ສຳນັກຂ່າວຕ່າງປະເທດລາຍງານວ່າ: ຫ້ອງການພາສີ – ອາກອນ ທົ່ວໄປຂອງກຳປູເຈຍ ລາຍງານວ່າ ກຳປູເຈຍ ສົ່ງອອກແຜ່ນແພ, ເຄື່ອງນຸ່ງຮົ່ມ, ເກີບ ແລະ ສິນຄ້າເພື່ອການເດີນທາງເພີ່ມຂຶ້ນ ສູ່ລະດັບຕົວເລກສອງຫຼັກໃນໄລຍະ 10 ເດືອນທຳອິດ ( ມັງກອນ – ຕຸລາ ) ຂອງປີ 2024.
ລາຍງານລະບຸວ່າ: ກຳປູເຈຍ ສົ່ງອອກແຜ່ນແພ ມູນຄ່າ 406 ລ້ານໂດລາ ໃນໄລຍະເວລາດັ່ງກ່າວ ເພີ່ມຂຶ້ນ 14,5% ເມື່ອທຽບເປັນປີຕໍ່ປີ ແລະ ສົ່ງອອກເຄື່ອງນຸ່ງຮົ່ມ 8 ຕື້ໂດລາ ໄປຍັງຕະຫຼາດລະຫວ່າງປະເທດ ເພີ່ມຂຶ້ນ 23,6%.
ນອກຈາກນັ້ນ, ການສົ່ງອອກເກີບ ຄິດເປັນມູນຄ່າ 1,33 ຕື້ໂດລາ ເພີ່ມຂຶ້ນ 22% ແລະ ຈໍາໜ່າຍສິນຄ້າເພື່ອການເດີນທາງໄປຍັງຕະຫຼາດລະຫວ່າງປະເທດ 1,69 ຕື້ໂດລາ ເພີ່ມຂຶ້ນ 20,6%.
ທ່ານ ໂຮ ອີ້ ຄໍ ຫົວໜ້ານັກເສດຖະສາດຂອງຫ້ອງການຄົ້ນຄວ້າເສດຖະກິດມະຫາພາກຂອງພາກພື້ນອາຊຽນ +3 ( AMRO ) ກ່າວວ່າ: ຂະແໜງເຄື່ອງນຸ່ງຮົ່ມ, ເກີບ ແລະ ສິນຄ້າເພື່ອການເດີນທາງ ຍັງຄົງເປັນໜຶ່ງໃນແຮງຂັບເຄື່ອນທີ່ສຳຄັນ ສຳລັບການຂະຫຍາຍຕົວທາງເສດຖະກິດຂອງກຳປູເຈຍ ໂດຍຄາດວ່າການຂະຫຍາຍຕົວຂອງພາກສ່ວນດັ່ງກ່າວ ຈະຟື້ນຕົວຢ່າງຕໍ່ເນື່ອງໃນປີ 2024 ເຊິ່ງຖືກກະຕຸ້ນໂດຍຄວາມຕ້ອງການສິນຄ້າອຸປະໂພກ – ບໍລິໂພກທີ່ຫຼາຍຂຶ້ນໃນຕະຫຼາດຂັ້ນສູງຫຼັກ.
ອຸດສາຫະກຳເຄື່ອງນຸ່ງຮົ່ມ, ເກີບ ແລະ ສິນຄ້າເພື່ອການເດີນທາງ ຖືເປັນແຫຼ່ງລາຍຮັບຈາກການແລກປ່ຽນເງິນຕາຕ່າງປະເທດຂະໜາດໃຫຍ່ທີ່ສຸດຂອງ ກຳປູເຈຍ.
ບົດລາຍງານສະບັບຫຼ້າສຸດ ຈາກກະຊວງແຮງງານ ແລະ ການຝຶກອາຊີບຂອງ ກຳປູເຈຍ ລະບຸວ່າ: ປັດຈຸບັນພາກສ່ວນດັ່ງກ່າວປະກອບດ້ວຍໂຮງງານ ແລະ ສາຂາ 1.538 ແຫ່ງ ເຊິ່ງຈ້າງພະນັກງານປະມານ 9 ແສນກວ່າຄົນ ໂດຍສ່ວນໃຫຍ່ເປັນແມ່ຍິງ.
