ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງຊາດ ໄດ້ລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນ ການ ປະຈຳປີ 2025 ຂອງສະພາແຫ່ງຊາດ ຕໍ່ກອງປະຊຸມສະໄໝສາມັນ ເທື່ຶອທີ 8 ຂອງສະພາແຫ່ງຊາດຊຸດທີ IX ໃນວັນທີ 29 ພະຈິກ 2024 ພາຍໃຕ້ການເປັນປະທານຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ.
ທ່ານນາງ ສູນທອນ ໄຊຍະຈັກ ກ່າວວ່າ:ໃນຕະຫຼອດໄລຍະ 1 ປີຜ່ານມາ ສະພາແຫ່ງຊາດ ໄດ້ເອົາໃຈໃສ່ເຄື່ອນໄຫວປະຕິບັດໜ້າທີ່ວຽກງານ ຕາມພາລະບົດບາດຂອງຕົນ ໃນສະພາບແວດລ້ອມສາກົນ ແລະ ພາກພື້ນ ຍັງສືບຕໍ່ຜັນແປຢ່າງສັບສົນ ວ່ອງໄວ ຢູ່ຫຼາຍພາກພື້ນຂອງໂລກ ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຢູ່ປະເທດລາວ ພວມປະເຊີນກັບສິ່ງທ້າທາຍບໍ່ໜ້ອຍ ທີ່ຈະຕ້ອງໄດ້ເລັ່ງແກ້ໄຂ ບວກໃສ່ຜົນກະທົບຈາກໄພທຳມະຊາດຢ່າງຮ້າຍແຮງ ທີ່ເກີດຂຶ້ນໃນຫຼາຍແຂວງຂອງປະເທດເຮົາ ໃນ ສະພາບດັ່ງກ່າວ ສະພາແຫ່ງຊາດ ກໍໄດ້ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ໃນການຜັນຂະ ຫຍາຍ ແນວທາງນະໂຍບາຍຂອງພັກ-ລັດ ເອົາໃຈໃສ່ປະສານສົມທົບແໜ້ນກັບລັດຖະບານ ແລະ ບັນດາອົງການຈັດຕັ້ງທຸກຂັ້ນ ນໍາພາ-ຊີ້ນໍາການເຄື່ອນໄຫວວຽກງານຕ່າງໆ ຂອງສະພາແຫ່ງຊາດ ສາມາດບັນລຸຜົນສຳເລັດຫຼາຍດ້ານ ດ້ານນິຕິບັດຍັດ ສຳເລັດການປັບປຸງ ຮຽບຮຽງກົດໝາຍ ຈໍານວນ 13 ສະບັບ ທີ່ໄດ້ຮັບຮອງເອົາ ຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ປັດຈຸບັນ ໄດ້ນຳສະເໜີປະທານປະເທດ ອອກລັດຖະດຳລັດ ປະກາດໃຊ້ຢ່າງເປັນທາງການ ໄດ້ກະກຽມຄວາມພ້ອມຮອບດ້ານຂອງຮ່າງກົດໝາຍ ຈຳນວນ 9 ສະບັບ ທີ່ຈະນໍາເຂົ້າພິຈາລະນາ ຮັບຮອງຢູ່ກອງປະຊຸມສະໄໝສາມັນ ເທື່ອທີ 8 ກອງປະຊຸມສະໄໝສາມັນ ເທື່ອທີ 7 ໄດ້ຮັບຮອງເອົາການສ້າງ ແລະ ປັບປຸງກົດໝາຍ ຈຳນວນ 13 ສະບັບ ແລະ ກອງປະຊຸມສະໄໝສາມັນ ເທື່ອທີ 8 ຈຳນວນ 9 ສະບັບ ລວມທັງໝົດ 22 ສະບັບ ບັນລຸໄດ້ 84,61% ຂອງແຜນການປີ 2024 ຈຳນວນ 26 ສະບັບ.
ສຳລັບແຜນການເຄື່ອນໄຫວວຽກງານ ປະຈໍາປີ 2025 ຄາດໝາຍສູ້ຊົນເອົາໃຈໃສ່ກະກຽມເນື້ອໃນຮອບດ້ານໃຫ້ແກ່ວຽກງານສ້າງ ແລະ ປັບປຸງກົດໝາຍ ປີ 2025 ບັນລຸຕາມ ແຜນການທີ່ວາງໄວ້ ຮັບປະກັນການພິຈາລະນາຕົກລົງບັນຫາສໍາຄັນພື້ນຖານຂອງປະເທດຊາດ ຕາມພາລະບົດບາດ ສິດ ແລະ ໜ້າທີ່ ໃຫ້ສອດຄ່ອງກັບແນວທາງນະໂຍບາຍ ລັດຖະທຳມະນູນ ກົດໝາຍ ແລະ ນິຕິກໍາທີ່ກ່ຽວຂ້ອງ ຍົກສູງການປະຕິບັດພາລະບົດບາດຕິດຕາມກວດກາ ຂອງສະພາແຫ່ງຊາດ ຕາມລັດຖະທໍາມະນູນ ແລະ ກົດໝາຍກຳ ນົດ ໃຫ້ມີປະສິດທິພາບ ປະສິດທິຜົນ ຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ ສະມາ ຊິກສະພາປະຊາຊົນຂັ້ນແຂວງ ແລະ ພະນັກງານ-ລັດຖະກອນ ໄປຕາມແຜນການລວມຂອງສະພາແຫ່ງຊາດ ເພີ່ມທະວີການພົວພັນຮ່ວມມື ແລະ ປະສານງານຢ່າງກົມກຽວ ລະຫວ່າງ ສະພາແຫ່ງຊາດ ກັບບັນດາອົງການຂອງລັດ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ສະພາປະຊາຊົນຂັ້ນແຂວງ ແລະ ພາກສ່ວນຕ່າງໆ ໃຫ້ມີຄວາມຄ່ອງຕົວດີຂຶ້ນກວ່າເກົ່າ ເພື່ອຮັບປະກັນການປະຕິບັດໜ້າທີ່ວຽກງານຂອງສະພາແຫ່ງຊາດ ໃຫ້ໄດ້ຮັບຜົນສຳເລັດເປັນຢ່າງດີ ແລະ ເອົາໃຈໃສ່ເຄື່ອນໄຫວວຽກງານການຕ່າງປະເທດ ໃຫ້ສອດຄ່ອງກັບແນວທາງການຕ່າງປະເທດຂອງພັກ ຮັບປະກັນການປະກອບສ່ວນຍົກສູງບົດບາດຂອງສະພາແຫ່ງຊາດ ໃນເວທີພາກພື້ນ ແລະ ສາກົນ.
