9 ເດືອນ GDP ຂອງປະເທດ ຂະຫຍາຍຕົວສະເລ່ຍ 4,6%, ມູນຄ່າການຄ້າຕ່າງປະເທດ ປະຕິບັດໄດ້ 13.798 ລ້ານໂດລາ ເທົ່າກັບ 86,19% ແຜນການປີ, ການລົງທຶນລວມໄດ້ 69.110 ຕື້ກີບ ລື່ນແຜນປີ 22%, ຂະນະທີ່ການເກັບລາຍຮັບກໍເພີ່ມຂຶ້ນ.
ທ່ານ ສອນໄຊ ສີພັນດອນ ນາຍົກລັດຖະມົນຕີ ກ່າວຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວ່າ: ໃນໄລຍະເກືອບ 1 ປີຜ່ານມາ GDP ຂອງປະເທດ ຂະຫຍາຍຕົວສະເລ່ຍໃນລະດັບ 4,6% ( ຕົວເລກສະຫຼຸບ 9 ເດືອນ ) ເຊິ່ງຄາດຄະເນໝົດປີຈະສາມາດບັນລຸໄດ້ຕາມແຜນ ( ສະພາແຫ່ງຊາດ ຮັບຮອງ 4,5% ). ປັດໄຈຕົ້ນຕໍທີ່ເຮັດໃຫ້ຕົວເລກຂອງ GDP ເພີ່ມຂຶ້ນ ແມ່ນຂະແໜງບໍລິການ, ການຂົນສົ່ງ ແລະ ການຂາຍຍົກ – ຂາຍຍ່ອຍ, ໃນນັ້ນເພີ່ມຂຶ້ນຫຼາຍກວ່າໝູ່ແມ່ນຈາກການເປັນເຈົ້າພາບກອງປະຊຸມສຸດຍອດອາຊຽນ ແລະ ການເປີດປີທ່ອງທ່ຽວລາວ ເຊິ່ງເຮັດໃຫ້ມີນັກທ່ອງທ່ຽວຈາກພາຍໃນ ແລະ ຕ່າງປະເທດເດີນທາງທ່ອງທ່ຽວໃນ ສປປ ລາວ ລວມທັງໝົດຫຼາຍກວ່າ 5 ລ້ານເທື່ອຄົນ, ສ້າງລາຍຮັບໝູນວຽນໄດ້ຫຼາຍກວ່າ 1 ພັນລ້ານໂດລາສະຫະລັດ ໂດຍສະເພາະນັກທ່ອງທ່ຽວພາຍໃນ ເຫັນວ່າບັນລຸໄດ້ເກີນແຜນຂອງປີ ( 127% ).
ນອກນັ້ນ, ຂະແໜງກະສິກໍາ, ຂະແໜງອຸດສາຫະກໍາປຸງແຕ່ງ ແລະ ກໍ່ສ້າງ ກໍມີການຂະຫຍາຍຕົວດີສົມຄວນ ອັນພົ້ນເດັ່ນແມ່ນການຜະລິດສະບຽງອາຫານ ຮອດປັດຈຸບັນສາມາດປະຕິບັດໄດ້ 3.185,10 ຕື້ກີບ ເທົ່າກັບ 74,66% ຂອງແຜນການປີ.
ການຜະລິດແຮ່ທາດ ທັງຮູບແບບປົກກະຕິ ແລະ ທົດລອງປະຕິບັດໄດ້ 34.000 ກວ່າຕື້ກີບ ເທົ່າກັບ 127,52% ແຜນການປີ.
ມູນຄ່າການຄ້າຕ່າງປະເທດ ປະຕິບັດໄດ້ 13.798 ລ້ານໂດລາສະຫະລັດ ເທົ່າກັບ 86,19% ຂອງແຜນການປີ; ໃນນັ້ນ ມູນຄ່າການສົ່ງອອກ ປະຕິບັດໄດ້ 7.314 ລ້ານໂດລາສະຫະລັດ ເທົ່າກັບ 83,84% ຂອງແຜນການປີ, ມູນຄ່າການນໍາເຂົ້າ ປະຕິບັດໄດ້ 6.483 ລ້ານໂດລາສະຫະລັດ ເທົ່າກັບ 88,99% ຂອງແຜນການປີ. ອັນພົ້ນເດັ່ນແມ່ນການສົ່ງອອກຜະລິດຕະພັນກະສິກໍາ ປະຕິບັດໄດ້ 1 ພັນກວ່າລ້ານໂດລາສະຫະລັດ ເທົ່າກັບ 86,94% ຂອງແຜນການປີ.
ດ້ານການລົງທຶນໃນໄລຍະ 9 ເດືອນຜ່ານມາ ປະຕິບັດໄດ້ 69.110 ຕື້ກີບ ລື່ນແຜນ 22%; ໃນນີ້ການລົງທຶນຈາກງົບປະມານຂອງລັດ ປະຕິບັດໄດ້ 4.013 ຕື້ກີບ ເທົ່າກັບ 80% ຂອງແຜນການ ແລະ ການລົງທຶນຈາກພາກເອກະຊົນພາຍໃນ ແລະ ຕ່າງປະເທດ ປະຕິບັດໄດ້ 2,61 ຕື້ໂດລາສະຫະລັດ ເທົ່າກັບ 56.132 ຕື້ກີບ ເທົ່າກັບ 173% ຂອງແຜນການປີ.
ສາມາດຈັດເກັບລາຍຮັບງົບປະມານໄດ້ 46.174 ຕື້ກີບ ເທົ່າກັບ 92% ຂອງແຜນການປີ; ສະເພາະທ້ອງຖິ່ນ ປະຕິບັດໄດ້ 126% ຂອງແຜນການປີ, ໃນນີ້ ທຸກແຂວງສາມາດປະຕິບັດລາຍຮັບໄດ້ເກີນແຜນຄາດຄະເນໝົດປີ 2024 ລັດຖະບານ ຈະສາມາດຈັດເກັບລາຍຮັບທັງໝົດໄດ້ເກີນແຜນ ປະມານ 10% ຂອງແຜນການປີ ຕົກເປັນເງິນປະມານ 5.000 ຕື້ກວ່າກີບ. ສ່ວນດ້ານລາຍຈ່າຍງົບປະມານ ປະຕິບັດໄດ້ 41.512 ຕື້ກີບ ເທົ່າກັບ 68% ຂອງແຜນການປີ.
