ການແຂ່ງຂັນແລ່ນ ວຽງຈັນ ມາຣາທອນ ນາໆຊາດ ຄັ້ງທີ 4 ປະຈໍາປີ 2024 ຮັບປະກັນຄວາມມັນ ເນື່ອງຈາກມີນັກແລ່ນຈາກຕ່າງປະເທດເຂົ້າຮ່ວມ ພິເສດຝ່າຍຈັດການແຂ່ງຂັນຕັ້ງເປົ້າມີ 4.000 ກວ່າຄົນເຂົ້າຮ່ວມ ແລະ ເພີ່ມເງິນລາງວັນລວມເປັນ 200 ກວ່າລ້ານກີບ ກໍານົດຈັດການແຂ່ງຂັນໃນວັນທີ 15 ທັນວາ 2024.
ພິທີຖະແຫຼງຂ່າວກຽມຈັດການແຂ່ງຂັນແລ່ນ ວຽງຈັນ ມາຣາທອນ ນາໆຊາດ ຄັ້ງທີ 4 ປະຈໍາປີ 2024 ຈັດຂຶ້ນໃນຕອນແລງວັນທີ 28 ພະຈິກ 2024 ທີ່ Toyota square ໃນພາກຊັນ ນະຄອນຫຼວງວຽງຈັນ ສປປ ລາວ ໃຫ້ກຽດເຂົ້າຮ່ວມໂດຍ ທ່ານ ສີຈັນ ຈິດຕະປັນຍາ ວ່າການຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ສິດທິໄຊ ສັກປະເສີດ ຮອງປະທານສະຫະພັນ ແລ່ນ-ລານ ແຫ່ງຊາດລາວ, ທ່ານ ນາງ ວັນເພັງ ສຸດທິຈັກ ຜູ້ອໍານວຍການບໍລິສັດ ອີເອັຟຈີ ລາວ ແລະ ທ່ານ ຄູນິຫິໂກະ ອິນາດະ ຜູ້ອໍານວຍການໃຫຍ່, ບໍລິສັດ ໂຕໂຢຕ້າລາວ ພ້ອມດ້ວຍຕາງໜ້າຈາກ ນໍ້າດື່ມຫົວເສືອ ຈາກລິສັດເບຍລາວ ຈໍາກັດ, ນັກກິລາ ແລະ ສື່ມວນຊົນເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ ທ່ານ ນາງ ວັນເພັງ ສຸດທິຈັກ ຜູ້ອໍານວຍການບໍລິສັດ ອີເອັຟຈີ ລາວ ກ່າວວ່າ: ງານແລ່ນວຽງຈັນ ມາຣາທອນ ຈະໄດ້ຈັດຂື້ນຄັ້ງນີ້ ເປັນຄັ້ງທີ 4 ເຊິ່ງໄດ້ເປີດຮັບລົງທະບຽນ ຕັ້ງແຕ່ ວັນທີ 18 ຕຸລາ 2024 ມາຮອດປັດຈຸບັນ ມີຄົນລົງທະບຽນທັ້ງໝົດ 3,000 ກວ່າຄົນ ແລະ ຈະປິດລົງທະບຽນ ໃນວັນທີ 8 ທັນວາ 2024 ຈຸດປະສົງໃນການຈັດການແຂ່ງຂັນແມ່ນ ສົ່ງເສີມການມີ ສຸຂະພາບດີຂອງຄົນໃນສັງຄົມ, ເປັນເວທີສໍາຫຼັບນັກແລ່ນລາວເຮົາ ເພື່ອຝຶກຊ້ອມ ແລະເຂົ້າຮ່ວມການ ແຂ່ງຂັນໃນລະດັບ ສາກົນ ແລະ ນອກຈາກນັ້ນ ຍັງເປັນການກະຕຸ້ນ ສົ່ງເສີມ ປີທ່ອງທ່ຽວລາວ ໃນປີ 2024 ນີ້ໃຫ້ມີຄວາມຄຶກຄື້ນ ມ່ວນຊື່ນ ຜ່ານກິດຈະກຳນີ້, ເຊິ່ງຄາດຄະເນຜູ້ເຂົ້າຮ່ວມທັ້ງໝົດ 4,000 ກວ່າຄົນ.
ສໍາລັບ ວິສາຫະກິດ ສ່ວນບຸກຄົນ ອີເອັຟຈີ (EFG Laos) ຮ່ວມກັບ ສະຫະພັນແລ່ນ – ແລ່ນລານ ແຫ່ງຊາດ ລາວ ໂດຍການຊີ້ນໍາ ຂອງກະຊວງສຶກສາທິການ ແລະ ກິລາ ຈະໄດ້ຈັດການ ແຂ່ງຂັນ ແລ່ນວຽງຈັນ ມາຣາທອນ ຂື້ນວັນອາທິດ ວັນທີ 15 ທັນວາ 2024 ຊື່ງລວມມີ 4 ປະເພດ ໄລຍະທາງ ຄື ປະເພດ : ມາຣາທອນ (42 ກມ), ຮາຟ ມາຣາທອນ (21 ກມ), ປະເພດ ມິນິ ມາຣາທອນ (10 ກມ ) ແລະ ປະເພດ ແລ່ນຢ່າງ ເພື່ອສຸຂະພາບ (5 ກມ) ຊື່ງຈຸດປ່ອຍໂຕ ແລະເສັ້ນໄຊ ແມ່ນຢູ່ບໍລິເວນ ເດີ່ນທາດຫລວງ.
ພິເສດໃນປີ 2024 ນີ້ມີການຊິງຂັນ ແລະ ເງິນລາງວັນ ປະເພດທົ່ວໄປ ແລະປະເພດ ກຸ່ມອາຍຸ 1-5 ຄົນ (ຍິງ- ຊາຍ) ລວມ 190 ຂັນ ແລະເງິນລາງວັນລວມ ສູງສຸດເຖິງ 218,400,000 ກີບ ເຊິ່ງງານແລ່ນ ວຽງຈັນ ມາຣາທອນ ນາໆຊາດ ຄັ້ງນີ້ມີ ນໍ້າດື່ມກາຫົວເສືອ ທີ່ໃຫ້ການສະໜັບສະໜູນຫລັກ ແລະ ບໍລິສັດ ໂຕໂຢຕ້າ ລາວ, ເອັສທີ ເມືອງໄທປະກັນໄພ, Samsung, ຮ້ານຢາ ໃສສະອາດ, ສູນການ ແພດ ອາລີອານ, ຊຽງພຽວ, Royal D -Energy gel, ; ວິທະຍຸ 90.0 Mhz ແລະ ພາກສ່ວນອື່ນໆອີກ.
ຂ່າວ-ຮູບ: Larh Creators
