ໃນວັນທີ 6 ກັນຍາ 2024 ບໍລິສັດ ໄຟຟ້ານໍ້າເທີນ 2 ຈໍາກັດ (ນໍ້າເທີນ 2) ປະກາດຢ່າງເປັນທາງການວ່າ ໄດ້ບັນລຸຜົນສຳເລັດອັນສຳຄັນ ໂດຍກາຍເປັນບໍລິສັດທຳອິດໃນ ສປປ ລາວ ທີ່ໄດ້ຮັບໃບຢັ້ງຢືນມາດຕະຖານ ISO 37001. ການຢັ້ງຢືນອັນມີກຽດນີ້ ເນັ້ນໜັກເຖິງຄວາມມຸ່ງໝັ້ນຂອງບໍລິສັດນ້ຳເທີນ 2 ຕໍ່ກັບມາດຕະຖານການຕໍ່ຕ້ານການໃຫ້ສິນບົນ ແລະ ການປະຕິບັດການສໍ້ລາດບັງຫຼວງ.
ມາດຕະຖານ ISO 37001 ເປັນມາດຕະຖານສາກົນເພື່ອຄຸ້ມຄອງການຕໍ່ຕ້ານການໃຫ້ສິນບົນ. ISO 37001 ໄດ້ກໍານົດມາດຕະການສ້າງຕັ້ງ, ປະຕິບັດ, ຮັກສາ ແລະ ປັບປຸງລະບົບຕໍ່ຕ້ານການສໍ້ລາດບັງຫຼວງ. ການຢັ້ງຢືນນີ້ແມ່ນຫຼັກຖານສະແດງເຖິງຄວາມຕັ້ງໃຈຂອງນ້ຳເທີນ 2 ໃນການຊຸກຍູ້ສະພາບແວດລ້ອມການດຳເນີນທຸລະກິດທີ່ໂປ່ງໃສ, ມີຈັນຍາບັນ ແລະ ມີຄວາມຮັບຜິດຊອບ.
ທ່ານ ມາກ-ອອງຕວນ ຣຸບ, ອຳນວຍການໃຫຍ່ຂອງບໍລິສັດໄຟຟ້ານ້ຳເທີນ 2 ໄດ້ສະແດງຄວາມຍິນດີຕໍ່ຜົນສຳເລັດດັ່ງກ່າວໂດຍກ່າວວ່າ: “ພວກເຮົາຮູ້ສຶກເປັນກຽດທີ່ໄດ້ກາຍເປັນບໍລິສັດທຳອິດໃນລາວທີ່ໄດ້ຮັບໃບຢັ້ງຢືນ ISO 37001. ຈຸດສໍາຄັນນີ້ສະທ້ອນເຖິງຄວາມມຸ່ງໝັ້ນຂອງພວກເຮົາຕໍ່ກັບການດຳເນີນທຸລະກິດທີ່ຊື່ສັດ ແລະ ມີຈັນຍາບັນ. ນອກນັ້ນ, ຍັງເປັນການສ້າງຄວາມເຊື່ອໝັ້ນໃຫ້ບໍລິສັດພວກເຮົາ ເວລາພົວພັນກັບພາກສ່ວນກ່ຽວພາຍນອກ, ລວມທັງລັດຖະບານ, ສະຖາບັນການເງິນສາກົນ ແລະ ຜູ້ຮັບເໝົາ.”
ຂັ້ນຕອນການຢັ້ງຢືນ ມີການປະເມີນ ແລະ ກວດກາຢ່າງເຂັ້ມງວດຂອງລະບົບການຄຸ້ມຄອງ ແລະ ການປະຕິບັດການຕ້ານການໃຫ້ສິນບົນຂອງນໍ້າເທີນ 2 ເຊິ່ງໄດ້ມີການທົບທວນຄືນນະໂຍບາຍ, ຂັ້ນຕອນ, ແລະການຄວບຄຸມທີ່ຖືກອອກແບບມາເພື່ອປ້ອງກັນ, ກວດພົບ, ແລະແກ້ໄຂການໃຫ້ ແລະ ຮັບ ສິນບົນ ແລະ ການສໍ້ລາດບັງຫຼວງ.
ການຮັບຮອງ ISO 37001 ຂອງນໍ້າເທີນ 2 ຄາດວ່າຈະເສີມຊື່ສຽງ ແລະ ຊຸກຍູ້ການແຂ່ງຂັນໃນຕະຫຼາດພາກພື້ນ ແລະ ສາກົນ. ພ້ອມທັງສົ່ງສັນຍານໃຫ້ບັນດາຄູ່ຮ່ວມມື, ລູກຄ້າ, ແລະ ອົງການຄຸ້ມຄອງວ່າດ້ວຍນ້ຳເທີນ 2 ແມ່ນອົງການທີ່ໄວ້ເນື້ອເຊື່ອໃຈ ແລະ ມີຫຼັກການ.
ການຢັ້ງຢືນ ISO 37001 ຄັ້ງນີ້ໄດ້ສະແດງເຖິງວ່າ ນໍ້າເທີນ 2 ບໍ່ພຽງແຕ່ສອດຄ່ອງກັບມາດຕະຖານສາກົນເທົ່ານັ້ນ, ແຕ່ຍັງເປັນຕົວແບບໃຫ້ບໍລິສັດອື່ນໃນລາວປະຕິບັດຕາມ.
ບໍລິສັດ ໄຟຟ້ານ້ຳເທີນ 2 ຈຳກັດ ດຳເນີນໂຄງການໄຟຟ້ານ້ຳເທີນ 2 ໃນແຂວງຄຳມ່ວນ ເຊິ່ງເປັນໜຶ່ງໃນບັນດາໂຄງການພະລັງງານໄຟຟ້ານຳ້ຕົກທີ່ໃຫຍ່ທີ່ສຸດຂອງລາວ, ມຸ່ງໄປເຖິງການພັດທະນາແບບຍືນຍົງ ແລະ ຄວາມຮັບຜິດຊອບຕໍ່ສັງຄົມ. ການຢັ້ງຢືນນີ້ແມ່ນເປັນການຢັ້ງຢືນຕື່ມອີກຕໍ່ກັບຄວາມມຸ່ງໝັ້ນຂອງນໍ້າເທີນ 2 ຕໍ່ກັບການປະຕິບັດດ້ານຈັນຍາບັນ ແລະ ບົດບາດເປັນບໍລິສັດລາວທີ່ມີຄວາມຮັບຜິດຊອບສູງ
