ກະຊວງການຄ້າ ແລະ ອຸດສາຫະກຳຂອງ ສິງກະໂປ ລາຍງານວ່າ: ເສດຖະກິດສິງກະໂປ ຂະຫຍາຍຕົວ 5,4% ໃນໄຕມາດສາມ ຂອງປີ 2024 ເຊິ່ງສູງກວ່າຕົວເລກຄາດຄະເນລ່ວງໜ້າທີ່ຕັ້ງໄວ້ 4,1%.
ບົດລາຍງານລະບຸວ່າ: ການຂະຫຍາຍຕົວໃນໄຕມາດສາມ ໄດ້ແຮງຊຸກຍູ້ເບື້ອງຕົ້ນຈາກຂະແໜງການຜະລິດ, ການສົ່ງອອກ ລວມເຖິງການເງິນ ແລະ ປະກັນໄພ ເຊິ່ງໄດ້ແຮງໜູນບາງສ່ວນຈາກການປັບຕົວຂຶ້ນຂອງວົງຈອນເອເລັກໂຕຣນິກທົ່ວໂລກ.
ໃນຂະນະດຽວກັນ, ຂະແໜງທຸລະກິດກ່ຽວກັບຜູ້ບໍລິໂພກຍັງຄົງຫົດຕົວ ເນື່ອງຈາກການເດີນທາງຂາອອກຂອງຄົນທ້ອງຖິ່ນ ແລະ ການເດີນທາງຂາເຂົ້າຂອງຄົນຕ່າງປະເທດ ປັບຕົວຊ້າກວ່າທີ່ວາງໄວ້.
ກະຊວງດັ່ງກ່າວຊີ້ວ່າ: ທ່າອ່ຽງການສະໜອງພາຍນອກໂດຍລວມຂອງ ສິງກະໂປ ຈະຍັງຄົງເຂັ້ມແຂງຕະຫຼອດໄລຍະເວລາທີ່ເຫຼືອຂອງປີ 2024 ແລະ ປັບຕົວເລກການຄາດຄະເນການຂະຫຍາຍຕົວຂອງໝົດປີ ເພີ່ມຂຶ້ນຈາກ 2 – 3% ເປັນປະມານ 3,5%.
ນອກຈາກນັ້ນ, ກະຊວງດັ່ງກ່າວ ຍັງຄາດຄະເນການຂະຫຍາຍຕົວຂອງເສດຖະກິດສິງກະໂປ ໃນປີ 2025 ແມ່ນຢູ່ໃນລະຫວ່າງ 1 – 3%.
