ການລົງຕິດຕາມກວດກາ ການຈັດຕັ້ງປະຕິບັດໂຄງການສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າ ທີ່ເປັນມິດຕໍ່ສິ່ງແວດລ້ອມ ( ຄສກສ ) ຂອງທີມງານທະນາຄານພັດທະນາອາຊີ ( ADB mission 2024 ) ຢູ່ບ້ານໜອງສູງ ແລະ ບ້ານຫ້ວຍເສັດ ເມືອງປາກຊ່ອງ ແຂວງຈໍາປາສັກ ມີຂຶ້ນໃນຕອນບ່າຍວັນທີ 17 ພະຈິກ 2024.
ເຂົ້າຮ່ວມຂອງ ທ່ານ ຄໍາ ນີລະວົງ ວ່າການຫົວໜ້າພະແນກກະສິກໍາ ແລະ ປ່າໄມ້ແຂວງຈໍາປາສັກ, ທ່ານ ຄໍາປ້ອງ ວົງພະຈັນ ຫົວໜ້າໂຄງການ ຄສກສ ຂັ້ນສູນກາງ, ທ່ານ ເພັດສະໝອນ ຄໍາພູມີ ຫົວໜ້າໂຄງການ ຄສກສ ແຂວງຈໍາປາສັກ, ມີທ່ານ David Doolan ຕາງໜ້າຈາກທະນາຄານພັດທະນາອາຊີ ( ເອດີບີ ) ພ້ອມດ້ວຍຄະນະ, ມີປະທານກຸ່ມ ແລະ ສະມາຊິກກຸ່ມການຜະລິດກະສິກໍາເປັນສິນຄ້າຂອງສອງບ້ານເຂົ້າຮ່ວມ.
ທີມງານທະນາຄານພັດທະນາອາຊີ ໄດ້ລົງມາຕິດຕາມກວດກາຄັ້ງນີ້ ແມ່ນໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຂອງກຸ່ມການຜະລິດພືດຜັກເປັນສິນຄ້າຂອງບ້ານຫ້ວຍເສັດ ແລະ ບ້ານໜອງສູງ ເຊິ່ງປັດຈຸບັນກຸ່ມການຜະລິດບ້ານໜອງສູງ ມີສະມາຊິກທັງໝົດ 43 ຄົນ ( ຍິງ 4 ຄົນ ) ມີເນື້ອທີ່ທໍາການຜະລິດ 127 ເຮັກຕາ ແລະ ກຸ່ມບ້ານຫ້ວຍເສັດ ມີສະມາຊິກກຸ່ມ 37 ຄອບຄົວ ມີເນື້ອທີ່ທໍາການຜະລິດ 77 ເຮັກຕາ.
ກຸ່ມການຜະລິດທັງສອງບ້ານ ແມ່ນໄດ້ຮັບທຶນຊ່ວຍເຫຼືອຈາກ ເອດີບີ ເພື່ອສົ່ງເສີມເຂົ້າໃນການຜະລິດພືດຜັກເປັນສິນຄ້າ ຄື: ຜັກກາດຕີນໝີ, ຜັກກະລໍ່າປີ, ຜັກກາດຂາວຫໍ່, ໝາກເຂືອ, ໝາກສະເວີ່, ໝາກຖົ່ວກາແວ ແລະ ໃນການຊື້ – ຂາຍທາງກຸ່ມໄດ້ມີສັນຍາຊື້ – ຂາຍກັບບໍລິສັດທີ່ມີຄວາມຕ້ອງການສິນຄ້າ ແລະ ຂາຍທົ່ວໄປໃຫ້ກັບແມ່ຄ້າ.
ໂອກາດມາຕິດຕາມກວດກາທີມງານທະນາຄານພັດທະນາອາຊີ ກໍມີຄໍາເຫັນແລກປ່ຽນ ເພື່ອແນໃສ່ຊຸກຍູ້ສົ່ງເສີມໃຫ້ຊາວກະສິກອນ ໄດ້ສືບຕໍ່ທໍາການຜະລິດພືດຜັກໃຫ້ໄດ້ຮັບຜົນສູງ ແລະ ຖືກຕ້ອງຕາມຮູບແບບທີ່ທາງໂຄງການກຳນົດ ຄື: ໂຄງການເນັ້ນໃສ່ການສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າ ທີ່ເປັນມິດຕໍ່ສິ່ງແວດລ້ອມ.
ໂຄງການສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າ ທີ່ເປັນມິດຕໍ່ສິ່ງແວດລ້ອມ ( ຄສກສ ) ເປັນໂຄງການໜຶ່ງທີ່ຈະຊ່ວຍສະໜັບສະໜູນການຈັດຕັ້ງປະຕິບັດແຜນຍຸດທະສາດກະສິກຳ ແລະ ປ່າໄມ້ ຮອດປີ 2025 ແລະ ວິໄສທັດ 2030 ໃຫ້ປາກົດຜົນເປັນຈິງ ເຊິ່ງໄດ້ຮັບການສະໜັບສະໜູນຈາກທະນາຄານພັດທະນາອາຊີ ໃນຮູບແບບການຊ່ວຍເຫຼືອລ້າ ມີເປົ້າໝາຍເພື່ອພັດທະນາວຽກງານດ້ານກະສິກຳ ເປັນຕົ້ນແມ່ນພື້ນຖານໂຄງລ່າງຮັບໃຊ້ການຜະລິດ, ຊຸກຍູ້ໃຫ້ການຜະລິດກະສິກຳທີ່ຫຼາກຫຼາຍຕອບສະໜອງໄດ້ຕາມຄວາມຕ້ອງການຂອງທ້ອງຕະຫຼາດ, ປັບປຸງພື້ນຖານໂຄງລ່າງດ້ານກະສິກຳໃຫ້ມີຄວາມທົນທານຕໍ່ສະພາບການປ່ຽນແປງທາງດ້ານດິນຟ້າອາກາດ.
