ທ່ານ ນາງ ບີ່ງຄໍາ ລາຊະສິມມາ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ຕາງໜ້າຄະນະປະຈຳສະພາແຫ່ງຊາດ ໄດ້ລາຍງານບົດປະກອບຄໍາເຫັນຄະນະປະຈຳສະພາແຫ່ງຊາດ ຕໍ່ບົດລາຍງານຂອງ ລັດຖະບານ ກ່ຽວກັບຮ່າງວິໄສທັດ ຮອດປີ 2040, ແຜນຍຸດທະສາດການ ຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນຕອນເຊົ້າວັນທີ 25 ພະຈິກ 2024 ວ່າ: ດັ່ງທີ່ພວກເຮົາຮູ້ນໍາກັນແລ້ວວ່າ ສປປ ລາວ ພວກເຮົາ ມີຄວາມອຸດົມສົມບູນທາງດ້ານກະສິກຳ ຫຼາຍປະເພດແຕ່ພາກເໜືອ ຮອດພາກໃຕ້ ມີເນື້ອທີ່ດິນກະສິກຳຫຼາຍກ່ວາ 4.5 ລ້ານເຮັກຕາ ຫຼື ກວມເອົາ 19% ຂອງເນື້ອທີ່ດິນທົ່ວປະເທດ ຊຶ່ງເປັນປະໂຫຍດ ແລະ ມີຄຸນຄ່າສູງ ຕໍ່ການດໍາລົງຊີວິດຂອງປະຊາຊົນ ລາວບັນດາເຜົ່າ ແລະ ເປັນທ່າແຮງທີ່ສໍາຄັນໜຶ່ງ ໃນການຂັບເຄື່ອນ ການພັດທະນາເສດຖະກິດ-ສັງຄົມ ຂອງປະເທດຊາດ.
ລັດຖະບານ ໂດຍເຫັນໄດ້ຄວາມສໍາຄັນໃນການຄຸ້ມຄອງ ແລະ ພັດທະນາທີ່ດິນກະສິກຳ ຜ່ານການຕິດຕາມ ກວດກາ ຂອງ ສະມາຊິກສະພາແຫ່ງຊາດ ແລະ ສະພາ ປະຊາຊົນຂັ້ນແຂວງ ໂດຍອີງໃສ່ກົດໝາຍ ແລະ ລະບຽບການກ່ຽວຂ້ອງ ທີ່ຕິດພັນກັບການຄຸ້ມຄອງ ແລະ ນໍາໃຊ້ທີ່ດິນກະສິກຳ ມາຮອດປັດຈຸບັນ ເຫັນວ່າ ຍັງມີຫຼາຍບັນຫາ ຊຶ່ງເປັນສິ່ງທ້າທາຍ ແລະ ຕ້ອງໄດ້ສືບຕໍ່ ຄົ້ນຄວ້າ ປັບປຸງ ແລະ ແກ້ໄຂເຊັ່ນ:
ຜ່ານການຄົ້ນຄວ້າ ຮ່າງວິໄສທັດ ຮອດປີ 2040 ແລະ ຍຸດທະສາດການຄຸ້ມຄອງ ແລະ ພັດທະນາ ທີ່ດິນກະສິກຳ ຮອດປີ 2030 ໂດຍພື້ນຖານແລ້ວ ຄະນະປະຈຳສະພາແຫ່ງຊາດ ແມ່ນເຫັນດີເປັນເອກະ ພາບ ຕໍ່ເນື້ອໃນຂອງຮ່າງວິໄສທັດ ແລະ ຍຸດທະສາດ ສະບັບນີ້. ແຕ່ເພື່ອຮັບປະກັນເຮັດໃຫ້ ການຄຸ້ມຄອງ ແລະ ພັດທະນາທີ່ດິນກະສິກຳ ໃຫ້ມີປະສິດທິພາບ ແລະ ປະສິດທິຜົນ, ຄະນະປະຈຳສະພາແຫ່ງຊາດ ສະເໜີບາງຄໍາເຫັນຕໍ່ລັດຖະບານ ດັ່ງນີ້:
1. ວິໄສທັດ ຮອດປີ 2040 ແລະ ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ຕ້ອງໃຫ້ສອດຄ່ອງກັບ ຍຸດທະສາດ ຂອງຂະແໜງການ ທີ່ກ່ຽວຂ້ອງ ເປັນຕົ້ນ ຂະແໜງການ ຊັບພະຍາກອນທຳມະຊາດ ແລະ ສິ່ງແວດລ້ອມ, ໂຍທາທິການ ແລະ ຂົນສົ່ງ, ພະລັງງານ ແລະ ບໍ່ແຮ່ ແລະ ແຜນແມ່ບົດຈັດສັນທີ່ດິນແຫ່ງຊາດ ລວມທັງວຽກງານປ່າໄມ້ ຂອງ ຂະແໜງກະສິກຳ ແລະ ປ່າໄມ້ເອງ;
