ຂີ້ເຫຍື້ອເປັນບັນຫາໃຫຍ່ໃນງານບຸນ ທີ່ຕ້ອງບໍລິຫານຈັດການໃຫ້ດີ ນອກຈາກມີບ່ອນຖີ້ມເປັນບ່ອນເປັນທີ່ແລ້ວປະຊາຊົນທີ່ມາຄ້າຂາຍ, ມາທ່ຽວງານບຸນຕ້ອງໄດ້ເປັນເຈົ້າການຮັກສາຂີ້ເຫຍື້ອທີ່ຕົນສ້າງຂຶ້ນໃຫ້ຖືກຈຸດ ງານບຸນຈຶ່ງຈະໜ້າຢູ່ໜ້າທ່ຽວ ດັ່ງນັ້ນ ເພື່ອຮັກສາຄວາມສະອາດສວຍງາມໃນງານບຸນປີນີ້ ນະຄອນຫຼວງໄດ້ຈັດສັນຖັງຂີ້້ຫຍື້ອຈຳນວນ 300 ຖັງແຈກຢາຍຢູ່ທົ່ວບໍລິເວນບຸນທາດຫຼວງຂໍໃຫ້ຜູ້ມາທ່ຽວຖີ້ມຂີ້ເຫຍື້ອໃຫ້ເປັນລະບົບຕາມທີ່ຄະນະກຳມະການຈັດງານບຸນໄດ້ຈັດສັນໄວ້ໃຫ້.
ຕາມຂ່າວລາຍງານວ່າ: ທາງ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ບໍລິສັດສະມອນບີ້ໄດ້ນຳເອົາຖັງຂີ້ເຫຍື້ອມາວາງໄວ້ບໍລິການຖີ້ມຂີ້ເຫຼື້ຍອຫຼາຍກວ່າ 300 ຖັງມີ 75 ຈຸດ ພິເສດປີນີ້ ມີປຸ່ມເປົ້າສີຂາວຫ້ອຍຢູ່ຖັງເພື່ອອຳນວຍຄວາມສະດວກໃນການຖີ້ມຂີ້ເຫຍື້ອ ແລະ ນຳໃຊ້ແຮງງານອະນາໄມເດີນພະທາດຫຼວງຈຳນວນ 250 ຄົນເພື່ອຮັກສາເດີນພະທາດຫຼວງໃຫ້ມີຄວາມຈົບງາມ.
ອີງຕາມຜູ້ຊີ້ນຳວຽກພາກສະໜາມໃນການອະນາໄມເກັບມ້ຽນ-ຂົນສົ່ງຂີ້ເຫຍື້ອງານບຸນນະມັດສະການພະທາດຫຼວງ ໃຫ້ຮູ້ວ່າ: ເພື່ອໃຫ້ງານບຸນນະມັດສະການພະທາດຫຼວງມີຄວາມສະອາດຈົບງາມ ບໍລິສັດ ສະມໍບີ້ ທີ່ປຶກສາດ້ານການລົງທຶນ ໃນນາມໄດ້ຮັບໜ້າທີ່ດ້ານການຮັກສາຄວາມສະອາດຈົບງາມໄດ້ຍົກລະດັບຄວາມເອົາໃຈໃສ່ຕື່ມ ເພື່ອເຮັດແນວໃດໃຫ້ງານບຸນນະມັດສະການພະທາດຫຼວງປີນີ້ ມີສິ່ງແວດລ້ອມສົດໃສ ສະອາດປາສະຈາກຂີ້ເຫຍື້ອຕະຫຼອດງານ ມີການແບ່ງງານ ແບ່ງເວລາກັນຮັບຜິດ ຊອບ ເວົ້າໄດ້ວ່າ ຕະຫຼອດ 24 ຊົ່ວໂມງ (ມີທີມພາກເດິກ ແລະ ທີມພາກເຊົ້າ) ໂດຍມີ ການຂົນສົ່ງຂີ້ເຫຍື້ອໄປກໍາຈັດບໍ່ຕໍ່າກວ່າ 20 ຖ້ຽວຕໍ່ມື້.
ດັ່ງນັ້ນ, ຂໍໃຫ້ພໍ່ແມ່ປະຊາຊົນລາວມີຄວາມຕື່ນຕົວໃນການຖິ້ມຂີ້ເຫຍື້ອດີຂຶ້ນ ຊ່ວຍໃຫ້ພະນັກງານຈັດເກັບໄດ້ມີຄວາມສະດວກຫຼາຍກວ່າເກົ່າ ເປັນການສ້າງນິໄສຮັກສາຄວາມສະອາດໄປໃນຕົວທັງຜູ້ໃຫຍ່ ແລະເດັກນ້ອຍ.
