ວັນທີ 26 ພະຈິກ 2024, ທ່ານ ສອນໄຊ ສີພັນດອນ ນາຍົກລັດຖະມົນຕີ ຊີ້ແຈງ ຕໍ່ກອງປະຊຸມ ສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ກ່ຽວກັບ ການປັບປຸງຄຸນນະພາບການສຶກສາ ວ່າ: ລັດຖະບານຈະສືບຕໍ່ປະຕິບັດບັນດາມາດຕະການ ດັ່ງນີ້:
1.ຫຼຸດຜ່ອນການສິດສອນຫ້ອງຄວບ, ສະຫນອງຄູສອນໃຫ້ພຽງພໍຕາມມະຕິ09/ລບ ດ້ວຍການນໍາ ໃຊ້ໂຄຕາທີໄດ້ຮັບໃນປີ 2025 ແລະ ໂຄຕາທະຫານພັນທະ 2.000 ຄົນ ໃຫ້ຄູອາສາສະໝັກຢູ່ເຂດຊົນນະບົດຈາກກະຊວງປ້ອງກັນປະເທດ, (ປະຈຸບັນມີຄູອາສາສະໝັກ 4.460 ຄົນ) ແລະ ສະເໜີໃຫ້ຄູ ບໍລິຫານ ແລະ ຄູສອນທີ່ຄົບອາຍຸເຂົ້າພັກຜ່ອນບໍານານທີ່ຍັງແຂງແຮງ,ມີຄວາມສາມາດສືບຕໍ່ສິດສອນ ຈົນຮອດ 65 ປີ ຫຼືຫຼາຍກວ່ານັ້ນ. ພ້ອມນັ້ນກໍ່ເປີດຫຼັກສູດບໍາລຸງຄູ, ໃຫ້ມີຄວາມສາມາດ, ມີວິທີ ສິດສອນແບບໃຫມ່ໃຫ້ທັນຍຸກທັນສະໄຫມ.
2.ສືບຕໍ່ປຸກລະດົມຄູໃຫ້ເອົາໃຈໃສ່ສິດສອນຢ່າງມີຄວາມຮັບຜິດຊອບ,ມີຈັນຍາບັນ,ຈັນຍາທໍາ ສົມເປັນແມ່ພິມຂອງຊາດ;ເອົາໃຈໃສ່ດູແລຊີວິດການເປັນຢູ່ຂອງຄູໃຫ້ດີຂຶ້ນໂດຍສົມທົບການປະຕິບັດນະໂຍ າຍອຸດຫນູນຈາກລັດຖະບານ ແລະ ການປະກອບສ່ວນຂອງອົງການປົກຄອງທ້ອງຖິ່ນ ແລະ ຜູ້ປົກຄອງຂອງນັກຮຽນ.(ໃນປີ 2024 ລັດຖະບານໄດ້ຈັດສັນງົບປະມານອຸດຫນູນຄູອາສາສະຫມັກ ຈໍານວນ 90 ຕື້ກີບ. ໃນນັ້ນ ງົບຈາກລັດຖະບານ 76 ຕື້ກີບ, ທະນາຄານພັດທະນາລາວ 14 ຕື້ ກີບ).
3. ສືບຕໍ່ສ້າງຄວາມເຂັ້ມແຂງໃຫ້ແກ່ຜູ້ບໍລິຫານການສຶກສາທຸກຂັ້ນ ທາງດ້ານວິຊາການ, ການ ບໍລິຫານ, ສະຫນອງວັດຖຸອຸປະກອນ ແລະ ງົບປະມານທີ່ຈໍາເປັນໃຫ້ພຽງພໍ.
4.ສືບຕໍ່ປັບປຸງຫຼັກສູດການຮຽນ-ການສອນ ແລະ ວິທີການສິດສອນຂອງຄູ, ວິທີຮັບເອົາຄວາມຮູ້ ຂອງນັກຮຽນໃຫ້ສອດຄ່ອງກັບເປົ້າຫມາຍ ແລະ ຈຸດພິເສດຂອງແຕ່ລະທ້ອງຖິ່ນ.
5.ສືບຕໍ່ປັບປຸງ ແລະ ຂະຫຍາຍພື້ນຖານໂຄງລ່າງສະຖານການສຶກສາ, ສະຫນອງອຸປະກອນການ ຮຽນ-ການສອນໃຫ້ພຽງພໍຂັ້ນພື້ນຖານ, ສໍາລັບນັກຮຽນຢູ່ຊົນນະບົດອາດນໍາໃຊ້ເຄື່ອນຸ່ງທີ່ມີເປັນຕົ້ນ ເຄື່ອນຸ່ງຈາກຜ້າແພຫັດຖະກໍາພື້ນເມືອງ ບໍຈໍາເປັນຕ້ອງມີເສື້ອຂາວ, ມົ້ງ/ສິ້ນສີຟ້າ, ສູ້ຊົນສ້າງໂຮງຮຽນ ກິນນອນຢູ່ໂຮງຮຽນຫມວດປະຖົມ ແລະ ມັດຖະຍົມສົມບູນ ຢູ່ຊົນນະບົດ.
6. ສືບຕໍ່ດໍາເນີນມາດຕະການຈໍາກັດສິ່ງແວດລ້ອມຕ່າງໆທີ່ມີຜົນກະທົບທາງລົບ ແລະ ລົບກວນຕໍ່ການສຶກສາເປັນຕົ້ນໃນເວລາຮຽນ ເຊັ່ນ: ເຄື່ອງມືສື່ສານ,ສະຖານບໍລິການ ຮ້ານເກມ, ກິນດື່ມ, ບັນເທິງ ແລະ ອື່ນໆ. ພ້ອມນັ້ນກໍ່ອອກແຮງສ້າງຄ່ານິຍົມ ແລະ ປັດໃຈຕ່າງໆເພື່ອໃຫ້ ພົນລະເມືອງລາວທຸກຄົນ ຮັກ ແລະ ມັກຮຽນຮູ້, ມັກອ່ານ, ມັກຄົ້ນຄ້ວາ, ສ້າງໃຫ້ມີຕົວເມືອງ, ຊຸມຊົນສັງຄົມແຫ່ງການຮຽນຮູ້ (Leaning Society)ໃຫ້ແກ່ໄວຫນຸ່ມທີ່ຈະເປັນອານາຄົດ ແລະ ຫນໍ່ແຫນງຂອງປະເທດຊາດ;
7. ສືບຕໍ່ປະຕິບັດຕາມກົດຫມາຍ ແລະ ລະບຽບການໃຊ້ຈ່າຍງົບປະມານທີ່ກໍານົດໄວ້ໃຫ້ເຄັ່ງຄັດ ແລະ ຊຸກຍູ້ການຊ່ວຍເຫຼືອຈາກຄູ່ຮ່ວມພັດທະນາ ເພື່ອໃຫ້ມີຈຸດສຸມຕາມເປົ້າຫມາຍຂອງການພັດທະນາ ການສຶກສາ 5 ປີ ໃນແຕ່ລະໄລຍະ.
