ສະພາການຄ້າ ແລະ ອຸດສາຫະກໍາແຫ່ງຊາດລາວ(ສຄອຊ)ຮ່ວມກັບສະມາຄົມຮ່ວມມືທາງວິຊາການ ແລະ ການພັດທະນາທີ່ຍືນຍົງ ລະຫວ່າງປະເທດ (AOTS) ແຫ່ງປະເທດຍີ່ປຸ່ນ ໄດ້ຈັດຊຸດຝືກອົບຮົມ ການປັບປຸງການເຊື່ອມໂຍງ ແລະ ການສົ່ງເສີມອຸດສາຫະກໍາທ້ອງຖີ່ນ ຂຶ້ນໃນວັນ 28 ພະຈິກ 2024 ທີ່ ສຄອຊ ເປັນປະທານຂອງທ່ານ ດາວວອນ ພະຈັນທະວົງ ຮອງປະທານ ສຄອຊ, ທ່ານ ນາງ ວາຕານາເບະ ໂທໂມະ ຜູ້ຊ່ວຍ ຜູ້ຈັດການ ພະແນກ ສົ່ງເສີມການຄ້າ (AOTS)ເຂົ້າຮ່ວມ(ຜ່ານລະບົບອອນລາຍ)ມີທ່ານ ສາສະດາຈານ ດຣ. ໂມໂຕະໂຢຊິ ຊູຊູກິ ມີຜູ້ປະກອບການເຂົ້າຮ່ວມ.
ທ່ານ ດາວວອນ ພະຈັນທະວົງ ຮອງປະທານ ສຄອຊ ກ່າວວ່າ: ໂຄງການຝຶກອົບຮົມຂອງ AOTS ກ່ຽວກັບ “ການປັບປຸງ ການເຊື່ອມໂຍງ ແລະ ສົ່ງເສີມອຸດສາຫະກຳທ້ອງຖິ່ນ” ໂດຍຈັດຂຶ້ນຮ່ວມກັນລະຫວ່າງ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ແລະ ສະມາຄົມຮ່ວມມືທາງວິຊາການ ແລະ ການພັດທະນາທີ່ຍືນຍົງ ລະຫວ່າງປະເທດ (AOTS) ແຫ່ງປະເທດຍີ່ປຸ່ນ.
ທ່ານກ່າວວ່າ: ມື້ນີ້ເປັນໂອກາດສໍາຄັນທີ່ພວກເຮົາໄດ້ມາເຕົ້າໂຮມກັນ ແລະ ເພື່ອສຳຫຼວດ ແລະ ທຳຄວາມເຂົ້າໃຈກ່ຽວກັບຍຸດທະສາດໃນການເສີມສ້າງການເຊື່ອມໂຍງ, ສົ່ງເສີມອຸດສາຫະກຳທ້ອງຖິ່ນ, ແລະ ແກ້ໄຂຄວາມທ້າທາຍທາງດ້ານເສດຖະກິດອັນສໍາຄັນທີ່ພວກເຮົາກໍາລັງປະເຊີນຢູ່. ນັບຕັ້ງແຕ່ໄດ້ຮັບການສ້າງຕັ້ງໃນປີ 1959, AOTS ໄດ້ເປັນຜູ້ນຳລະດັບໂລກທາງດ້ານການພັດທະນາຊັບພະຍາກອນມະນຸດ, ສົ່ງເສີມການເຕີບໃຫຍ່ຂະຫຍາຍຕົວຂອງອຸດສາຫະກຳ ແລະ ສະໜັບສະໜູນຄວາມຮ່ວມມືລະຫວ່າງປະເທດ.ດ້ວຍຈຳນວນຜູ້ເຂົ້າຮັບການຝຶກອົບຮົມຫຼາຍກວ່າ 460.000 ຄົນຈາກ 170 ປະເທດ, AOTS ຖືກມອບໝາຍໃຫ້ເປັນເສົາຫຼັກດ້ານຄວາມຊ່ຽວຊານທາງເທັກນິກ ແລະ ການຄຸ້ມຄອງບໍລິຫານທົ່ວໂລກ. ການຈັດຕັ້ງສະມາຄົມສິດເກົ່າ 74 ແຫ່ງໃນ 45 ປະເທດ ສະທ້ອນໃຫ້ເຫັນເຖິງຄວາມສຳເລັດໃນການສ້າງຄວາມຮ່ວມມືທີ່ຍືນຢົງ.
ຢູ່ປະເທດລາວ, ການຮ່ວມມືຂອງພວກເຮົາກັບ AOTS ນັ້ນມີຄວາມສໍາຄັນເປັນຢ່າງຍິ່ງ ໃນຂະນະທີ່ພວກເຮົາກໍາລັງພະຍາຍາມແກ້ໄຂສິ່ງທ້າທາຍທາງດ້ານເສດຖະກິດ ແລະ ຄົ້ນຫາໂອກາດໃໝ່ໃນການພັດທະນາ. ໂຄງການ ຝຶກອົບຮົມນີ້ສະທ້ອນໃຫ້ເຫັນເຖິງຄວາມມຸ່ງໝັ້ນຂອງພວກເຮົາໃນການຍົກລະດັບທັກສະ ແລະ ຄວາມຮູ້ຂອງບຸກຄະກອນທາງອຸດສາຫະກຳໃນ ສປປ ລາວ, ເພື່ອໃຫ້ໝັ້ນໃຈວ່າ: ພວກເຮົາຈະຍັງຄົງມີການປັບປຸງຕໍ່ໜ້າສະພາບການປ່ຽນແປງໃນລະດັບໂລກ ແລະ ລະດັບພູມີພາກ.ໂຄງການ ຝຶກອົບຮົມນີ້ມີຄວາມເໝາະສົມຫຼາຍ.
