ທ່ານ ຮສ.ປອ ລິນຄໍາ ດວງສະຫວັນ, ລັດຖະມົນຕີກະຊວງກະສິກໍາ ແລະ ປ່າໄມ້ ຂຶ້ນກ່າວບົດລາຍງານຂອງລັດຖະບານ ກ່ຽວກັບຮ່າງວິໄສທັດ ຮອດປີ 2040, ແຜນ ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030: ທິດນໍາ, ວິໄສທັດ, ເປົ້າໝາຍ ແລະ ຜົນປະໂຫຍດທີ່ຈະໄດ້ຮັບ ໃນໂຄງປະກອບ ແລະ ເນື້ອໃນຕົ້ນຕໍຂອງ ( ຮ່າງ ) ວິໄສທັດ ຮອດປີ 2040 ແລະ ຍຸດທະສາດການຄຸ້ມຄອງ ແລະ ພັດທະນາທີ່ດິນກິສິກໍາ ຮອດປີ 2030 ມີດັ່ງນີ້:
ໃນພາກນີ້ໄດ້ກຳນົດ ວິໄສທັດໃນການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2040 ແມ່ນ “ຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ທີ່ດິນກະສິກຳ ຫັນເປັນທັນສະໄໝ ຕາມ ທິດສີຂຽວ ແລະ ຍືນຍົງ”.
ເພື່ອປະຕິບັດໃຫ້ໄດ້ຕາມ ວິໄສທັດ ທີ່ກ່າວມາຂ້າງເທິງນັ້ນ, ພວກເຮົາໄດ້ກຳນົດ 6 ຄາດໝາຍສູ້ຊົນ ດັ່ງນີ້:
1) ສໍາຫຼວດ, ກຳນົດແບ່ງປະເພດ ແລະ ວາງແຜນນໍາໃຊ້ທີ່ດິນກະສິກຳ ຕາມແຜນແມ່ບົດຈັດສັນທີ່ ດິນແຫ່ງຊາດກຳນົດໄວ້ ໃນລະດັບມະຫາພາກ ແລະ ຈຸລະພາກ ໃຫ້ສໍາເລັດ, ເນື້ອທີ່ດິນນາ 2 ລ້ານເຮັກຕາ, ກວມເອົາ 44%, ເນື້ອທີ່ດິນປູກພືດລົ້ມລຸກ ຫຼື ພືດອາຍຸສັ້ນ 1 ລ້ານເຮັກຕາ, ກວມເອົາ 22%, ເນື້ອທີ່ດິນປູກໄມ້ໃຫ້ ໝາກ ຫຼື ພືດອາຍຸຍາວ 0.8 ລ້ານເຮັກຕາ, ກວມເອົາ 18%, ເນື້ອທີ່ດິນທົ່ງຫຍ້າລ້ຽງສັດ 0.7 ລ້ານເຮັກຕາ, ກວມເອົາ 16% ແລະ ສ້າງບັນດາ ແຜນທີ່ຕ່າງໆ ທີ່ຕິດພັນກັບທີ່ດິນກະສິກຳ ໃນແຕ່ລະລະດັບເປັນຕົ້ນ ແຜນທີ່ດິນ, ແຜນທີ່ລະດັບ ທາດອາຫານຫຼັກຂອງພືດ, ແຜນທີ່ການນໍາໃຊ້ທີ່ດິນກະສິກຳ, ແຜນທີ່ຄວາມເໝາະສົມຂອງທີ່ດິນຕໍ່ພືດປູກ, ແຜນທີ່ກຳນົດແບ່ງເຂດທີ່ດິນກະສິກຳ ແລະ ແຜນທີ່ກຳນົດເຂດຜະລິດຕິດພັນກັບ ການປຸງແຕ່ງ;
