ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ແຜນປະຈໍາປີ 2025 ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 28 ພະຈິກ 2024 ພາຍໃຕ້ການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.
ທ່ານ ນາງວຽງທອງ ສີພັນດອນ ລາຍງານວ່່າ: ໃນປີ 2024 ສານປະຊາຊົນສູງສຸດ ໄດ້ ພິຈາລະນາຕັດສິນຄະດີ ໂດຍຜູ້ພິພາກສາຜູ້ດຽວ ໄດ້ 316 ເລື່ອງ ແລະ ຈັດຕັ້ງຄະນະສານເຄື່ອນທີ່ໄປຕັດສິນຢູ່ຄ້າຍຄຸມຂັງ ແລະ ທ້ອງຖິ່ນບ່ອນຄູ່ຄວາມອາໄສຢູ່ ໄດ້ 163 ເລື່ອງ. ພ້ອມນັ້ນ, ໄດ້ສຸມໃສ່ການພິຈາລະນາແກ້ໄຂຄະດີ 3 ຂັ້ນສາມາດແກ້ໄຂໄດ້ດັ່ງນີ້: ຄະດີຂັ້ນຕົ້ນ (ສານປະຊາຊົນເຂດ, ສານປະຊາຊົນແຂວງ ແລະ ສານທະຫານ) ແກ້ໄຂໄດ້ມີ: ຄະດີອາຍາ ແກ້ໄຂໄດ້ 83,99%, ຄະດີແພ່ງ ແກ້ໄຂໄດ້ 60,35%. ຄະດີການຄ້າ ແກ້ໄຂໄດ້ 26,52%, ຄະດີຄອບຄົວ ແກ້ໄຂໄດ້ 55,48%, ຄະດີເດັກ ແກ້ໄຂໄດ້ 78,91%, ຄະດີແຮງງານ ແກ້ໄຂໄດ້ 47,61%, ຄະດີປົກຄອງ ແກ້ໄຂໄດ້ 40%, ສານທະຫານພາກ ແກ້ໄຂໄດ້ 93,50%, ຕັດສິນຄະດີໄປແລ້ວ ມີການຂໍອຸທອນ 11.21% ຂອງຄະດີ ທີ່ໄດ້ແກ້ໄຂເປັນຂັ້ນຕົ້ນ; ຄະດີຂັ້ນອຸທອນ (ສານປະຊາຊົນ ແຂວງ, ສານພາກ ແລະ ສານທະຫານຂັ້ນສູງ) ແກ້ໄຂໄດ້ມີ: ຄະດີອາຍາ ແກ້ໄຂໄດ້ 46,59%, ຄະດີແພ່ງ ແກ້ໄຂໄດ້ 39,09%, ຄະດີການຄ້າ ແກ້ໄຂໄດ້ 6,00%, ຄະດີຄອບຄົວ ແກ້ໄຂໄດ້ 46.26%, ຄະດີແຮງງານ ແກ້ໄຂໄດ້ 18.18%, ຄະດີເດັກ (ສານປະຊາຊົນພາກ) ແກ້ໄຂໄດ້ 94.16%, ສານທະຫານຂັ້ນສູງແກ້ໄຂໄດ້ 57,14%; ຄະດີຂັ້ນລົບລ້າງ (ສານປະຊາຊົນພາກ) ແກ້ໄຂໄດ້ແຕ່ລະປະເພດຂອງຄະດີມີ: ຄະດີອາຍາ ແກ້ໄຂໄດ້ 55%, ຄະດີແພ່ງ ແກ້ໄຂໄດ້ 29,41%, ຄະຕິຄອບຄົວ ແກ້ໄຂໄດ້ 28,57%, ຄະດີແຮງງານ ແກ້ໄຂໄດ້ 50%; ຄະດີຂັ້ນລົບລ້າງ (ສານປະຊາຊົນສູງສຸດ) ແກ້ໄຂໄດ້ ແຕ່ລະປະເພດຂອງຄະດີມີ: ຄະດີອາຍາ ແກ້ໄຂໄດ້ 92,40%, ຄະດີແພ່ງ ແກ້ໄຂໄດ້ 76,06%, ຄະດີການຄ້າ ແກ້ໄຂໄດ້ 92,85%, ຄະດີຄອບຄົວ ແກ້ໄຂໄດ້ 86,66%, ຄະດີເດັກ ແກ້ໄຂໄດ້ 100%, ຄະດີແຮງງານ ແກ້ໄຂໄດ້ 100%. ນອກຈາກນັ້ນ, ສານປະຊາຊົນສູງສຸດ ໄດ້ພິຈາລະນາຄໍາສະເໜີຮື້ຟື້ນຄະດີໄດ້ 75,32%.
ທ່ານ ນາງວຽງທອງ ສີພັນດອນ ກ່າວຕື່ມວ່າ: ສໍາລັບທິດທາງແຜນການ ປະຈໍາປີ 2025 ຈະສືບຕໍ່ການແກ້ໄຂຄະດີຢູ່ສານປະຊາຊົນ ໃຫ້ວ່ອງໄວບັນລຸຕາມຄາດໝາຍດັ່ງນີ້: ຄະດີອາຍາໃຫ້ບັນລຸໄດ້ 90% ຂຶ້ນໄປ; ຄະດີແພ່ງ, ການຄ້າໃຫ້ບັນລຸໄດ້ 75% ຂຶ້ນໄປ; ຄະດີຄອບຄົວ, ແຮງງານ, ເດັກ, ຄະດີປົກຄອງ ໃຫ້ບັນລຸ 85% ຂຶ້ນໄປ. ໃນນັ້ນ, ເພື່ອຮັບປະກັນໃຫ້ແຜນການປະຈໍາປີ 2025 ໄດ້ຮັບການຈັດຕັ້ງປະຕິບັດຕາມຄາດໝາຍ, ເປັນຮູບປະທຳ, ມີຜົນສໍາເລັດຢ່າງມີຄຸນພາບໃນແຕ່ລະຂົງເຂດວຽກງານຂອງສານ ຕ້ອງເອົາໃຈໃສ່ບາງມາດຕະການຕົ້ນຕໍເປັນຕົ້ນ ຫ້ອງການ, ກົມ, ສະຖາບັນຄົ້ນຄວ້າ ແລະ ຝຶກອົບຮົມ, ຄະນະສານຂອງສານປະຊາຊົນສູງສຸດ, ສານປະຊາຊົນທ້ອງຖິ່ນ ແລະ ສານທະຫານ ຕ້ອງເປັນເຈົ້າການຈັດຕັ້ງເຜີຍແຜ່, ຄົ້ນຄວ້າ, ເຊື່ອມຊຶມໃຫ້ແກ່ພະນັກງານທີ່ຢູ່ໃນຄວາມຮັບຜິດຊອບຂອງຕົນຮັບຮູ້ແລະເຂົ້າໃຈຢ່າງເລິກເຊິ່ງ ພ້ອມທັງຈັດຕັ້ງຜັນຂະຫຍາຍເປັນແຜນການເຄື່ອນໄຫວວຽກງານປະຈຳປີ ໃຫ້ເປັນແຜນງານ, ໂຄງການ ແລະ ກິດຈະກຳ ທີ່ສອດຄ່ອງກັບສະພາບຄວາມເປັນຈິງໃນແຕ່ລະໄລຍະ.
