ທ່ານ ຮສ.ປອ ລິນຄໍາ ດວງສະຫວັນ, ລັດຖະມົນຕີກະຊວງກະສິກໍາ ແລະ ປ່າໄມ້ ຂຶ້ນກ່າວບົດລາຍງານຂອງລັດຖະບານ ກ່ຽວກັບຮ່າງວິໄສທັດ ຮອດປີ 2040, ແຜນ ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ໂດຍກ່າວຕອນສໍາຄັນວ່າ: ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ເພື່ອຮັບປະກັນ ແລະ ບັນລຸໄດ້ຕາມຄາດໝາຍໃນການຄຸ້ມຄອງ ແລະ ພັດທະນາທີ່ດິນກະສິກຳ ຈະສຸມໃສ່ 5 ຍຸດທະສາດ, 5 ເປົ້າໝາຍ, 12 ຄາດໝາຍ ແລະ 30 ວຽກຈຸດສຸມ ດັ່ງນີ້:
-ຍຸດທະສາດທີ 1: ການສໍາຫຼວດ ຈັດສັນ ແລະ ແບ່ງເຂດທີ່ດິນກະສິກຳ, ມີ 1 ເປົ້າໝາຍ ຄື: ການ ສໍາຫຼວດ, ວິໄຈ, ປະເມີນຄຸນນະພາບດິນ ແລະ ກຳນົດແບ່ງເຂດທີ່ດິນກະສິກຳ ທົ່ວປະເທດ, ມີ 2 ຄາດໝາຍ ແລະ 11 ວຽກຈຸດສຸມ;
-ຍຸດທະສາດທີ 2: ການຄຸ້ມຄອງ ແລະ ປົກປັກຮັກສາ ທີ່ດິນກະສິກຳ, ມີ 1 ເປົ້າໝາຍ ຄື: ການ ສ້າງ, ປັບປຸງນິຕິກຳ, ຕິດຕາມ ກວດກາ ແລະ ປະເມີນການຄຸ້ມຄອງການນໍາໃຊ້ທີ່ດິນກະສິກຳ ໃຫ້ສອດຄ່ອງຕາມທິດສີຂຽວ ແລະ ຍືນຍົງ, ມີ 2 ຄາດໝາຍ ແລະ 6 ວຽກຈຸດສຸມ;
-ຍຸດທະສາດທີ 3: ການພັດທະນາ ແລະ ປັບປຸງຄຸນນະພາບດິນກະສິກຳ, ມີ 1 ເປົ້າໝາຍ ຄື: ການ ສ້າງພື້ນຖານໂຄງລ່າງໃນການພັດທະນາດິນກະສິກຳໃຫ້ມີຄວາມຍືນຍົງ ແລະ ທັນສະໄຫມ, ການຄົ້ນຄວ້າ ທົດລອງ ຮູບແບບການຜະລິດກະສິກຳທີ່ເໝາະສົມ ແລະ ສົ່ງເສີມຄຸ້ມຄອງ ໂຮງງານຜະລິດຝຸ່ນ ທົ່ວປະເທດ, ມີ 3 ຄາດໝາຍ ແລະ 7 ວຽກຈຸດສຸມ;
-ຍຸດທະສາດທີ 4: ການສ້າງຄວາມເຂັ້ມແຂງໃຫ້ຂະແໜງການ, ມີ 1 ເປົ້າໝາຍ ຄື: ການສ້າງ ຄວາມເຂັ້ມແຂງ ດ້ານການສໍາຫຼວດ, ວິໄຈ, ຄຸ້ມຄອງ ແລະ ພັດທະນາທີ່ດິນກະສິກຳ ທົ່ວປະເທດ , ມີ 3 ຄາດໝາຍ ແລະ 3 ວຽກຈຸດສຸມ;
-ຍຸດທະສາດທີ 5: ການສ້າງຂໍ້ມູນຂ່າວສານທີ່ດິນກະສິກຳ, ມີ 1 ເປົ້າໝາຍ ຄື: ການສ້າງ ແລະ ພັດທະນາລະບົບຄຸ້ມຄອງຂໍ້ມູນຂ່າວສານທີ່ດິນກະສິກຳ ທົ່ວປະເທດ, ມີ 2 ຄາດໝາຍ ແລະ 3 ວຽກຈຸດສຸມ.