2. ເອົາໃຈໃສ່ປົກປັກຮັກສາທີ່ດິນກະສິກຳ ໂດຍສະເພາະ ເນື້ອທີ່ດິນນາ, ດິນຮັບນໍ້າຊົນລະປະທານ ທີ່ ລັດໄດ້ມີການພັດທະນາແລ້ວ ເພື່ອເປັນປັດໄຈສະໜອງໃຫ້ແກ່ແຜນງານຄໍ້າປະກັນການຜະລິດສະບຽງອາຫານ ແລະ ຜະລິດເປັນສິນຄ້າ ເພື່ອຊົມໃຊ້ພາຍໃນ ແລະ ສົ່ງອອກ ໂດຍມີມາດຕະການຄຸ້ມຄອງ, ມີ ການຕິດຕາມ ກວດກາ, ຈຳກັດການຫັນປ່ຽນທີ່ດິນກະສິກຳ ໄປເປັນທີ່ດິນປະເພດອື່ນ ເພື່ອຮັບປະກັນບໍ່ ໃຫ້ເນື້ອທີ່ກະສິກຳຫຼຸດລົງໃນໄລຍະຍາວ;
3. ສຶບຕໍ່ມີກົນໄກຄຸ້ມຄອງ ແລະ ພັດທະນາທີ່ດິນກະສິກຳ ໄປຄຽງຄູ່ກັບການຍົກສູງຄຸນນະພາບການ ຜະລິດກະສິກຳ ໃຫ້ກ້າວໄປສູ່ການຜະລິດທີ່ທັນສະໄໝ ພ້ອມທັງມີການຍົກສູງຄຸນນະພາບທີ່ດິນກະສິກຳ ໃຫ້ຮັບປະກັນຕໍ່ການນໍາໃຊ້ ແລະ ການພັດທະນາທີ່ດິນ ຕາມທິດສີຂຽວ ແລະ ຍືນຍົງ;
4. ໃນການຈັດຕັ້ງຜັນຂະຫຍາຍ ຍຸດທະສາດສະບັບນີ້ ສະເໜີໃຫ້ມີກົນໄກປະສານສົມທົບກັບ ພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ຢ່າງກົມກຽວ ແລະ ເປັນເອກະພາບກັນ, ມີການສະໜ ອງຂໍ້ມູນຂ່າວສານ, ເຄື່ອງມືອຸປະກອນ ແລະ ການແບ່ງຄວາມຮັບຜິດຊອບ ຢ່າງຂາດຕົວ ບົນຫຼັກການການມີສ່ວນຮ່ວມ ຈາກທຸກພາກສ່ວນທີ່ກ່ຽວຂ້ອງ ແລະ ໄປຕາມທິດ 3 ສ້າງ ເພື່ອຮັບປະກັນເຮັດໃຫ້ການຈັດຕັ້ງປະຕິບັດຍຸດທະສາດດັ່ງກ່າວ ມີປະສິດທິພາບ ແລະ ປະສິດທິຜົນ, ຮັບປະກັນຄວາມຊັດເຈນທາງດ້ານຕົວເລກເນື້ອທີ່ດິນ ທີ່ຈະຖືກນໍາໃຊ້ໃນແຕ່ລະປະເພດ;
5. ສ້າງ ແລະ ພັດທະນາບຸກຄະລາກອນ ທີ່ຮັບຜິດຊອບວຽກງານການຄຸ້ມຄອງ ແລະ ພັດທະນາທີ່ດິນກະສິກຳ ໃຫ້ໄດ້ທັງປະລິມານ ແລະ ຄຸນນະພາບ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານດັ່ງກ່າວ; ພ້ອມທັງເອົາໃຈໃສ່ ໃນການໂຄສະນາເຜີຍແຜ່ຂໍ້ມູນຂ່າວສານ ການຄຸ້ມຄອງ ແລະພັດທະນາທີ່ດິນກະສິກຳ ຢ່າງກວ້າງຂວາງ ໃຫ້ທຸກພາກສ່ວນໃນສັງຄົມ, ປະຊາຊົນ ເຂົ້າໃຈ, ເຂົ້າຮ່ວມ ແລະ ມີສ່ວນຮ່ວມ ໃນການຈັດຕັ້ງປະຕິບັດວຽກງານດັ່ງກ່າວ.
6. ຕໍ່ກັບມາດຕະການດ້ານ ງົບປະມານ ແລະ ແຫຼ່ງທຶນ, ສະເໜີໃຫ້ກະຊວງກ່ຽວຂ້ອງ ເອົາໃຈໃສ່
ຄົ້ນຄວ້າ ນໍາສະເໜີ ເຂົ້າແຜນງົບປະມານຂອງລັດ ແລະ ຄົ້ນຄ້ວາ ແຫຼ່ງທຶນຕ່າງໆ ເພື່ອໝູນໃຊ້ເຂົ້າໃສ່ບັນດາວຽກງານ ຢ່າງມີຈຸດສຸມ, ພຽງພໍ ແລະ ຮັບປະກັນ ໃຫ້ຮ່າງວິໄສທັດ ແລະ ຍຸດທະສາດສະບັບນີ້ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ;
