ນາຍົກຢືນຢັນປີ 2025 ລັດຖະບານ ໄດ້ປັບປຸງເພີ່ມເງິນອຸດໜູນພະນັກງານ – ລັດຖະກອນຂັ້ນຕໍ່າ ຈະຢູ່ໃນລະດັບ 2.200.000 ກີບຕໍ່ຄົນຕໍ່ເດືອນ, ຄາດໝາຍແມ່ນຈະເລີ່ມຈັດຕັ້ງປະຕິບັດໃນງວດ I ປີ 2025.
ວັນທີ 26 ພະຈິກ, ທ່ານ ສອນໄຊ ສີພັນດອນ ນາຍົກລັດຖະມົນຕີ ຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ກ່ຽວກັບນະໂຍບາຍຄ່າຄອງຊີບຂອງພະນັກງານ – ລັດຖະກອນ, ທະຫານ ແລະ ຕຳຫຼວດ ວ່າ: ຕະຫຼອດໄລຍະຜ່ານມາ ລັດຖະບານໄດ້ຖືສໍາຄັນ ແລະ ເປັນບຸລິມະສິດໃນການປັບປຸງເງິນເດືອນ, ເງິນນະໂຍບາຍຕ່າງໆຂອງພະນັກງານ, ລັດຖະກອນ, ທະຫານ, ຕໍາຫຼວດ ແລະ ພະນັກງານບໍານານ ເຊິ່ງໄດ້ມີການເພີ່ມດັດສະນີ, ເພີ່ມເງິນຄ່າຄອງຊີບເປັນແຕ່ລະໄລຍະ ເປັນຕົ້ນແມ່ນໃນປີ 2023 ໄດ້ເພີ່ມເງິນອຸດໜູນຄ່າຄອງຊີບ 150.000 ກີບ ແລະ ຍົກລະດັບເງິນເດືອນຂັ້ນຕໍ່າ ມາເປັນ 1.700.000 ກີບ.
ໃນປີ 2024 ໄດ້ເພີ່ມອຸດໜູນຄ່າຄອງຊີບຕື່ມ 150.000 ກີບ ເຮັດໃຫ້ເງິນເດືອນຂັ້ນຕໍ່າໃນ ປີ 2024 ມາເປັນ 1.850.000 ກີບ, ສະເລ່ຍນໍາໃຊ້ງົບປະມານປີລະປະມານ 1.200 ຕື້ກີບ.
ພ້ອມນັ້ນ, ໃນປີ 2025 ລັດຖະບານ ໄດ້ປັບປຸງເພີ່ມເງິນອຸດໜູນພະນັກງານ – ລັດຖະກອນ ໂດຍສະເພາະການເພີ່ມນະໂຍບາຍອຸດໜູນຄ່າຄອງຊີບ, ປັບປຸງນະໂຍບາຍອຸດໜູນຕໍາແໜ່ງບໍລິຫານ ໂດຍໂຮມເອົາເງິນອຸດໜູນຕໍາແໜ່ງບໍລິຫານ ແລະ ນະໂຍບາຍນໍ້າມັນບຸກຄົນ ໃຫ້ເປັນດຽວກັນ, ປັບປຸງເງິນອຸດໜູນອາຍຸການເພີ່ມຂຶ້ນ 100% ຂອງທຸກໄລຍະ, ປັບປຸງເພີ່ມເງິນນະໂຍບາຍລູກ ແລະ ເມຍ ຂຶ້ນ.
ຄາດໝາຍແມ່ນຈະເລີ່ມຈັດຕັ້ງປະຕິບັດໃນງວດ I ປີ 2025 ເຊິ່ງຈະເຮັດໃຫ້ເງິນເດືອນຂັ້ນຕໍ່າ ຂອງພະນັກງານ – ລັດຖະກອນ ຈະຢູ່ໃນລະດັບ 2.200.000 ກີບຕໍ່ຄົນຕໍ່ເດືອນ. ແຫຼ່ງທຶນເພື່ອຮອງຮັບໃນການປະຕິບັດນະໂຍບາຍດັ່ງກ່າວ ແມ່ນນໍາໃຊ້ແຫຼ່ງລາຍຮັບພາຍໃນທັງໝົດ ແລະ ເງິນເກີນແຜນຂອງທ້ອງຖິ່ນຈໍານວນໜຶ່ງ.
ສໍາລັບການອຸດໜູນໃຫ້ແກ່ແຮງງານຂັ້ນຕໍ່າ ຈາກ 1.600.000 ກີບຕໍ່ຄົນຕໍ່ເດືອນ ມາເປັນ 2.500.000 ກີບຕໍ່ຄົນຕໍ່ເດືອນ ໄດ້ເລີ່ມຈັດຕັ້ງປະຕິບັດໃນເດືອນຕຸລາ 2024 ເປັນຕົ້ນມາ.