ສ່ວນມາດຕະການຈັດຕັ້ງປະຕິບັດ, ການຕິດຕາມກວດກາ ແລະ ປະເມີນຜົນ ເພື່ອຮັບປະກັນ ໃຫ້ການຈັດຕັ້ງປະຕິບັດ 5 ຍຸດທະສາດ, 5 ເປົ້າໝາຍ, 12 ຄາດໝາຍ ແລະ 30 ວຽກຈຸດສຸມ ທີ່ໄດ້ກຳນົດໄວ້ຂ້າງເທິງ ໃຫ້ປາກົດຜົນເປັນຈິງນັ້ນ, ພວກເຮົາໄດ້ວາງ 4 ມາດ ຕະການຄື: ມາດຕະການດ້ານການຈັດຕັ້ງ, ມາດຕະການດ້ານງົບປະມານ ແລະ ແຫຼ່ງທຶນ, ມາດ ຕະການດ້ານນະໂຍບາຍ ແລະ ນິຕິກຳສະໜັບສະໜູນ ແລະ ມາດຕະການດ້ານການຕິດຕາມ ແລະ ປະເມີນຜົນ. ຍຸດທະສາດສະບັບນີ້, ຈະເປັນແລວທາງ ໃນການສະໜັບສະໜູນ ວຽກງານທີ່ດິນກະສິ ກຳ ຢ່າງຕັ້ງໜ້າ ຊື່ງຈະ ເປັນການປະກອບສ່ວນ ຕໍ່ການພັດທະນາຊົນນະບົດຮອບດ້ານ ຊ່ວຍແກ້ໄຂ ຄວາມທຸກຍາກ ແລະ ພັດທະນາວຽກງານ 3 ສ້າງ (ເປັນການ ປັບປຸງ ແບ່ງຄວາມຮັບປຜິດຊອບ ຂາດຕຕົວຫຼາຍຂື້ນ). ເປັນບ່ອນອີງ ໃນການສ້າງມາດຕະຖານ ແລະ ມາດຕະການໃນການຈັດຕັ້ງ ປະຕິບັດ ໃຫ້ມີຄວາມເປັນຈີງ ໃນຕໍ່ໜ້າ ແລະ ສອດຄ່ອງກັບ ຍຸກສະໄໝໃໝ່. ໃນນັ້ນ ຍັງໄດ້ຄາດຄະເນ ຄວາມຕ້ອງການນໍາໃຊ້ງົບປະມານ 1,335 ຕື້. ສໍາລັບປີ 2025 ຕ້ອງການນໍາໃຊ້ງົບປະມານ 366 ຕື້ ໃນນັ້ນ, ຈາກງົບປະມານຂອງລັດ, ອົງການຈັດຕັ້ງສາກົນ ດ້ວຍຮູບແບບການກູ້ຢືມ ຫຼື ຊ່ວຍເຫຼືອລ້າ ແລະ ລະດົມຂົນຂວາຍ ພາຍໃນ ແລະ ຕ່າງປະເທດ. ເພື່ອນໍາໃຊ້ເຂົ້າໃນການຈັດຕັ້ງປະຕິບັດຍຸດທະສາດດັ່ງກ່າວ ຢ່າງມີຈຸດສຸມ ແລະ ມີປະສິດທິຜົນສູງ ສຸດ (ລາຍລະອຽດໃນ ເອກະສານຊ້ອນທ້າຍ). ຄຽງຄູ່ກັບການສ້າງຮ່າງຍຸດທະສາດສະບັບນີ້, ກະຊວງກະສິກຳ ແລະ ປ່າໄມ້ ກໍ່ຄື ລັດຖະບານ ໄດ້ຮ່າງດໍາລັດ ວ່າດ້ວຍທີ່ດິນກະສິກຳ ແລະ ຂໍ້ ຕົກລົງຂອງ ລັດຖະມົນຕີ ວ່າດ້ວຍ ການຄຸ້ມຄອງດິນນາ.
