ສວນພືກສາ ພ້ອມຈັດງານ ບຸນນໍ່ເປເຈົ່າ 2025 ພ້ອມປະກວດນາງສາວເຜົ່າມົ້ງ ນະຄອນຫຼວງວຽງຈັນ ປີ 2025 ແລະ ນັກຮ້ອງສຽງດີຂຶ້ນ ລວມເງິນລາງວັນຫຼາຍກວ່າ 100 ລ້ານກີບ.
ພິທີຖະແຫຼງຂ່າວມີຂຶ້ນໃນວັນທີ 11 ພະຈິກ 2024 ທີ່ສວນພຶກສາ ເຂົ້າຮ່ວມຂອງທ່ານ ດວງມີໄຊ ລີໄກຢາ ສິລະປີນແຫ່ງຊາດ ທີ່ປຶກສາຄູຝຶກນັກຮ້ອງສຽງດີ ສວນພຶກສາ, ທ່ານ ນາງ ຄຳຫຼ້າ ລໍ່ເບຼຍຢ້າວ ຜູ້ຈັດການສວນພຶກສາ ແລະ ທັງເປັນຜູ້ຈັດງານ
ບຸນນໍ່ເປເຈົ່າ ທີ່ສວນພຶກສາ,ທ່ານ ນາງ ກັນນິກາ ໄຊນາລໍ່ ນາງສາວເຜົ່າມົ້ງ ນະຄອນຫຼວງວຽງຈັນ ປີ 2023, ທ່ານ ນາງ ປ່າເຍຍຊົ່ງ ນາງສາວເຜົ່າມົ້ງ ນະຄອນຫຼວງວຽງຈັນ ປີ 2024, ທ່ານ ສີ່ຖຸນາ ລໍ່ປາຢາວ ນັກຮ້ອງສຽງດີ ປີ 2024 ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ນາງ ຄຳຫຼ້າ ລໍ່ເບຼຍຢ້າວ ຜູ້ຈັດການສວນພຶກສາ ແລະ ທັງເປັນຜູ້ຈັດງານບຸນນໍ່ເປເຈົ່າ ທີ່ສວນພຶກສາ ກ່າວວ່າ: ເພື່ອເປັນການສົ່ງເສີມການທ່ອງທ່ຽວພາຍໃນລາວ ໃຫ້ມີຂະບວນຟົດຟື້ນ ແລະ ເພື່ອຈັດງານບຸນນໍ່ເປ່ເຈົ່າ ໃຫ້ພະນັກງານເຜົ່າມົ້ງຢູ່ສວນພຶກສາ ທັງເປັນການ ຮັກສາຮີດຄອງປະເພນີອັນດີງາມຂອງບັນດາເຜົ່າ, ຄືດັ່ງທຸກໆປີທີ່ສວນພຶກສາ ຂອງພວກເຮົາໄດ້ຈັດງານ ບຸນນໍ່ເປເຈົ່າຂຶ້ນ. ສະນັ້ນ, ສວນພຶກສາ ຈະໄດ້ຈັດງານ ບຸນນໍ່ເປ່ເຈົ້າ ຂຶ້ນໃນວັນທີ 1-5 ມັງກອນ 2025 ເຊິ່ງພາຍໃນງານກໍຈະມີກິດຈະກໍາຫຼາກຫຼາຍຢ່າງເຊັ່ນ: ມີປະກວດ ນາງງາມ, ປະກວດນັກຮ້ອງສຽງດີ, ມີກິດຈະກໍາຄ້າຂາຍສິນຄ້າ, ຕະຫຼາດນັດ, ມີການແກວ່ງໄກ່ ແລະ ບາສີສູ່ຂວັນກິດຈະກໍາ ໂຍນໝາກຄອນ ແລະ ກິດຈະກຳອື່ນໆ
ໃນຊ່ວງບຸນນໍ່ເປ່ເຈົ້າເລີ່ມແຕ່ ວັນທີ 1-5 ມັງກອນ 2025 ນັກທ່ອງທ່ຽວ ທີ່ເຂົ້າມາໃນງານ ຖ້ານຸ່ງເຄື່ອງເຜົ່າມົ້ງແມ່ນໄດ້ເຂົ້າງານໂດຍບໍ່ເສຍຄ່າ ທາງສວນພືກສາໄດ້ກະກຽມ ສະຖານທີ່ສວຍງາມເປັນຕົ້ນແມ່ນ ທ່ຽວຊົມ ບ້ານຊົນເຜົ່າ, ຫໍວາງສະແດງມູນເຊື້ອ ບັນດາຊົນເຜົ່າໃນລາວ.
ທ່ານ ດວງມີໄຊ ລີໄກຢາ ກ່າວວ່າ: ການຈັດງານຄັ້ງນີ້ ນອກຈາກຈະຮັກສາຮິດຄອງປະເພນີແລ້ວ ຍັງເປັນເວທີໃນການສະແດງຄວາມຮູ້ຄວາມສາມາດຂອງລູກຫຼານ ຄັດເລືອກເອົາຜົນງານທີ່ດີ ເພື່ອສະແດງສິນລະປະໃຫ້ນັກທ່ອງທ່ຽວໄດ້ຮັບຊົມ ສະນັ້ນ ຮຽກຮ້ອງໃຫ້ຜູ້ເຂົ້າຮ່ວມງານ, ຜູ້ເຂົ້າຮ່ວມປະກວດ ຈົ່ງພ້ອມກັນຮັກສາ ຮີດຄອງປະເພນີອັນດີງາມຂອງຊົນເຜົ່າມົ້ງ ໂດຍສະເພາະແມ່ນການນຸ່ງຖື ໃຫ້ຖືກຕ້ອງ ການປະດັບປະດາ, ການແຕ່ງກາຍ ລວມທັງກິດຈະກໍາ ຕ່າງໆພາຍໃນງານເພື່ອສ້າງຄວາມມ່ວນຊື່ນໃຫ້ຜູ້ເຂົ້າມາທ່ຽວຊົມ.
ສຳລັບໃຜທີ່ມີລູກຫຼານຢາກສົ່ງເຂົ້າມາປະກວດນາງງາມເພື່ອຊິງມຸງກຸດລວມເງິນລາງວັນມູນຄ່າ 100 ກວ່າລ້ານກີບ ຫຼື ຢາກເສັງນັກຮ້ອງສຽງດີກໍສາມາດສະໝັກກັນເຂົ້າມາໄດ້ ເຊິ່ງເລີ່ມເປີດຮັບສະໝັກຢ່າງເປັນທາງການ ເລີ່ມແຕ່ວັນທີ 1ຕຸລາ 2024 ແລະ ປິດຮັບ
ສະໝັກໃນວັນທີ 28 ພະຈິກ 2024 ໂດຍຜູ້ສົນໃຈ ສາມາດສະແກຣນເອົາໃບສະໝັກຢູ່ qr ທີ່ຂຶ້ນໂປຣໂໝດຢູ່ໜ້າເຟຈ ເຟສ ບຸກສວນພຶກສາໄດ້
ຢ່າລືມຢ່າພາດຫາໂອກາດມາຫຼິ້ນ ບຸນນໍ່ເປເຈົ່າ ທີ່ສວນພຶກສາ ແລະ ມາລຸ້ນນຳກັນວ່າໃຜຈະໄດ້ເປັນຜູ້ຄອງມຸງກຸດ Miss hmong vientiene 2025 ແລະ ໃຜຈະໄດ້ເປັນ ນັກຮ້ອງສຽງດີ ປີ 2025.
