ສຳນັກຂ່າວຕ່າງປະເທດລາຍງານວ່າ: ໃນວັນທີ 23 ພະຈິກຜ່ານມາ ທີ່ນະຄອນຫຼວງບາກູ ປະເທດອາແຊກໄບຊານ, ບັນດາຝ່າຍທີ່ເຂົ້າຮ່ວມກອງປະຊຸມສຸດຍອດ ຄັ້ງທີ 29 ຂອງສົນທິສັນຍາ ສະຫະປະຊາຊາດ ກ່ຽວກັບການປ່ຽນແປງຂອງດິນຟ້າອາກາດ ( COP29 ) ບັນລຸຂໍ້ຕົກລົງໃໝ່ກ່ຽວກັບດ້ານການເງິນ ຮັບມືກັບການປ່ຽນແປງຂອງດິນຟ້າອາກາດ ພາຍຫຼັງປຶກສາຫາລືມາເປັນເວລາ 2 ອາທິດ.
ຕາມຂໍ້ຕົກລົງທີ່ບັນລຸໄດ້, ບັນດາປະເທດພັດທະນາໄດ້ໃຫ້ຄຳໝັ້ນສັນຍາ ແຕ່ລະປີຈະລະດົມເງິນ ຈຳນວນ 1.300 ຕື້ໂດລາ ແຕ່ນີ້ຮອດປີ 2035 ເພື່ອຊ່ວຍປະເທດທຸກຍາກ ແລະ ປະເທດພວມພັດທະນາຮັບມືກັບການປ່ຽນແປງຂອງດິນຟ້າອາກາດ.
ເຖິງຢ່າງໃດກໍຕາມ ມີພຽງແຕ່ 300 ຕື້ໂດລາຕໍ່ປີ ໃນຈຳນວນເງິນດັ່ງກ່າວ ແມ່ນບ້ວງເງິນຊ່ວຍເຫຼືອ ຫຼື ໃຫ້ກູ້ຢືມດ້ວຍອັດຕາດອກເບ້ຍຕ່ຳຈາກປະເທດພັດທະນາ, ຈຳນວນເງິນຍັງເຫຼືອ 1.000 ຕື້ໂດລາຕໍ່ປີ ຕ້ອງໄດ້ລະດົມຈາກແຫຼ່ງອື່ນ.
ນີ້ແມ່ນມາດຕາທີ່ຖົກຖຽງກັນຫຼາຍທີ່ສຸດ ແລະ ພິເສດແມ່ນກຸ່ມບັນດາປະເທດທຸກຍາກ ແລະ ປະເທດເກາະນ້ອຍ ໂດຍຖືວ່າບ້ວງເງິນ 300 ຕື້ໂດລາຕໍ່ປີ ແມ່ນຈຳນວນໜ້ອຍເກີນໄປ ເມື່ອທຽບໃສ່ ຄວາມຕ້ອງການດ້ານການເງິນຮັບມືກັບການປ່ຽນແປງດິນຟ້າອາກາດຂອງປະເທດພວມພັດທະນາ.
