ໃນປີ 2024 ສາມາດສ້າງຄອບຄົວພົ້ນທຸກ ບັນລຸໄດ້ 22.419 ຄອບຄົວ, ສ້າງບ້ານພົ້ນທຸກໄດ້ 226 ບ້ານ ແລະ ສ້າງເມືອງພົ້ນທຸກ 5 ເມືອງ.
21 ພະຈິກ 2024, ທ່ານ ວິໄລວົງ ບຸດດາຄຳ ລັດຖະມົນຕີກະຊວງພາຍໃນ ລາຍງານວຽກງານ 3 ສ້າງຕິດພັນກັບການພັດທະນາຊົນນະບົດແກ້ໄຂຄວາມທຸກຍາກ ຕໍ່ສະພາວ່າ: ທິດນໍາ 3 ສ້າງແມ່ນເງື່ອນໄຂສໍາຄັນຕໍ່ການກະຕຸກຊຸກຍູ້ການພັດທະນາຊົນນະບົດ ແກ້ໄຂຄວາມທຸກຍາກ ເພາະວ່າທິດນໍາ 3 ສ້າງ ແມ່ນເນື້ອໃນສໍາຄັນທີ່ປຸກຄວາມຕື່ນຕົວ, ຄວາມເປັນເຈົ້າການຂອງປະຊາຊົນຂອງສັງຄົມ ໃນການພັດທະນາຊົນນະບົດ ແກ້ໄຂຄວາມທຸກຍາກ ໂດຍສະເພາະການຈັດສັນໂຮມບ້ານນ້ອຍທີ່ບໍ່ມີເງື່ອນໄຂໃຫ້ ເປັນບ້ານໃຫຍ່ທີ່ເປັນຈຸດສຸມພັດທະນາ ສ້າງພື້ນຖານໂຄງລ່າງເຕັກນິກຮັບໃຊ້ການຜະລິດ, ພື້ນຖານໂຄງລ່າງວັດທະ ນະທໍາ – ສັງຄົມ, ສ້າງລາຍຮັບ, ຈັດສັນອາຊີບໃຫ້ປະຊາຊົນ, ສ້າງກຸ່ມການຜະລິດ, ການບໍລິການ ແລະ ອື່ນໆ ແນໃສ່ສ້າງໄດ້ຄອບຄົວພົ້ນທຸກ, ບ້ານພົ້ນທຸກ.
ໃນປີ 2024 ສາມາດ ສ້າງຄອບຄົວພົ້ນທຸກບັນລຸໄດ້ 22.419 ຄອບຄົວ ກວມ 64,05% ຂອງຄາດໝາຍທີ່ກໍານົດໄວ້ (35.000 ຄອບຄົວ); ສ້າງບ້ານພົ້ນທຸກ ປະຕິບັດໄດ້ 226 ບ້ານ ກວມ 45,20% ຂອງຄາດໝາຍທີ່ກໍານົດໄວ້ ( 500 ບ້ານ); ສ້າງເມືອງພົ້ນທຸກ ປະຕິບັດໄດ້ 5 ເມືອງ ( ເມືອງຊົນນະບູລີ, ເມືອງທ່າປາງທອງ ແລະ ເມືອງອາດສະພອນ ແຂວງສະຫວັນນະເຂດ; ເມືອງຕຸ້ມລານ ແລະ ເມືອງຕະໂອ້ຍ ແຂວງສາລະວັນ ) ກວມ 33,33% ຂອງ ຄາດໝາຍທີ່ກໍານົດໄວ້ (15 ເມືອງ).
ສ້າງຄອບຄົວພັດທະນາ ປະຕິບັດໄດ້ 37.538 ຄອບຄົວ ກວມ 113,75% ປະຕິບັດໄດ້ລື່ນຄາດໝາຍ (33.000 ຄອບຄົວ), ສ້າງບ້ານພັດທະນາ ປະຕິບັດໄດ້ 314 ບ້ານ ກວມ 62,80% ຂອງຄາດໝາຍທີ່ກໍານົດໄວ້ (500 ບ້ານ), ສ້າງບ້ານໃຫຍ່ເປັນຕົວເມືອງໃນຊົນນະບົດ ປະຕິບັດໄດ້ 12 ຈຸດ ກວມ 300% ປະຕິບັດໄດ້ລື່ນຄາດໝາຍ (4 ຈຸດ).
ການຈັດສັນທີ່ຢູ່ອາໄສໃຫ້ປະຊາຊົນ ປະຕິບັດໄດ້ 348 ຄອບຄົວ ກວມ 80,36% ຂອງຄາດໝາຍສູ້ຊົນທີ່ກໍານົດໄວ້ ( 433 ຄອບ ຄົວ); ຈັດສັນທີ່ດິນທໍາການຜະລິດໃຫ້ປະຊາຊົນໄດ້ 233 ກວມ 20,15% ຂອງຄາດໝາຍສູ້ຊົນທີ່ກໍານົດໄວ້ (1.156 ຄອບຄົວ ); ຈັດສັນອາຊີບໄດ້ 1.156 ຄົນ ກວມ 25,26% ຂອງຄາດໝາຍສູ້ຊົນທີ່ກໍານົດໄວ້ ( 6.000 ຄົນ ); ສ້າງເມືອງເຂັ້ມແຂງຮອບດ້ານ ສາມາດປະຕິບັດໄດ້ 3 ເມືອງ ( ນະຄອນໄກສອນພົມວິຫານ, ເມືອງສອງຄອນ ແຂວງສະຫວັນນະເຂດ ແລະ ເມືອງຈໍາປາສັກ ແຂວງຈໍາປາສັກ ) ກວມ 75% ຂອງຄາດໝາຍທີ່ກໍານົດໄວ້ ( 4 ເມືອງ ).
