ໂຄງການພັດທະນາແຫຼ່ງທ່ອງທ່ຽວອ່າງນໍ້າງື່ມ 1 ໃກ້ຈະສຳເລັດສົມບູນ ເຊິ່ງຈະກາຍເປັນຈຸດທ່ອງທ່ຽວສຳຄັນອີກແຫ່ງໜຶ່ງ ເພາະໄດ້ມີການປັບປຸງໃຫ້ມີຄວາມງົດງາມ ຮອງຮັບການທ່ອງທ່ຽວໄດ້ຫຼາກຫຼາຍຂຶ້ນ.
ໂຄງການພັດທະນາແຫຼ່ງທ່ອງທ່ຽວອ່າງນໍ້າງື່ມ1 ຢູ່ເມືອງແກ້ວອຸດົມ ແຂວງວຽງຈັນ ແມ່ນໂຄງການໜຶ່ງທີ່ນອນຢູ່ໃນໂຄງການພັດທະນາໂຄງລ່າງພື້ນຖານສົ່ງເສີມການທ່ອງທ່ຽວໃນອະນຸພາກພື້ນແມ່ນ້ຳຂອງ ໄລຍະ 2 ໂດຍໄດ້ຮັບທຶນຊ່ວຍເຫຼືອລ້າຈາກທະນາຄານອາຊີ ເລີ່ມຕົ້ນປັບປຸງແຕ່ປີ 2021 ເປັນຕົ້ນມາ ເຊິ່ງແມ່ນກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເປັນເຈົ້າຂອງໂຄງການ.
ໂຄງການນີ້ ໄດ້ຈັດຕັ້ງປະຕິບັດມາແຕ່ກາງປີ 2017 ແລະ ກຳນົດສຳເລັດໃນກາງປີ 2023 ມູນຄ່າການກໍ່ສ້າງຕາມສັນຍາເບື້ອງຕົ້ນແມ່ນ 4,6 ລ້ານໂດລາ, ແຕ່ເນື່ອງຈາກວ່າໃນການກໍ່ສ້າງໂຄງການໄດ້ມີໜ້າວຽກເພີ່ມ ພາຍຫຼັງທີ່ໄດ້ປະຕິບັດຕົວຈິງ, ດັ່ງນັ້ນຈຶ່ງໄດ້ມີການຕໍ່ສັນຍາອອກໄປອີກ 1 ປີ ລວມເປັນມູນຄ່າທັງໝົດໃນສັນຍາ 5,3 ລ້ານກວ່າໂດລາ ຈະສຳເລັດສົມບູນພາຍໃນປີ 2024 ນີ້.
ບັນດາໜ້າວຽກຕົ້ນຕໍໃນການພັດທະນາປະກອບມີ: ການກໍ່ສ້າງເສັ້ນທາງຄືນໃໝ່ ນັບແຕ່ທາງແຍກເຂົ້າໜ້າເຂື່ອນນ້ຳງື່ມ1 ເລາະໄປຕາມທາງເກົ່າ ແລະ ຕັດທາງໃໝ່ມາຈອດກັບທາງເລກທີ 10, ໜ້າທາງມີຄວາມ ກວ້າງ 6 ແມັດ ຍາວ 6,37 ກິໂລແມັດ ເປັນທາງຄອນກຣີດ.
ທາງພາຍໃນເຂດທ່າຈອດເຮືອມີ ຄວາມຍາວ 0,67 ກິໂລແມັດ ປູດ້ວຍຄອນກຣີດປະທັບລາຍ. ພ້ອມນັ້ນ, ກໍໄດ້ສ້າງຈຸດຊົມວິວແຄມທາງ, ສ້າງຮ່ອງນ້ຳຂ້າງທາງ, ສ້າງສິ່ງປ້ອງກັນຕາຝັ່ງເຈື່ອນ, ສ່ວນຈຸດບໍລິການ ແມ່ນຈະພັດທະນາທ່າຈອດເຮືອແຄມງື່ມ, ກໍ່ສ້າງປະຕູຕ້ອນຮັບ, ປັບປຸງທິວທັດ, ບ່ອນຈອດລົດ ( ກາງແຈ້ງ ແລະ ໃນຮົ່ມ ), ສະຖານທີ່ຖິ້ມຂີ້ເຫຍື້ອ, ທາງຍ່າງຊົມວິວ, ທ່າເຮືອ, ທາງລົງທ່າເຮືອ, ທາງສຳລັບຄົນພິການ, ສ້າງອາຄານຮ້ານຄ້າ ແລະ ອື່ນໆ.
ເພື່ອກະກຽມຄວາມພ້ອມ ສຳລັບການເປີດບໍລິການນັກທ່ອງທ່ຽວຢູ່ເຂດໜ້າເຂື່ອນນໍ້າງື່ມ ກະຊວງ ຖວທ ຮ່ວມກັບ ພະແນກ ຖວທ ແຂວງວຽງຈັນ ໄດ້ຈັດຊຸດຝຶກອົບຮົມໃຫ້ຜູ້ປະກອບການທຸລະກິດຂະໜາດນ້ອຍ ແລະ ກາງ ຢູ່ສະຖານທີ່ທ່ອງທ່ຽວເຂດໜ້າເຂື່ອນນໍ້າງື່ມ 1, ໃນການສ້າງແຜນທຸລະກິດ, ການກະກຽມ ຄວາມພ້ອມໃນການເປີດບໍລິການ, ການບໍລິການອາຫານ ແລະ ເຄື່ອງດື່ມ ແລະ ການນໍາສະເໜີຜະລິດຕະພັນທີ່ແທດເໝາະກັບຄວາມຕ້ອງການຂອງນັກທ່ອງທ່ຽວ, ການຈັດວາງຜະລິດຕະພັນ, ທັກສະການບໍລິການ ແລະ ການຂາຍ.
