ເສັ້ນທາງເຂົ້າບ້ານນາຍາງໄປຫາວັດພະບາດດານສູງ ຄວາມຍາວກວ່າ 10 ກີໂລແມັດ ແມ່ນໄດ້ຮັບການປັບປຸງ ແລະ ຍົກລະດັບໃຫ້ສາມາດທຽວໄດ້ສະດວກ ໂດຍແມ່ນ ທ່ານ ຄໍາໄພ ສົມຊະນະ ປະທານກຸ່ມບໍລິສັດຄໍາໄພຊະນະ ໄດ້ປະກອບສ່ວນ ເພື່ອເຮັດໃຫ້ພໍ່ແມ່ປະຊາຊົນ ທຽວທາງໄດ້ສະດວກ ແລະ ທັງເປັນການປະກອບສ່ວນໃນການ ຈັດງານບຸນກະຖິນມະຫາສາມັກຄີ ບໍລິຄໍາໄຊ-ນວ ທອດຖວາຍ ຢູ່ວັດພຣະບາດດານສູງ.
ທ່ານ ຄໍາໄພ ສົມຊະນະ ປະທານກຸ່ມບໍລິສັດຄໍາໄພຊະນະ ກ່າວວ່າ: ເສັ້ນທາງເຂົ້າຫາ ວັດພະບາດດານສຸງ ບ້ານນາຍາງ ເມືອງນາຊາຍທອງ ນະຄອນຫຼວງວຽງຈັນ ແມ່ນມີຄວາມລໍາບາກຫຼາຍ ເຊີ່ງລົດນ້ອຍ ປະເພດລົດເກັງ ແມ່ນບໍ່ສາມາດສັນຈອນໄດ້ສະດວກ ເນື່ອງຈາກທາງເປັນເນີນຫີນສູງ ແລະ ມີຄວາມຊັນ,
ສ່ວນເສັ້ນທາງນັບແຕ່ບ້ານນາງຍາງ ອອກມາທາງ 13 ເໜືອ ກໍມີຂຸມເລີກຫຼາຍ ເຮັດໃຫ້ການສັນຈອນຂອງ ພໍແມ່ປະຊາຊົນມີຄວາມລໍາບາກ ແລະ ເນື່ອງໃນໂອກາດ ທີ່ ທ່ານ ສອນທະນູ ທໍາມະວົງ ເຈົ້າແຂວງບໍລິຄໍາໄຊ ພ້ອມດ້ວຍຄອບຄົວ ແລະ ເຈົ້າພາບເຈົ້າສັດທາຈາກແຂວງບໍລິຄໍາໄຊ, ພ້ອມດ້ວຍການນໍານະຄອນຫຼວງ ໄດ້ເປັນເຈົ້າພາບ ເຈົ້າສັດທາ ໄດ້ນໍາກອງກະຖິນມະຫາສາມັກຄີ ໄປທອດຖວາຍຢູ່ວັດພຣະບາດດານສູງ ບ້ານນາຍາງ ເມືອງນາຊາຍທອງ ນະຄອນຫລວງວຽງຈັນ ນະຄອນຫລວງວຽງຈັນ ໃຫ້ກຽດຮັບກອງກະຖິນໂດຍພະອາຈານ ທອງເສີມ ສີບຸນເຮືອງ ເຈົ້າອະທິການວັດພຣະບາດດານສູງ.
ເຫັນໄດ້ຄວາມໝາຍຄວາມສໍາຄັນດັ່ງກ່າວ ໃນການອໍານວຍຄວາມສະດວກ ໃຫ້ການສັນຈອນເດີນທາງຂອງການນໍາ ແລະ ພໍ່ແມ່ປະຊາຊົນ ຂ້າພະເຈົ້າຈຶ່ງຕັດສິນໃນປະກອບສ່ວນທຶນຮອນ ໃນການນໍາເອົາດີນ ມາຖົມ, ລົດມາເກດ, ຫົດນໍ້າ ແລະ ໂລໃຫ້ທາງພຽງງາມດີ ແລະ ເຮັດການການສັນຈອນໄປມາ ສະດວກສະບາຍໃນຄັ້ງນີ້.
ນອກຈາກ ພໍ່ແມ່ປະຊາຊົນໄດ້ທຽວທາງສະດວກ ໃນຕໍ່ໜ້າ ກໍຈະສາມາດດືງດູດນັກທ່ອງທ່ຽວເຂົ້າມາທ່ຽວຊົມ ວິວທິວທັດ ວັດພະບາດດານສູງ ແຫ່ງນີ້ຫຼາຍຂຶ້ນ ປະກອບສ່ວນຊ່ວຍສາງສາ ແລະ ບູລະນະວັດພະບາດດານສູງໃຫ້ຈະເລີນຮຸ່ງເຮືອນຂຶ້ນ ເລື້ອຍໆ.