ການຝືກອົບຮົມ ຈະກິດຈະກໍາໃນຫຼາຍຫົວຂໍ້ທີ່ສຳຄັນ ດັ່ງຕໍ່ໄປນີ້:ສະພາບເສດຖະກິດຂອງລາວ ກ່ອນ ແລະ ຫຼັງ ໂຄວິດ-19; ວິວັດທະນາການ ແລະ ຄວາມກ້າວໜ້າຂອງເຂດເສດຖະກິດພິເສດ (SEZs); ຍຸດທະສາດໃນການສົ່ງເສີມການລົງທຶນຈາກຕ່າງປະເທດການເພີ່ມປະສິດທິພາບຄວາມເຊື່ອມໂຍງ ແລະ ສົ່ງເສີມການພັດທະນາອຸດສາຫະກຳທ້ອງຖິ່ນ; ການແກ້ໄຂບັນຫາເສດຖະກິດມະຫາພາກ ລວມທັງການສຳຮອງເງິນຕາຕ່າງປະເທດ, ອັດຕາເງິນເຟີ້, ແລະ ຄວາມຜັນຜວນຂອງອັດຕາແລກປ່ຽນ.
ຂ້າພະເຈົ້າ ຮູ້ສຶກເປັນກຽດຢ່າງຍິ່ງທີ່ມີ ທ່ານ ສາສະດາຈານ ດຣ. ໂມໂຕະໂຢຊິ ຊູຊູກິ ເປັນວິທະຍາກອນຂອງພວກເຮົາ. ດ້ວຍປະສົບການອັນຍາວນານຂອງ ທ່ານ ທັງໃນດ້ານວິຊາການ ອຸດສາຫະກຳ,ແລະ ການໃຫ້ຄຳປຶກສາດ້ານນະໂຍບາຍ, ຄຳເຫັນຂອງ ທ່ານ ດຣ. ຊູຊູກິ ຈະສົ່ງເສີມມຸມມອງໃໝ່ທີ່ມີຄຸນຄ່າ ແລະ ຍຸດທະສາດທີ່ສາມາດນຳໄປປະຕິບັດໄດ້ຈິງ ສຳລັບການພັດທະນາເສດຖະກິດທີ່ສະຫຼັບຊັບຊ້ອນ.
ໂຄງການນີ້ ຍັງເປັນໂອກາດສໍາຄັນສໍາລັບທຸລະກິດລາວ ໃນການໃຊ້ປະໂຫຍດຈາກບົດຮຽນທີ່ໄດ້ຮັບຈາກຄວາມຊ່ຽວຊານ ແລະ ຜົນສໍາເລັດຂອງປະເທດຍີ່ປຸ່ນໃນການສົ່ງເສີມການເຕີບໃຫຍ່ຂະຫຍາຍຕົວທາງເສດຖະກິດ ຜ່ານການເຊື່ອມໂຍງທາງຍຸດທະສາດ ແລະ ການອຸດສາຫະກຳດ້ວຍການປະສານສົມທົບບົດຮຽນເຫຼົ່ານີ້ ເຂົ້າກັບເສັ້ນທາງການພັດທະນາຂອງຕົນເອງ, ພວກເຮົາສາມາດຍົກລະດັບບົດບາດຂອງ ສປປ ລາວ ພາຍໃນພູມີພາກ ແລະ ສາກົນໄດ້.
ນັກສຳມະນາກອນທີ່ນັບຖືກ ຮັກແພງ, ຜູ້ນໍາທຸລະກິດ, ຜູ້ບໍລິຫານ, ແລະ ຜູ້ຈັດການ. ຂ້າພະເຈົ້າ ຂໍໃຫ້ ທຸກໆທ່ານ ເອົາໃຈໃສ່ ແລະ ມີສ່ວນຮ່ວມໃນການຝຶກອົບຮົມຄັ້ງນີ້, ແບ່ງປັນປະສົບການ,ຄວາມທ້າທາຍ, ແລະ ຄວາມຄາດຫວັງ ມຸ່ງໝັ້ນ ຂອງ ທ່ານ; ເນື່ອງຈາກໂຄງການນີ້ໄດ້ຮັບການອອກແບບມາບໍ່ພຽງແຕ່ເພື່ອຖ່າຍທອດຄວາມຮູ້ ແຕ່ຍັງເພື່ອສົ່ງເສີມການສົນທະນາ ແລະ ຄວາມຮ່ວມມືຢ່າງສ້າງສັນລະຫວ່າງພາກສ່ວນກ່ຽວຂ້ອງດ້ວຍກັນນຳອີກດ້ວຍ.