2) ເລັ່ງໃສ່ໃນການຄົ້ນຄວ້າ, ສ້າງ ແລະ ປັບປຸງບັນດານິຕິກຳ ການຄຸ້ມຄອງການນໍາໃຊ້ທີ່ດິນກະສິ ກຳ ໃຫ້ສອດຄ່ອງ ແລະ ຮັດກຸມ ພ້ອມທັງສ້າງຖານຂໍ້ມູນທີ່ດິນກະສິກຳ ແລະ ເຜີຍແຜ່ຂໍ້ມູນຢ່າງ ທົ່ວເຖິງ ເພື່ອປົກປັກຮັກສາ ແລະ ພັດທະນາໃຫ້ຍືນຍົງ;
3) ສ້າງ ແລະ ຍົກລະດັບພະນັກງານວິຊາການຂັ້ນສູນກາງ ແລະ ທ້ອງຖິ່ນ ໃຫ້ມີ ຄວາມຮູ້ພື້ນຖານ ກ່ຽວກັບ ກົດໝາຍ, ນິຕິກຳລຸ່ມກົດໝາຍຂອງກະຊວງກະສິກຳ ແລະ ປ່າໄມ້; ເຕັກນິກການສໍາ ຫຼວດ ວາງແຜນນໍາໃຊ້ທີ່ດິນ, ຜະລິດ ນໍາໃຊ້ຝຸ່ນ ແລະ ປັບປຸງດິນ, ການຜະລິດແນວພັນ ແລະ ການປູກເຂົ້າ, ສາລີ, ມັນຕົ້ນ, ຢາງພາລາ, ໄມ້ໃຫ້ໝາກ, ພືດຜັກ ແລະ ພືດອື່ນໆ ທີ່ເປັນທ່າແຮງ ວິຊາການດ້ານການນໍາໃຊ້ຊົນລະປະທານ, ການຜະລິດກະສິກຳສະອາດ ແລະ ການຍົກຜະລິດຕະພາບການຜະລິດ ໂດຍສະເພາະ ວິຊາການ ວຽກງານຄຸ້ມຄອງ ແລະ ພັດທະນາທີ່ດິນກະສິກຳ ຢ່າງມີປະສິດທິຜົນ; ແລະ ໄດ້ກຳນົດໄວ້ຢູ່ໃນ ຍຸດທະສາດທີ 4: ການສ້າງຄວາມເຂັ້ມແຂງໃຫ້ຂະແໜງການ;
4) ພັດທະນາຂະແໜງຄຸ້ມຄອງ ແລະ ພັດທະນາທີ່ດິນກະສິກຳ ເຊັ່ນ: ກົງຈັກການຈັດຕັ້ງ ແລະ ສ້າງພື້ນຖານໂຄງລ່າງ, ເຕັກນິກ ໃຫ້ມີຄວາມເຂັ້ມແຂງ, ທັນສະໄໝ ແລະ ສາມາດປະຕິບັດໃຫ້ບັນລຸຕາມເປົ້າໝາຍ ພ້ອມທັງການເຊື່ອມໂຍງກັບພາກພື້ນ ແລະ ສາກົນ;
5) ສ້າງຂໍ້ມູນຂ່າວສານທີ່ດິນກະສິກຳທີ່ຊັດເຈນ, ວ່ອງໄວ, ທັນສະໄໝ, ສາມາດສະໜອງໃຫ້ຜູ້ຊົມໃຊ້ຂໍ້ມູນດິນກະສິກຳ, ນັກສຶກສາ, ຜູ້ປະກອບການ ແລະ ຊາວກະສິກອນ;
6) ຜູ້ນໍາໃຊ້ທີ່ດິນກະສິກຳ ມີຂໍ້ມູນ, ຮູບແບບການພັດທະນາທີ່ດິນຢ່າງຖືກຕ້ອງ, ສາມາດເຮັດໃຫ້ການໃຊ້ມີປະສິດທິຜົນຫຼາຍຂຶ້ນ ໂດຍແກ້ໄຂບັນຫາຂໍ້ຄົງຄ້າງກ່ຽວກັບການນໍາໃຊ້ຊັບພະຍາກອນນໍ້າ ເຂົ້າໃນການຜະລິດກະສິກຳແບບຍືນຍົງ ແລະ ເປັນມິດຕໍ່ສິ່ງແວດລ້ອມໃຫ້ຫຼາຍຂຶ້ນ.
