ຂີ້ກະເດືອນເປັນສັດເລືອຄານທີ່ບໍ່ມີກະດູກສັນຫຼັງ ທີ່ອາໄສຢູ່ໃນດິນ ນອກຈາກຈະນຳໄປໃຊ້ເປັນເຫຍື່ອຕຶກເບັດແລ້ວ ຍັງເປັນສັດທີ່ມີຄວາມສຳຄັນຕໍ່ລະບົບນິເວດ ເປັນຕົ້ນແມ່ນດິນ, ຕໍ່ພືດ ແລະ ສັດລ້ຽງ ເຊັ່ນ: ເປັດ, ໄກ່ ພ້ອມນີ້ມູນ ຫຼື ຂີ້ຂອງຂີ້ກະເດືອນ ສາມາດນໍາໄປເຮັດປຸ໋ຍໝັກໄດ້ ເຊິ່ງປັດຈຸບັນຊາວກະສິກອນກໍສຶກສາວິທີລ້ຽງ ແລະ ລ້ຽງເປັນສິນຄ້າສ້າງລາຍຮັບໄດ້.
ມື້ນີ້ພວກເຮົາຈະມາແນະນຳວິທີລ້ຽງຂີ້ກະເດືອນ ສຳລັບຄົນທີ່ຢາກລ້ຽງ ເຊິ່ງການລ້ຽງຂີ້ກະເດືອນ ພວກເຮົາສາມາດໃຊ້ກະຕ່າທີ່ເຮັດດ້ວຍໄມ້ ຫຼື ຈະໃຊ້ແອ່ງ, ຊາມ, ຄຸ ກໍໄດ້ ເຊິ່ງສ່ວນປະກອບໃນການລ້ຽງມີດັ່ງນີ້: ບົວຫົດນ້ຳ, ຖົ່ວດິນເຄືອ, ເຟືອງ, ຂີ້ຄວາຍສົດແຊ່ນ້ຳ 24 ຊົ່ວໂມງ.
■ ວິທີລ້ຽງ: ກ່ອນອື່ນແມ່ນໃຫ້ນຳເອົາເຟືອງແຫ້ງຂະໜາດ 20 – 30 ຊັງຕີແມັດ ໂດຍນຳມາແຊ່ນ້ຳໃຫ້ອີ່ມໂຕປະມານ 24 ຊົ່ວໂມງ ເພື່ອນຳມາປູພື້ນກະຕ່າທີ່ໃຊ້ລ້ຽງໃຫ້ໜາປະມານ 5 – 10 ຊັງຕີແມັດ ແລ້ວຈຶ່ງນຳເອົາຖົ່ວອາລາຄຼິລລົງໃສ່ເປັນຊັ້ນທີ 2 ຫຼັງຈາກນັ້ນນຳເອົາຂີ້ຄວາຍມາປົກໃສ່ທາງເທິງເປັນຊັ້ນທີ 3 ແລ້ວນຳເອົາຂີ້ກະເດືອນທີ່ໄດ້ກະກຽມໄວ້ນັ້ນມາປ່ອຍໃສ່ອ່າງ ແລ້ວນຳເຟືອງມາປົກອີກເທື່ອໜຶ່ງຕາມອັດຕາສ່ວນຂອງຂີ້ຄວາຍ 50%, ເຟືອງ 40% ແລະ ຖົ່ວເຄືອ (Arahis pintoi) 10%.
■ ການເບິ່ງແຍງຮັກສາ:
ພາຍຫຼັງນຳຂີ້ກະເດືອນມາລົງລ້ຽງແລ້ວ ແຕ່ລະອາທິດຕ້ອງໄດ້ຫົດນ້ຳ ເນື່ອງຈາກວ່າຂີ້ກະເດືອນມັກຄວາມຊຸ່ມ, ສຳລັບການສັງເກດເບິ່ງຄວາມຊຸ່ມແມ່ນໃຊ້ມືຈັບເບິ່ງ ຂີ້ກະເດືອນນັ້ນຕ້ອງການຄວາມຊຸ່ມປະມານ 70% ຂອງອາຫານໃນອ່າງ.
ສຳລັບບ່ອນລ້ຽງນັ້ນ ສາມາດເຮັດໄດ້ຫຼາຍແບບໂດຍອີງຕາມເງື່ອນໄຂ ແລະ ຂໍ້ສະດວກຂອງຜູ້ລ້ຽງ ແຕ່ຕ້ອງເປັນບ່ອນທີ່ມີອາກາດລຸລ່ວງດີເພາະຂີ້ກະເດືອນຕ້ອງການ ຄວາມຊຸ່ມເຢັນ.
■ ຄວາມສຳຄັນຂອງການລ້ຽງຂີ້ກະເດືອນ:
ຂີ້ກະເດືອນເປັນສັດຊະນິດໜຶ່ງທີ່ມີຄວາມສຳຄັນຕໍ່ການລ້ຽງສັດ ໂດຍສະເພາະໃຊ້ເປັນອາຫານແກ່ສັດລ້ຽງມີການຈະເລີນເຕີບໂຕດີ ເຊັ່ນ: ກົບ, ປາ, ສັດປີກ ແລະ ໝູ ເພາະຂີ້ກະເດືອນມີທາດຊີ້ນສູງຫຼາຍກວ່າ 70% ຂອງນ້ຳໜັກແຫ້ງ ແລະ ຍັງມີທາດອາຫານອື່ນໆທີ່ມີຄຸນຄ່າທາງໂພຊະນາການທີ່ຈຳເປັນຕໍ່ສັດລ້ຽງທີ່ເຮັດໃຫ້ສັດໃຫຍ່ໄວ ແລະ ແຂງແຮງ ທັງສາມາດຂະຫຍາຍພັນໄດ້ຕະຫຼອດປີ.
ຂໍ້ມູນ: ວາລະສານກະຊວງກະສິກຳ ແລະ ປ່າໄມ້
