກັບຄຸນນະພາບການເຊື່ອມຕໍ່ຂໍ້ລິເລິີ່ມໜຶ່ງແລວໜຶ່ງເສັ້ນທາງ ດໍາເນີນເປັນໄລຍະເວລາ 1 ມື້ໃນວັນທີ 29 ພະຈິກ 2024 ທີ່ຫ້ອງປະຊຸມໃຫຍ່ ມະຫາວິທະຍາໄລແຫ່ງຊາດ, ນະຄອນຫຼວງວຽງຈັນ ສປປ ລາວ
ຂ່າວ-ຮູບ: Larh Creators
