ຂ່າວຈາກຄວາມສະຫງົບລາຍງານວ່າ ໃນວັນທີ 29 ພະຈິກ 2024, ກະຊວງ ປກສ ໄດ້ຈັດພິທີປະກາດເລື່ອນຊັ້ນໃຫ້ນາຍຕໍາຫຼວດຂັ້ນສູງ ໃຫ້ກຽດເຂົ້າຮ່ວມໂດຍ ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ, ພົອ ວິໄລ ຫຼ້າຄໍາຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງ ປກສ, ມີບັນດາຄະນະພັກກະຊວງ, ກົມໃຫຍ່, ຫ້ອງວ່າການ, ກົມກອງອ້ອມຂ້າງກະຊວງ, ຕະຫຼອດຮອດພະນັກງານຜູ້ທີ່ໄດ້ຮັບເລື່ອນຊັ້ນ ເຂົ້າຮ່ວມ.
ທ່ານ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານລັດຖະດຳລັດຂອງປະທານປະເທດ ສະບັບເລກທີ 236/ປປທ, ລົງວັນທີ 19 ພະຈິກ 2024 ວ່າດ້ວຍການເລື່ອນຊັ້ນນາຍຕໍາຫຼວດຊັ້ນ ພົນຕີ ຂຶ້ນຊັ້ນ ພົນໂທ 1 ທ່ານ ຄື: ພົນໂທ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປກສ.
ລັດຖະດຳລັດຂອງປະທານປະເທດ ສະບັບເລກທີ 237-242/ປປທ ລົງວັນທີ 19 ພະຈິກ 2024 ວ່າດ້ວຍການເລື່ອນຊັ້ນນາຍຕໍາຫຼວດ ຊັ້ນ ພັນເອກ ຂຶ້ນຊັ້ນ ພົນຈັດຕະວາ ໃຫ້ນາຍຕຳຫຼວດ ຈໍານວນ 6 ສະຫາຍ ປະກອບມີ:
1. ສະຫາຍ ພົນຈັດຕະວາ ປອ ສີສົມໄຊ ແກ້ວບຸນພັນ ຫົວໜ້າກົມ 504,
2. ສະຫາຍ ພົນຈັດຕະວາ ປອ ບຸນຊະນະ ສິມມາລາວົງ ຫົວໜ້າອໍານວຍການວິທະຍາຄານສັນຕິບານປະຊາຊົນ,
3. ສະຫາຍ ພົນຈັດຕະວາ ປອ ໂອໄດ ທິລັນດາ ຫົວໜ້າອໍານວຍການວິທະຍາຄານຕຳຫຼວດປະຊາຊົນ,
4. ພົນຈັດຕະວາ ຊາຍຄອງ ເພັດຊະວົງ ຫົວໜ້າອໍານວຍການວິທະຍາຄານການເມືອງ ປກສ,
5. ສະຫາຍ ພົນຈັດຕະວາ ຄໍາບານ ພົມມະນີວົງ ຫົວໜ້າກອງບັນຊາການ ປກສ ແຂວງເຊກອງ,
6. ສະຫາຍ ພົນຈັດຕະວາ ແສງທອງ ທັມມະເທວາ ຫົວໜ້າກົມປ້ອງກັນຄວາມສະຫງົບ ກຳມາທິການ ປກຊ-ປກສ ສະພາແຫ່ງຊາດ.
ດໍາລັດຂອງນາຍົກລັດຖະມົນຕີ ສະບັບເລກທີ 574-610/ນຍ, ລົງວັນທີ 24 ຕຸລາ 2024 ວ່າດ້ວຍການເລື່ອນຊັ້ນ ພັນໂທ ຂຶ້ນເປັນຊັ້ນ ພັນເອກ ໃຫ້ນາຍຕໍາຫຼວດ ຈໍານວນ 37 ສະຫາຍ ຍິງ 3 ສະຫາຍ; ເປັນກຽດປະດັບຊັ້ນ ພົນໂທ, ພົນຈັດຕະວາ ໂດຍ ທ່ານ ປອ ບຸນທອງ ຈິດມະນີ ແລະ ເປັນກຽດປະດັບຊັ້ນ ພັນເອກ ໂດຍ ທ່ານ ພົອ ວິໄລ ຫຼ້າຄຳຟອງ.
ໃນພິທີ, ທ່ານ ປອ ບຸນທອງ ຈິດມະນີ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ສະຫາຍທີ່ໄດ້ຮັບການເລື່ອນຊັ້ນໃນຄັ້ງນີ້ ແລະ ເນັ້ນໃຫ້ນາຍຕຳຫຼວດຂັ້ນສູງທີ່ເຂົ້າຮ່ວມພິທີ ໂດຍສະເພາະ ຜູ້ທີ່ໄດ້ຮັບການເລື່ອນຊັ້ນໃໝ່ໃນຄັ້ງນີ້ ເອົາໃຈໃສ່ເພີ່ມທະວີການຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ເຂົ້າສູ່ລວງເລິກເຮັດໃຫ້ວຽກງານ ປກຊ-ປກສ ກາຍເປັນຂອງທົ່ວສັງຄົມຢ່າງແທ້ຈິງ, ຕັ້ງໜ້ານໍາພາ-ຊີ້ນໍາຢ່າງໃກ້ຊິດ, ແທດເຖິງ, ເລິກເຊິ່ງກວ່າເກົ່າຕໍ່ວຽກງານສະກັດກັ້ນ, ທັບມ້າງທຸກກົນອຸບາຍ, ການເຄື່ອນໄຫວຂອງອິດທິກໍາລັງປໍລະປັກ ແລະ ກຸ່ມຄົນບໍ່ດີ, ບັນດາໜໍ່ແໜງທີ່ຈະພາໃຫ້ເກີດມີຄວາມບໍ່ສະຫງົບ, ຕ້ອງກໍາແໜ້ນ ແລະ ເລີກ ຮື້ພວກເລັດລອດ-ລີ້ຊ້ອນ, ປອມຕົວຢູ່ຮາກຖານຕ່າງໆ ລວມທັງຢູ່ຫົວໜ່ວຍບໍລິຫານ, ວິຊາການ, ທຸລະກິດ ແລະ ຮາກຖານບ້ານ, ເປັນເຈົ້າການການແກ້ໄຂບັນດາໜໍ່ແໜງຄວາມບໍ່ສະຫງົບ, ປຸກລະດົມຂົນຂວາຍປະຊາຊົນ ກໍຄືທຸກພາກສ່ວນໃນສັງຄົມ ໃຫ້ເຂົ້າຮ່ວມວຽກງານ ປກຊ-ປກສ ທົ່ວປວງຊົນຮອບດ້ານ.
