ທຫລ ໄດ້ເປັນເຈົ້າການຊຸກຍູ້ການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ເຊິ່ງໄດ້ອະນຸມັດ 44 ຫົວໜ່ວຍ ລວມວົງເງິນກູ້ຢືມ 4.532 ຕື້ກວ່າກີບ; ສ່ວນນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນໄດ້ອະນຸມັດໃຫ້ 419 ຫົວໜ່ວຍ ລວມວົງເງິນກູ້ຢືມ 756,73 ຕື້ກີບ.
ວັນທີ 25 ພະຈິກ 2024, ທ່ານ ນາງ ວັດທະນາ ດາລາລອຍ ຮັກສາການຜູ້ວ່າທະນາຄານ ແຫ່ງ ສປປ ລາວ ( ທຫລ ) ໄດ້ຊີ້ແຈງຕໍ່ຄຳຊັກຖາມຂອງສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ໃນຫຼາຍບັນຫາສຳຄັນ ເຊັ່ນ: ໃນໄລຍະຜ່ານມາ, ລັດຖະບານ ໄດ້ມີນະໂຍບາຍສົ່ງເສີມການຜະລິດເປັນສິນຄ້າ ເພື່ອທົດແທນການນໍາເຂົ້າ ສ້າງຄວາມເຂັ້ມແຂງໃຫ້ແກ່ພື້ນຖານການຜະລິດພາຍໃນ, ສ້າງຄວາມເຂັ້ມແຂງໃຫ້ແກ່ຫົວໜ່ວຍວິສາຫະກິດ, ການຜະລິດສະບຽງອາຫານ ແລະ ການຜະລິດເປັນສິນຄ້າໃຫ້ມີຄວາມຫຼາກຫຼາຍ ເພື່ອຊົມໃຊ້ພາຍໃນ.
ເພື່ອຜັນຂະຫຍາຍນະໂຍບາຍດັ່ງກ່າວ ທຫລ ໄດ້ເປັນເຈົ້າການຊຸກຍູ້ການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ນັບແຕ່ເລີ່ມຈັດຕັ້ງປະຕິບັດໃນເດືອນ 11 ປີ 2023 ຮອດວັນທີ 31 ຕຸລາ 2024 ໄດ້ອະນຸມັດ 44 ຫົວໜ່ວຍໃຫ້ເຂົ້າຮັບນະໂຍບາຍ ລວມວົງເງິນກູ້ຢືມທັງໝົດຈາກແຫຼ່ງທຶນຂອງທະນາຄານທຸລະກິດ ຈໍານວນ 4.532,50 ຕື້ກີບ; ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ໄດ້ອະນຸມັດໃຫ້ 419 ຫົວໜ່ວຍ ຢູ່ 18 ແຂວງ ທົ່ວປະເທດ ລວມວົງເງິນກູ້ຢືມ 756,73 ຕື້ກີບ.
ຕໍ່ກັບການເຂົ້າເຖິງສິນເຊື່ອໃນແຕ່ລະຂະແໜງການ ທຫລ ກໍເປັນເຈົ້າການຊຸກຍູ້ໃຫ້ ທທກ ປ່ອຍສິນເຊື່ອ ເຊິ່ງຮອດວັນທີ 31 ຕຸລາ 2024 ຍອດເຫຼືອສິນເຊື່ອຂອງລະບົບທະນາຄານຢູ່ໃນລະດັບ 203.029,80 ຕື້ກີບ ຂະຫຍາຍຕົວ 18,81% ທຽບໃສ່ໄລຍະດຽວກັນຂອງປີຜ່ານມາ ກວມເອົາ 64,18% ຂອງ GDP.
ໃນນັ້ນ, ສິນເຊື່ອຂອງທະນາຄານທຸລະກິດ ໃນຂະແໜງອຸດສາຫະກໍາ ກວມເອົາ 33,29% ( ເພີ່ມຂຶ້ນ 34,34% ທຽບໃສ່ໄລຍະດຽວກັນຂອງປີຜ່ານມາ ), ຂະແໜງການຄ້າ ກວມເອົາ 19,48% ( ເພີ່ມຂຶ້ນ 20,57% ), ຂະແໜງການບໍລິການ ກວມເອົາ 14,21% ( ເພີ່ມຂຶ້ນ 25,59% ), ຂະແໜງກໍ່ສ້າງ ກວມເອົາ 10,77% ( ຫຼຸດລົງ 10,10% ), ຂະແໜງກະສິກໍາ – ປ່າໄມ້ ກວມເອົາ 5,82% ( ເພີ່ມຂຶ້ນ 42,49% ) ແລະ ຂະແໜງການອື່ນໆ ກວມເອົາ 16,43% ຂອງຍອດສິນເຊື່ອທັງໝົດ.
