ໃນວັນທີ 26 ພະຈິກ 2024 ທີ່ຫ້ອງວ່າການປົກຄອງແຂວງຄຳມ່ວນ ໄດ້ມີພິທີປະກາດແຕ່ງຕັ້ງ ຫົວໜ້າຫ້ອງວ່າການແຂວງ ຄໍາມ່ວນ ຂືຶ້ນໂດຍການໃຫ້ກຽດເຂົ້າຮ່ວມຂອງ ທ່ານ ວົງເພັດ ຈິດປັນຍາ ຮອງເລຂາພັກແຂວງ, ຜູ້ຊີ້ນຳວຽກງານການເມືອງແນວຄິດ, ວຽກພັກ-ພະນັກງານ, ມີຄະປະຈໍາພັກແຂວງ, ກໍາມະການພັກແຂວງ, ບັນດາພະແນກການ, ຕາງໜ້າຫ້ອງວ່າການ 10 ເມືອງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ຕາງໜ້າຄະນະຈັດຕັ້ງແຂວງກໍ່ໄດ້ຜ່ານຂໍ້ຕົກລົງຂອງທ່ານເຈົ້າແຂວງຄໍາມ່ວນ ສະບັບເລກທີ 328/ຈຂ, ລົງວັນທີ 13 ພະຈິກ 2024 ວ່າດ້ວຍການແຕ່ງຕັ້ງຫົວໜ້າຫ້ອງວ່າການແຂວງ : ຕົກລົງ ແຕ່ງຕັ້ງ ທ່ານ ສົມບູນ ແກ້ວວົງສາ ເປັນຫົວໜ້າຫ້ອງວ່າການແຂວງ ແລະ ມະຕິຕົກລົງ ສະບັບເລກທີ 45/ຄປຈ, ລົງວັນທີ 19 ພະຈິກ 2024 ວ່າດ້ວຍການບົ່ງຕົວແຕ່ງຕັ້ງ ສະຫາຍ ສົມບູນ ແກ້ວວົງສາ ຫົວໜ້າຫ້ອງວ່າການແຂວງ ເປັນເລຂາຄະນະພັກຮາກຖານຫ້ອງວ່າການແຂວງຄໍາມ່ວນ.
ໂອກາດນີ້ ທ່ານ ຮອງເລຂາພັກແຂວງຄໍາມ່ວນ ຍັງໄດ້ເປັນກຽດມອບຂໍ້ຕົກລົງດັ່ງກ່າວ ໃຫ້ຜູ້ໄດ້ຮັບໜ້າທີ່ໃໝ່ ແລະ ມີຄໍາເຫັນໃຫ້ທິດຊີ້ນໍາມາຍັງຄະນະນໍາ ຕະຫລອດຮອດສະມາຊິກພັກ-ພະນັກງານໃນຂົງເຂດຫ້ອງວ່າການ ກໍ່ຄືຂະແໜງການໃນທົ່ວແຂວງໄດ້ມີຄວາມເຂົ້າໃຈເອກະພາບຕໍ່ການຕົກລົງຂອງຂັ້ນເທິງ ແລະ ໃຫ້ການສະໜັບສະໜູນຊ່ວຍເຫລືອ, ສໍາລັບຜູ້ຖືກແຕ່ງຕັ້ງໃໝ່ໃຫ້ຍົກສູງຄວາມຮັບຜິດຊອບຄວາມເປັນເຈົ້າການໃຫ້ສູງຂຶ້ນ, ມີຄວາມສັດຊື່ບໍລິສຸດຕໍ່ໜ້າທີ່ຄວາມຮັບຜິດຊອບຂອງຕົນ, ເອົາໃຈໃສ່ເພີ່ມທະວີສຶກສາອົບຮົມການເມືອງແນວຄິດໃຫ້ ສະມາຊິກພັກ-ພະນັກ ງານຂັ້ນຕົນໃຫ້ມີຄຸນທາດການເມືອງທີ່ໜັກແໜ້ນ-ເຂັ້ມແຂງ, ເອົາໃຈໃສ່ເຕົ້າໂຮມຄວາມສາມັກຄີ, ປະຕິບັດຫຼັກການ ລວມສູນປະຊາທິປະໄຕ, ສືບຕໍ່ປະຕິບັດວຽກງານຮ່ວມກັບໜູ່ຄະນະ, ທັງນີ້ເພື່ອໃຫ້ວຽກງານຂອງຫ້ອງວ່າການແຂວງຄໍາມ່ວນມີຜົນສໍາເລັດໃໝ່ໃຫຍ່ຫລວງກວ່າເກົ່າ.
