ເຈົ້າພາບງານມະຫາກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ໄດ້ມີການແຕ່ງຕັ້ງຄະນະຮັບຜິດຊອບລະດັບຊາດ ຈັດງານມະຫາກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ຢ່າງເປັນທາງການໃນຕອນເຊົ້າຂອງວັນທີ 26 ພະຈິກ 2024 ທີ່ຫ້ອງປະຊຸມ ຫ້ອງການປົກຄອງນະຄອນຫຼວງ ໃຫ້ກຽດເຂົ້າຮ່ວມໂດຍ ທ່ານ ປອ. ອາດສະພັງທອງ ສີພັນດອນ ກຳມະການສູນກາງພັກ ຮອງເລຂາຄະນະບໍລິຫານພັກ, ເຈົ້າຄອງນະຄອນຫຼວງວຽງຈັນ, ປະທານຈັດງານມະຫາກຳກິລາແຫ່ງຊາດ ຄັ້ງທີ XII, ທ່ານ ຮສ. ປອ. ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ແລະ ພ້ອມດ້ວຍຄະນະ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ລາຍງານວ່າ: ນາຍົກລັດຖະມົນຕີ ອອກຂໍ້ຕົກລົງ ເລກທີ 33/ນຍ ນະຄອນຫຼວງວຽງຈັນ ລົງວັນທີ 02.02.2024 ວ່າດ້ວຍການແຕ່ງຕັ້ງຄະນະຮັບຜິດຊອບລະດັບຊາດ ຈັດງານມະຫາກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ນາຍົກລັດຖະມົນຕີ ຕົກລົງ:
ມາດຕາ 1 ແຕ່ງຕັ້ງຄະນະຮັບຜິດຊອບລະດັບຊາດ ຈັດງານມະຫາກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ, ເຊິ່ງປະກອບມີບັນດາທ່ານ ດັ່ງນີ້:
1. ທ່ານ ປອ. ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ເປັນປະທານ;
2. ທ່ານ ຮສ.ປອ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ເປັນປະທານຮ່ວມ;
3. ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ ເປັນຮອງປະທານ;
4. ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ ເປັນຮອງປະທານ;
ນອກນັ້ນ, ຍັງມີການແຕ່ງຕັ້ງກໍາມະການອີກ 10 ກວ່າທ່ານ
ຂະນະດຽວກັນ ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ ຂຶ້ນລາຍການ ການລົງສໍາຫຼວດສະໜາມ ເປີດ-ປິດ ແລະ ສະໜາມແຂ່ງຂັນກິລາປະເພດຕ່າງໆວ່າ: ໃນວັນທີ 13 ມິຖຸນາ 2024 ພະແນກສຶກສາທິການ ແລະ ກິລາ ພ້ອມດ້ວຍພະແນກການທີ່ ກ່ຽວຂ້ອງ ສົມທົບກັບກົມວິຊາການ ກະຊວງສຶກສາທິການ ແລະ ກິລາ ໄດ້ລົງສໍາຫຼວດສະຖານທີ່ຈະໃຊ້ ເຂົ້າໃນການຈັດພິທີເປີດ-ປິດ ແລະ ແຂ່ງຂັນກິລາປະເພດຕ່າງໆ ເຊິ່ງຂໍ້ມູນພື້ນຖານແມ່ນເຫັນວ່າມີຫຼາຍ ສະຖານທີ່ ທີ່ຊຸດໂຊມເປ່ເພ ເປັນຕົ້ນແມ່ນສະໜາມກິລາໃນຮົ່ມຕຶກ A ແລະ ຕຶກ B (ສະໜາມກິລາ ແຫ່ງຊາດ ຫຼັກ 16) ແຕ່ການຄິດໄລ່ງົບປະມານຍັງບໍ່ທັນຊັດເຈນ. ຖ້າຂໍ້ຕົກລົງວ່າດ້ວຍການແຕ່ງຕັ້ງ ກຳມະການຝ່າຍຕ່າງໆ ໄດ້ຖືກຮັບຮອງ ກຳມະການທີ່ກ່ຽວຂ້ອງກໍ່ຈະໄດ້ດໍາເນີນການຄິດໄລ່ເພື່ອສ້ອມແປງ.
ຂ່າວ-ຮູບ: Larh Creators
