ໃນວັນທີ 10 ພະຈິກ 2024 ທີ່ມະຫາວິທະຍາໄລ ສ້າງຄູກວາງຊີ ສປ ຈີນ ທ່ານ ຊຸນ ເຈຍຢວນ ອະທິການບໍດີ ມະຫາວິທະຍາໄລສ້າງຄູກວາງຊີ ແລະ ຄະນະພັກ-ຄະນະນຳ ມະຫາວິທະຍາໄລສ້າງຄູກວາງຊີ ໄດ້ມອບປະລິນຍາເອກກິດຕິມະສັກດ້ານກົດໝາຍແດ່ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ. ຊຶ່ງທ່ານເປັນຜູ້ທີ່ມີຜົນງານທາງດ້ານກົດໝາຍທີ່ດີເດັ່ນ, ແລະ ມີຄວາມມຸ່ງໝັ້ນ, ມີປະສົບການໃນການປະຕິບັດໜ້າທີ່ ພ້ອມທັງທຸ້ມເທຄວາມຮູ້ຄວາມສາມາດທາງດ້ານວິຊາການ ແລະ ສົ່ງເສີມອຸດົມການອັນດີງາມ ເພື່ອຜົນປະໂຫຍດຂອງສັງຄົມ.
ໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ກໍໄດ້ມີຄຳເຫັນວ່າ: ຂ້າພະເຈົ້າ ມີຄວາມພາກພູມໃຈ ແລະ ຖືເປັນກຽດຢ່າງສູງ ທີ່ມະຫາວິທະຍາໄລ ສ້າງຄູ ກວາງຊີ ສປ ຈີນ, ໄດ້ມີມະຕິຕົກລົງມອບໃບປະກາດປະລິນຍາເອກກິດຕິມະສັກ ສາຂາກົດໝາຍໃຫ້ຂ້າພະເຈົ້າຕີລາຄາສູງຕໍ່ການມອບໃບປະລິນຍາດັ່ງກ່າວນີ້ ເພາະຖືວ່າເປັນກຽດ ແລະ ເປັນກໍາລັງໃຈໃນການປະກອບສ່ວນຊຸກຍູ້ສົ່ງເສີມວຽກງານທາງດ້ານກົດໝາຍ ສືບຕໍ່ໄປ.
ແລະ ຍັງເປັນແຮງຜັກດັນໃນການສຸມສະຕິເຫື່ອແຮງໃນການປະຕິບັດໜ້າທີ່ວຽກງານທາງດ້ານກົດໝາຍໃຫ້ຫຼາຍຂຶ້ນກວ່າເກົ່າ ແລະ ໃຊ້ຄວາມຮູ້ຄວາມສາມາດຂອງຕົນໃຫ້ເກີດຜົນປະໂຫຍດແກ່ສ່ວນລວມ, ຍຶດໝັ້ນໃນຫຼັກການຄວາມຍຸຕິທຳ ແລະ ຄວາມຮັບຜິດຊອບຕໍ່ສັງຄົມ, ພັດທະນາອົງການໄອຍະການປະຊາຊົນໃຫ້ນັບມື້ນັບກ້າວຂຶ້ນເລື້ອຍໆ.
ຂ່າວ,ພາບ: ສານປະຊາຊົນ
