ວຽກຈຸດສຸມຂອງລັດຖະບານໃນເດືອນທັນວາ ແມ່ນສືບຕໍ່ສຸມໃສ່ຈັດຕັ້ງປະຕິບັດບັນດາມາດຕະການແກ້ໄຂບັນຫາເຄັ່ງຮ້ອນທາງດ້ານເສດຖະກິດ – ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ; ສືບຕໍ່ກວດກາລົດເຖື່ອນ, ລົດນໍາເຂົ້າບໍ່ຖືກຕ້ອງ ນໍາໃຊ້ບໍ່ຖືກເປົ້າໝາຍຢູ່ບັນດາແຂວງທີ່ຍັງເຫຼືອ, ສືບຕໍ່ເລັ່ງຂະຫຍາຍການຄຸ້ມຄອງແຮງງານຢ່າງລວມສູນ ແລະ ຫັນໄປສູ່ການຄຸ້ມຄອງ ແລະ ການບໍລິການທັນສະໄໝດ້ວຍລະບົບດີຈີຕອນ ໃຫ້ກວມເອົາທົ່ວເຖິງ.
ໃນຕອນແລງວັນທີ 22 ພະຈິກ 2024, ທ່ານ ສອນໄຊ ສິດພະໄຊ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ໂຄສົກລັດຖະບານ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຜົນກອງປະຊຸມສະໄໝສາມັນຂອງລັດຖະບານປະຈຳເດືອນພະຈິກ 2024 ໃຫ້ຮູ້ວ່າ: ກອງປະຊຸມ ໄດ້ໄຂຂຶ້ນໃນຕອນເຊົ້າວັນທີ 21 ແລະ ອັດລົງໃນຕອນບ່າຍ ວັນທີ 22 ພະຈິກ 2024 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງ – ອົງການ ເຂົ້າຮ່ວມແບບເຊິ່ງໜ້າ; ການນໍາຂອງບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກ ເພື່ອຮັບຟັງ ແລະ ປະກອບຄຳເຫັນຕໍ່ການລາຍງານສະພາບພົ້ນເດັ່ນປະຈຳເດືອນພະຈິກ ແລະ ທິດທາງແຜນວຽກຈຸດສຸມປະຈຳເດືອນທັນວາ 2024.
ສຳລັບວຽກຈຸດສຸມຂອງລັດຖະບານໃນເດືອນທັນວາ ແມ່ນສືບຕໍ່ສຸມໃສ່ຈັດຕັ້ງປະຕິບັດບັນດາມາດຕະການແກ້ໄຂບັນຫາເຄັ່ງຮ້ອນທາງດ້ານເສດຖະ ກິດ – ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ຕາມແຜນວຽກຈຸດສຸມຂອງຄະນະສະເພາະກິດ 19/ກມສພ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ໃຫ້ສຳເລັດຕາມແຜນທີ່ກຳນົດໄວ້.
ສືບຕໍ່ສຸມໃສ່ເກັບລາຍຮັບຈາກຖານລາຍຮັບທີ່ມີແລ້ວໃຫ້ໄດ້ຄົບຖ້ວນ, ຈໍາກັດການຍົກເວັ້ນການປະຕິບັດພັນທະຕ່າງໆ, ກະຊວງກ່ຽວຂ້ອງເລັ່ງພັດທະນາລະບົບຊໍາລະສະສາງຕ່າງໆ ຜ່ານລະບົບທະນາຄານ ເພື່ອຫັນການຈັດເກັບລາຍຮັບເປັນທັນສະໄໝໃຫ້ສຳເລັດຕາມແຜນ, ຄົ້ນຄວ້າສ້າງຖານລາຍຮັບໃໝ່ ເພື່ອຮັບປະກັນຖານລາຍຮັບໃຫ້ໝັ້ນຄົງ.
ສືບຕໍ່ກວດກາລົດເຖື່ອນ, ລົດນໍາເຂົ້າບໍ່ຖືກຕ້ອງ ນໍາໃຊ້ບໍ່ຖືກເປົ້າໝາຍ ຢູ່ບັນດາແຂວງທີ່ຍັງເຫຼືອ, ຮີບຮ້ອນແກ້ໄຂ ສຳລັບເປົ້າໝາຍທີ່ໄດ້ກວດພົບເຫັນ ແລະ ສັງລວມແລ້ວ ໂດຍສະເພາະການຈັດຕັ້ງປະຕິບັດມາດຕະການປັບໃໝ.
ສືບຕໍ່ຊຸກຍູ້, ສົ່ງເສີມການຜະລິດສິນຄ້າທົດແທນການນໍາເຂົ້າ ແລະ ການຜະລິດເພື່ອສົ່ງອອກ, ໃນນີ້ສຸມໃສ່ການຜະລິດລະດູແລ້ງ ຕ້ອງໄດ້ກະກຽມລະບົບສະໜອງນ້ຳໃຫ້ພື້ນທີ່ການຜະລິດ, ການສ້າງໂຮງງານຜະລິດຝຸ່ນປຸ໋ຍໃຫ້ພຽງພໍ ເພື່ອຊ່ວຍຫຼຸດຜ່ອນຕົ້ນທຶນ; ດຸ່ນດ່ຽງການນໍາເຂົ້າ – ສົ່ງອອກສິນຄ້າ ຕິດພັນກັບການດຸ່ນດ່ຽງດັດສົມ ຄວາມຕ້ອງການເງິນຕາຕ່າງປະເທດ, ປະຕິບັດມາດຕະການຈໍາກັດການນໍາເຂົ້າສິນຄ້າ ທີ່ພາຍໃນຜະລິດໄດ້ພຽງພໍ ເປັນຕົ້ນ ເບຍ, ເຄື່ອງດື່ມ, ສະບຽງອາຫານ, ຕິດຕາມ, ກວດກາ, ປ້ອງກັນ ແລະ ສະກັດກັ້ນການລັກລອບນຳເຂົ້າສິນຄ້າຕາມປ່ອງຂ້າມລອຍຕ່າງໆ.
