ພິທີເຊັນບົດບັນທຶກຄວາມເຂົ້າໃຈ ຫຼື MOU ກ່ຽວກັບການຮ່ວມມືໃນການສຶກສາ ລະບົບບໍລິຫານຈັດການຄວບຄຸມການຄ້າ ແລະ ສິນຄ້າ ລະຫວ່າງປະເທດ ( DIGITAL TRADE OPERATING PLATFORM ) ລະຫວ່າງ ຫ້ອງການກະຊວງອຸດສາຫະກຳ ແລະ ການຄ້າ ( ອຄ ) ກັບ ບໍລິສັດ ເອໄອດີຊີເທັກ ຈຳກັດຜູ້ດຽວ ຈັດຂຶ້ນໃນວັນທີ 19 ພະຈິກ 2024 ທີ່ກະຊວງ ອຄ ເຂົ້າຮ່ວມຂອງ ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງ ອຄ.
ການລົງນາມມີຂຶ້ນລະຫວ່າງ ທ່ານ ບົວວັນ ວິລະວົງ ຫົວໜ້າຫ້ອງການກະຊວງ ອຄ ກັບ ທ່ານ ພຶດສະພາ ພູມມະສັກ ປະທານ ບໍລິສັດ ເອໄອດີຊີເທັກ ຈໍາກັດຜູ້ດຽວ; ມີທ່ານຕາງໜ້າຈາກບັນດາກົມ ແລະ ຕາງໜ້າ ບໍລິສັດ ເອໄອດີຊີເທັກ ຈຳກັດຜູ້ດຽວ ເຂົ້າຮ່ວມ.
ທ່ານ ບົວວັນ ວິລະວົງ ກ່າວວ່າ: ການເຊັນສັນຍາ ແມ່ນການສຶກສາຄວາມເປັນໄປໄດ້ໃນການພັດທະນາລະບົບ ສຳລັບວຽກງານການຄຸ້ມຄອງການນຳເຂົ້າ – ສົ່ງອອກສິນຄ້າ, ສິນຄ້າຜ່ານແດນ ( transit ) ແລະ ສິນຄ້ານໍາເຂົ້າ ເພື່ອສົ່ງອອກຂອງຂະແໜງ ອຄ.
ການຮ່ວມມືດັ່ງກ່າວ ຖືເປັນການພັດທະນາເສດຖະກິດ – ສັງຄົມ ເວົ້າລວມ, ເວົ້າສະເພາະແມ່ນການຫັນເປັນດີຈີຕອນຂອງຂະແໜງ ອຄ, ການຄົ້ນຄວ້າ ແລະ ພັດທະນາລະບົບດັ່ງກ່າວ ຈະເປັນການເຊື່ອມຈອດດ້ານຂໍ້ມູນຂອງສິນຄ້າ ກັບ ຫຼາຍຂະແໜງການທັງພາຍໃນ ແລະ ຕ່າງປະເທດ. ນອກນັ້ນ, ຍັງຈະເພີ່ມຄວາມສະດວກດ້ານການບໍລິການ ແລະ ການເກັບລາຍຮັບເຂົ້າລັດຢ່າງເປັນລະບົບ ຄົບຖ້ວນ.
ເຖິງແມ່ນວ່າ ຄວາມພ້ອມຂອງແຕ່ລະຂະແໜງການ ແລະ ຫົວໜ່ວຍທຸລະກິດ ອາດຍັງບໍ່ທັນສູງ ແຕ່ຂ້າພະເຈົ້າເຊື່ອໝັ້ນວ່າ ການຫັນເຂົ້າສູ່ເສດຖະກິດດີຈີຕອນ ຈະເປັນກະແສສໍາຄັນຕໍ່ການພັດທະນາເສດຖະກິດ – ສັງຄົມ ແລະ ແຕ່ລະພາກສ່ວນຈະຄ່ອຍໆກ້າວເຂົ້າສູ່ລະບົບດັ່ງກ່າວຕາມກົນໄກຂອງເສດຖະກິດໂລກ.
ຂະນະທີ່ ທ່ານ ພຶດສະພາ ພູມມະສັກ ກ່າວວ່າ: ເຄື່ອງມືທີ່ພວກເຮົາຈະພັດທະນານີ້ ຈະຊ່ວຍເຮັດໃຫ້ລະບົບການຄ້າຂອງລາວເຮົາສະດວກຂຶ້ນ; ຄວບຄຸມໄດ້ ແລະ ສາມາດເຊື່ອມຕໍ່ເຂົ້າກັບກະຊວງ ຫຼື ຂະແໜງການອື່ນໄດ້ ເຊິ່ງສາມາດເບິ່ງຜ່ານສະມາດໂຟນ ບັນດາຂໍ້ມູນທາງການຄ້າ ເປັນຕົ້ນແມ່ນສາມາດເບິ່ງມູນຄ່າການນໍາເຂົ້າ, ມູນຄ່າການສົ່ງອອກໄດ້, ຕິດຕາມສິນຄ້າຜ່ານແດນ ຫຼື ທັອບສິນຄ້ານໍາເຂົ້າ ທັອບສິນຄ້າສົ່ງອອກ, ພ້ອມນັ້ນເຄື່ອງມືດັ່ງກ່າວກໍຍັງສາມາດກໍານົດຈໍານວນທີ່ລັດຖະບານອະນຸຍາດໃຫ້ນໍາເຂົ້າມາເທົ່າໃດ ເມື່ອຮອດກໍານົດທີ່ອະນຸຍາດລະບົບຈະລັອກ ບໍ່ໃຫ້ອະນຸຍາດອີກ.
ນອກຈາກນີ້, ມັນຍັງສາມາດຕິດຕາມໄດ້ວ່າ ເມື່ອນໍາເຂົ້າມາແລ້ວ ຂາຍຢູ່ໃສ ຂາຍແທ້ບໍ່ ເຊິ່ງລະບົບດັ່ງກ່າວຈະລິ້ງເຂົ້າກັບລະບົບ ເທັກລິດ ຂອງກະຊວງການເງິນ ແລະ ຂະແໜງການອື່ນໆໃນຕໍ່ໜ້າ.
ທ່ານກ່າວວ່າ: ການພັດທະນານີ້ຈະປ່ຽນໂສມໜ້າໃໝ່ ໃນການດໍາເນີນວຽກງານໃນປະເທດເຮົາ ສອດຄ່ອງກັບແຜນພັດທະນາຂອງລັດຖະບານທີ່ກໍານົດໃຫ້ເປັນດີຈີຕອນ ເຊິ່ງລະບົບດັ່ງກ່າວໄດ້ພັດທະນາໄປໃນລະດັບໜຶ່ງແລ້ວ ຄາດວ່າໃນທ້າຍປີນີ້ຈະສາມາດເຫັນໜ້າຕາຂອງລະບົບດັ່ງກ່າວ ແລະ ຈະໄດ້ເປີດນໍາໃຊ້ໄດ້ໃນປີ 2025.
